1 Corinthians 10 (HNT)

1 हे वार्टुरा अदिक आकतींगेरा, ना चाहसालीन कि नीव ई मात देल अनजान ईरी कि नाम सप्पा आप्पुर मुतीगोळ बादल इन ल्यालमा ईरोर, अदिक सप्पा च्या सप्पा समुद्र अन्द न्याड्या टु आप्पाटी होटोदुर; 2 अदिक सप्पा मुंदुर बादल दा अदिक समुद्र दा, मूसा अन्द बपतिस्मा ताकोंडुर; 3 अदिक सप्पा मुंदुर ऊंद अच आत्मिक भोजन माळदुर; 4 अदिक सप्पा मुंदुर ऊंद अच आत्मिक नीर कुळदुर, यतिकी आंदुर आ आत्मिक चट्टान देल कुडोर जो आंदुर सांगुळ-सांगुळ नळोद, अदिक अद चट्टान मसीह ईरोन. 5 लेकीन परमेश्वर आंदुर दा टु हापाळ सा मंळसागोळ देल खुश आगीदील, इदुरसाटी आंदुर आळी दा सोतकु ढेर आगेदुर. 6 ई मातगोळ नाम साटी उदाहरण ठहरूसदव, कि ह्यांग आंदुर लालच माळदुर, हांग नाव बेकार वस्तुगोळ्द लालच माळतीदील; 7 अदिक मूर्ति इन पुजा माळावाळेर आगबाळी जसा कि आंदुर दा टु यास मुंदुर आगेगीदुर, ह्यांग शास्त्र दा लिख्सकु आद, “लॉकुर तिनली-कुडुली कुरतुर, अदिक बाद्दा आबुर दाबुर सांगुळ कुकर्म माळली कुरतुर.” 8 अदिक नाव व्यभिचार माळालेव, ह्यांग आंदुर दा टु यास मुंदुर माळदुर; अदिक ऊंद दिन दा तेवीस हजार मंळसागोळ सोतोदुर. 9 नामी प्रभु यीशु मसीह अक परीक्षा दा हाक्‍कोद हैलेच, ह्यांग आंदुर दा टु यास मुंदुर माळदुर, जसा कि आंदुर दा टु थ्वाळासा मुंदुर हिंग माळीदुर अदिक आंदुर हावगोळ द्वारा नाश माळकु आदुर. 10 अदिक नीव कुळकुळुस बाळेतीर, या रीति देल आंदुर दा टु यास कुळकुळुसदुर अदिक स्वर्गदूत उन द्वारा नाश माळकु आदुर. 11 लेकीन ई सप्पा मातगोळ, जो आंदुर मा घळुसदव, उदाहरण इन रीति मा ईरव; अदिक आंदुर नाम चेतावनी इन साटी जो दुनिया अन आखरी समय दा ईरतार लिख्सकु आगीदव. 12 इदुरसाटी जो सम्सतान, “ना स्थिर आईन,” आव सावधान ईरूल कि येल्यारा बिळबाळुल. 13 नीव यातोदारा हिंग परीक्षा दा बिळबाळी, जो मंळसागोळ्द सहन इन व्हार्या आद. परमेश्वर खरा आन अदिक आव नीमी सामर्थ्य देल व्हार्या परीक्षा दा बिळगोळालुन, बल्‍की परीक्षा अन्द सांगुळ ऊळसोद उपाय भी माळ्यान कि नीव अदरी सहन माळ सक्‍कीर. 14 ई कारण, हे प्रिय नान वार्टुरा अदिक आकतींगेरा, मूर्तिपूजा देल ऊळुकु ईरी. 15 ना नीमी बुद्धिमान जान्सकु नीम से अनतीन: जो ना अनतीन, अदरी नीव परखुसी. 16 जो प्याला प्रभु भोज दा उपयोग माळतार यदुर दा टु नाव कुडुतेव प्रभु उन धन्यवाद माळतेव; अद रोट्टी यदरी नाव मुरूतेव, येन अद मसीह अन्द मय इन सहभागी ईलच? 17 इदुरसाटी कि ऊंद अच रोट्टी आद रा नाव भी जो हापाळ आयेव, ऊंद शरीर आयेव: यतिकी नाव सब अदा ऊंद रोट्टी दा भागीदार आगतेव. 18 जो इस्त्राएली आर, आंदरी नोळी: येन बलिदान इन तिनावाळेर परमेश्वर उन वेदी इन सहभागी ईलच? 19 नांद अनोद मतलब येन आद? येन ईद कि मूर्तीगोळ्द मुंद बली येर्सद वस्तु येनारा दुसरा आद, या मूर्ति येनारा दुसरा आद? 20 ईला, पर ना ईद अनतीन कि प्रभु उक ईला जान्सावाळेर लॉकुर जो बलिदान माळतार; आंदुर परमेश्वर उन साटी ईला लेकीन दुष्टआत्मागोळ साटी बलिदान माळतार अदिक ना चाहसालीन कि नीव दुष्टआत्मागोळ्द सहभागी आगी. 21 नीव प्रभु उन प्याला अदिक दुष्टआत्मागोळ्द प्याला येढ्ढु दा टु कुडू सकालीर. नीव प्रभु उन मेज अदिक दुष्टआत्मागोळ्द मेज येढ्ढु मुंदुर सहभागी आग सकालीर. 22 येन नाव प्रभु उक सिट्ट तरसुसोद चाहसतेव? येन नाव आऊन से ताकतवर आयेव? 23 येनारा लॉकुर अनतार, सप्पा वस्तुगोळ्द उपयोग माळोद नान साटी उचित आद, लेकीन सप्पा फायदा अन्द ईलच: लेकीन दुसरा लॉकुर अनतार, “सप्पा वस्तुगोळ नांद साटी सही रा आव.” लेकीन सप्पा वस्तुगोळ देल उन्नती ईलच. 24 याऊ तान हित इन चिन्ता माळबाळुल लेकीन दुसरा अन्द हित इन चिन्ता माळुल. 25 जो मॉदरा कसाई सात्‍ता दा मारतान, अदरी तिनी, अदिक विवेक इन कारण येनु केळबाळी? कि नीम्द मन नीमी मन इन मन दा अच तिनबाळुल. 26 यतिकी पवित्रशास्त्र अनतद, पृथ्वी अदिक जो येनारा अदुर दा आद सप्पा प्रभु उन हुन. 27 अगर अविश्वासीगोळ दा टु यावारा नीमी बावस्या कोळुल, अदिक नीव होगोद चाहासीर, रा जो येनारा नीम्द मुंद ईटकु आगुल अदा तिनी; अदिक मन इन कारण येनु केळबाळी. 28 लेकीन अगर यावारा नीम से अनुल, “ईद रा मूर्ति इक बली माळ्द वस्तु हुन,” रा आवा हेळावाळा अन्द कारण अदिक मन इन कारण तिनबाळी. 29 नान मतलब नीन मन से हैलेच लेकीन आ दुसरा मंळसा अन्द मन देल आद.“भला नांद,” आजादी आ दुसरा अन्द मन देल येती परखुसकु आदीत. 30 अगर ना परमेश्वर उक धन्यवाद माळकु सहभागी आगतीन, रा यार मा ना धन्यवाद माळतीन आऊन कारण नान बदनामी येती आगतद? 31 इदुरसाटी नीव चाहे तिनी, चाहे कुडी, चाहे जो येनारा माळी, सप्पा येनारा परमेश्वर उन महिमा अन्द साटी माळी. 32 नीव ना यहूदीगोळ, ना गैरयहूदीगोळ, अदिक ना परमेश्वर उन मंडली अन्द साटी ठोकर इन कारण बन्सी. 33 ह्यांग ना भी सप्पा मातगोळ दा सप्पा मुंदुरी खुश ईटतीन, अदिक तान ईला लेकीन हापाळ मुंदुर्द फायदा ढुंढ्सतीन कि आंदरी उद्धार सिकुल.

1 Corinthians 10 (HNT)

In Other Versions