Luke 4 (KBT1ETNIK)
1 Jisu kha Ratha Inthiang in asip-ah Jordan makheiya ahongkirra ama kha Ratha'n neelramtiang aleiruoi, 2 Nisoommili seitan in aleimatheemma iteii leibakmak, khawa hekli awon aleichaampi. 3 Seitan'n amadiang aleiti, “Nang in Pathian sapa na-e-inchu, hiwa lunghi waipool uolro tipiro.” 4 Jisu'n aleimasang, “Chong inthiang in ati, ‘Miring ngai'n waipool abit ringnunu.’ ” 5 Khale inruoiya seitan in ching insaangtiang aruoiya inoottheiya manmasituol rengram rakip aleiminmu. 6 “Kei'n hiwangai rakip ranak khat-um neinaak ngaihi kanapesik eii,” Seitan'n aleti, “Hiwa ngai rakiphi kei kadiang inape kha ejei, halli kei'n kipezoot miring diang kapesik eii. 7 Nang in chubei nanatho inchu hiwa-ngai rakip hi nang nata esik eii.” 8 Jisu'n aleimasang, “Chong Inthiang in ati, ‘Nang na Pumi Pathian khabit chubei nathosik khat-um ama sepabit nathosik eii!’ ” 9 Khale inruoiya seitan in Jerusalem tiang aruoiya biak-inn chung insaangnakhet munna aminngirra amadiang aleiti, “Nanghi Pathian sapa na-e inchu hiwa makheiya inchoomro. 10 Chong inthiang khan hin ati, nang kanasansik-ah ‘Pathian in ama tirton kha chong peta juotirsik eii.’ 11 Halli inmani'n nang nakeii kha lungngai khan nasukmaknasik ah inmani'n inkut ngaikhan innaleipomsik eii.” 12 Takkha Jisu'n aleimasang, “Chong inthiang in ati, ‘Nang in na Pumi Pathian kha madan in enmaro.’ ” 13 Seitan in Jisu kha angrakip lamma matheemsuoli ama'n aphakhat sik-ah Jisu kha aleimathaan. 14 Jisu kha Ratha ranak in sip-ah Galilee tiang aleikir, halli ama jarra khawa ramsuung rakip ah araming kha lei-inthang. 15 Ama'n Synagogues ah aleiminchu, halli mi rakip in inleiminpaak. 16 Khale iruoiya Jisu'n ama honglok namun Nazareth ah aleisi, halli Sabbath nikhoni Synagogue ah a-ngai angnga aleisiya ama'n Pathian chong kateelsik ahongngir, 17 halli amadiang Pathian chongkachoipa Isaiah larik kha inleipeii. Ama'n larik kha aphongnga hinthoa inleimajia ajuomu, 18 “Pumi Ratha kha kei kachungnga aom,ajarchu ama'n keihi sara ngaidiang chongkahoi karil sik-ah anakadangjei,halli ama'n mikhumna-ah kaom ngaidiang katanna chong karilsik, khat umMit kamumak ngaikha minmunasik,halli inkanengjuon mi ngaikha kakatansik, 19 halli Pumi in ami ngaikha sannasik ahaphakha juotung sikjei tia minjetnasik ah inajuotir eii.” 20 Jisu'n larik kha akhumma, sepa kathopa diang aleipekirnook ah alei in-ong, Synagogue ah kaom mirakip in amadiang katha ah inlei-en. 21 Halli ama'n inmani diang aleiti, “Awini nangni'n ningrangai jarra hiwa Pathian chonghi huui tungjei.” 22 Halli mi rakip in ama jarra kathatak ah inleiril, ama murra inphut juokasuok rawaan chongngaikhan inleingak ah inmani'n inleiti, “Hiwa miring pahi Joseph sapa emak abe?” 23 Jisu'n inmani diang aleiti, “Nangni'n suoilekleiya hiwa chongngil hi kei kadiang ningnatisik eii, ‘Kathiam, napumtak damna inpero.’ Keini'n kin ijet Capernaumma nang in chuon nitho rakip kha hiwa nang nakhopui hinnum thonookro. 24 Kei'n nangnidiang inthiangkha natipi kate,” “Pathian chong kachoi ngaihi angtikseng inkhuosuung achu kayanunu. 25 Takkha Kei'n inthiangnga natipikate, Elijah phakhan Israel la chuulmei katamtak inleiom, halli kumthum le tharuk hi ruo leisurmak jarra khawa ramsuung rakip ah bukawaang aleisuok, 26 Elijah kha tu diang um leiminsimak, takkha Zerephath inti Sidon ramsuungnga kaom chuulmei numeisanu diang aleiminsi. 27 Khale inruoiya Pathian chong kachoi Elisha phakhan, Israel karra mi angjet takbang ri karoon inleiom; tuteii kha kadam leiommu takkha Syrian makheiya Naaman khabit aleidam.” 28 Synagogue ah kaom mipui'n inleijet phakhan, inmani'n inleiraang. 29 Inmani'n inhong intheiya Jisu kha inmani khopui makheiya inheiruoiya inkhuo luona chingbungnga inleirruoi. Halli ama kha karoolla matanasik ah inleingaidon, 30 takkha ama'n mipui karra aleiluut ah suokdeljei. 31 Jisu'n Galilee khuopui Capernaum tiang aleisi, Sabbath nikhoni ama'n aleiminchu. 32 Halli ama minchu nakhan inmani'n inleingak, ajarchu ama'n ranak kaom tak-ah chong aleiril. 33 Synagogue khan ratha kathamak kaluut miring inkhat aleiom; halli ama'n inringnga ahongkheek, 34 “E! Nazareth Jisu, Angme keinidiang makheiya nimanuom? keini rakip kanamingmang sik-ah nijuobe? kei'n tu na-eme tihi kanajet, Pathian diang makheiya inthiangkha na eii!” 35 Jisu'n ratha kathamak diang aleiran, “Omchian inlang amadiang makheiya heisuokro!” Raikhuo khan ama kha mipui maikuungnga juoworjuolla ama kha iteii minpop lekleiya asuokjei. 36 Mipui'n ngakna inleineiya khatli khatdiang inlei-inti, “Angkachang chongme hiwahi? ranak li thomatorna kanei hiwa mipa'n kathamak ratha ngaidiang chong apeili inmani'n inheisuok!” 37 Halli Jisu jarra khawa ramsuungnga kaom mun rakip ah inleirilthangjei. 38 Jisu'n intheiya Synagogue alei mathaanna Simon innkhan aleiluut, Simon tarpi kha ritun kangar in aleina-ah aleiom, halli inmani'n kananu jarra Jisu diang inleirilpi, 39 Jisu'n kananu koolla ngirra ritundiang aleirakook, halli ritun khan alei mathaanjei, khawa suoa numeisanu khan intheiya inmani sepa aleitho. 40 Kani ajuota phakhan rirai karoon angjet inmani'n Jisu diang inheiruoi; ama'n inmani rakip takchungnga akut duongnga mindamna aleinei. 41 “Nanghi Pathian sapa na eii tia raikhuo angjet in inkheek ah inleisuok.”Takkha Jisu'n raikhuo diang ranna aleinei, halli chongkha leiminrilmak, ajarchu inmani'n injet amahi Christa eii. 42 Khuo ahongwar phakhan Jisu'n mi ommakna muna aleisi, Takkha mipui'n ama kha inhei entok, halli inmani'n injuomu phakhan Jisu kha inmanile inthenpuimak nasik inleitho. 43 Takkha inmani diang aleiti, “Kei'n Pathian Rengram chong kahoihi aleiilaak khuopui diang um kajuorilsik eii, ajarchu hiwa sikbeiya keihi inajuotir eii.” 44 Khale inruoiya khawa ramsuungnga kaom Synagogue ngaikhan Pathian chong aleirilpi.