Exodus 28 (MAAL)
1 ናንጊና ናንጋ ጎዳ ሃሣ ሙሴም፦ «ኔኤኮ ጌርሲ ዓኣሮኔና ዒዛኮ ናኣቶ ናኣዳኣቤ፥ ዓቢሁ፥ ዓላዜሬንታ ዒታማሬንታ ኔ ባንሢ ዔኤሌ፤ ዔያታ ቄኤሴ ማዒ ታኣም ማዻንዳጉዲ ዒስራዔኤሌ ዴሮ ባኣካፓ ዱማሴ። 2 ዒዛም ቦንቾና ሚዛጱሞናኮ ማዓንዳጉዲ ኔ ጌርሲ ዓኣሮኔም ቄኤሴም ኮይሳ ዓፒላ ጊኢጊሼ። 3 ታኣኒ ዱማ ዔራቶ ዒንጌ ፔ ኩጮ ዔራቶና ማዻ ዔሮ ዓሶ ዔኤሊጋፓ ዓኣሮኔም ዔያታ ዓፒላ ማዣንዳጉዲ ኬኤዜ፤ ያኣዒዳዛ ዓኣሮኔ ቄኤሴ ማዒ ታኣም ማዻኒ ዱማዼያ ማዓንዳኔ። 4 ዱማ ዱማ ኮሺንታንዳ ማኣዓሢ ሃካፓ ሊካ ፓይዲንታሢ ጎይፆ ማዖም፦ ዳዳ ጌሢንታ ቡራሻ፥ ዔፑዴ ጌይንታ ኬርና ቱኮ ዓፒላ፥ ቃሚሻ፥ ሼኤሜና ሲኪ ማይሊ ኮሾና ሹራቤ፥ ቶኦካ ማሮያንታ ኬርና ቱኮ ዓፒላንታኬ፤ ኔኤኮ ጌርሲ ዓኣሮኔንታ ዒዛኮ ናኣቶንታ ቄኤሴ ማዒ ታኣም ማዻንዳጉዲ ዬንሢ ዓፒሎንሢ ዔሮ ዓሳ ኮሾንጎ። 5 ዔያታ ዬንሢ ዓፒሎ፦ ዲንኪ፥ ጋላፒ፥ ሃሣ ዞቄ ሱኡፖ ዓፒላይዳፓ ጊንሣ ዎርቄና ቃራ ሚዛጲ ዓፒላናይዳፓ ሼኤሜና ማይሊ ጊኢጊሺ ኮሾንጎ። 6 «ዔፑዶ ዲንኪ፥ ጋላፒ፥ ዞቄ ሱኡፖ፤ ጊንሣ ሃሣ ዎርቄና ቃራ ሚዛጲ ዓፒላናይዳፓ ሼኤሜና ማይሊ ሲኪ ጊኢጊሺ ዔያታ ኮሾንጎ። 7 ላምዖ ዛላ ዎላ ካንሢንታንዳጉዲ ላምዖ ጌኤታ ካኣማ ካሮይዳ ዎጋሮጉዴ ሱሢ ኮሺንቲ ዓኣያ ማዖንጎ። 8 ዔፑዳ ማዢንቴ ባኮንሢዳፓ ዔራቶና ቃውሪ ኮሾና ኬርና ቱኮ ባካ ፔቴይዳ ዎላ ማዦናያ ማዒ ዔፑዶና ዎላ ዓይሢ ማዦናያ ማዖንጎ። 9 ሃሣ ላምዖ ዶዲ ሚዛጲ ሹቺ ዔኪ ታጶ ላምዖ ያይቆኦቤ ናኣቶኮ ሱንፆ ዒኢካ ቆኦቂ ቆኦቂ ፃኣፔ፤ 10 ዬያ ኔ ማዻንዳሢ ዔያቶኮ ሾይንቶ ዎዶ ዣኣሊሱዋዖ ዎሊ ሄሊሲ ሄሊሲ፥ ላሃሢ ፔቴዞይዳ ላሃሢ ጊንሣ ሜሌዞይዳ ቆኦቂ ፃኣፔ። 11 ላምዖ ሹጮይዳ ታጶ ላምዖ ያይቆኦቤ ናኣቶኮ ሱንፆ ቆኦቂ ፃኣፓንዳ ዔራቶ ዓኣ ጎኦባ ዓሲ ዴንቄ፤ ሹጮኮ ዎርቄና ዓጮ ማሂ ኮሼ፤ 12 ታጶ ላምዖ ዒስራዔኤሌ ፃጶ ጶቂሣያ ማዓንዳጉዲ ላምዖ ሚዛጶ ባኮንሢ ጌኤቶ ዔፑዶ ዓፒሎኮ ሱፆይዳ ሮኦኬ። ዬያይዲ ታኣኒ፥ ናንጊና ናንጋ ጎዳ ቢያ ኬሊ ታ ዴሮ ጶቂሣንዳጉዲ ዓኣሮኔ ዔያቶኮ ሱንፆ ፔ ጌኤቶይዳ ዔኪ ሃንቶንጎ። 13 ዎርቄይዳፓ ላምዖ ፓልሞ ኮሼ፤ 14 ጌኤሺ ዎርቄይዳፓ ሱሲጉዲ ዎላ ማርቴ ዣሎ ጉዴ ባኣዚ ላምዖ ኮሺ፥ ላምዖ ፓልሞንሢ ዎላ ዓይሤ።» 15 «ፆኦሲኮ ማሊፆ ዔራኒ ዖኦጮ ዳዶ ቡራሾ ቄኤሶ ቢያኮ ሱኡጋሢም ኮሼ፤ ማዢንቲፃ ዔፑዳ ማዢንቴ ጎይፆ ዒንሢ ባኮንሢና ማዢንቴያ ማዖንጎ፤ ሃሣ ዔፑዶ ሼኤሞና ማይሊ ሲኪ ሚዛጲሶናሢ ጎይፆ ሲኪንቲ ጊኢጌያ ማዖንጎ። 16 ዖዶሱማ ኬኤላ ዋዻ፤ ጊንሣ ዓጮ ዳልጉማኣ ኬኤላ ዋዻ ማዒ ጳንጪንቴያ ዖይዶ ዛላ ሄኮ ማዓያ ማዖንጎ። 17 ዖይዶ ዎሊጊንፆ ጌሦናያ፥ ሚዛጲ ሹቺ ፓልሞ ዒኢካ ኮሼ፤ ቤርታ ዎሊጊንፆ ጌሦዞይዳ ሴርዲዮኔ፥ ቶጳዚዮኔና ዊልጭ ዊልጭ ጋዓ ሚዛጲ ባኣዚ፥ 18 ላምዓሳዞይዳ ቤሉሬ፥ ሴንፔሬና ዓልማዞ ጌይንታ ባኮ፤ 19 ሃይሣሳ ቤዞይዳ ያኪንቴ፥ ኬልቄዶኔና ዓሜቴስፂኖሴ ጌይንታ ባኮ፥ 20 ዖይዳሳዞይዳ ቢሪሌ፥ ሜሬጌዴና ዒያስጲዴ ጌይንታ ባካ ዎርቄና ኮሺንቴ ባኮይዳ ጌሢንቶንጎ። 21 ዒስራዔኤሌ ፃጶ ጶቂሣያ ማዓንዳጉዲ ሃንሢ ታጶ ላምዖ ሚዛጶ ሹጮ ፔቴ ፔቴዞንሢዳ ያይቆኦቤ ናኣቶ ፔቴ ፔቴሢኮ ሱንፃ ቆኦቂ ፃኣፒንቶንጎ። 22 ዳዶ ቡራሾም ሱሲጉዲ ዎላ ማርቴ፥ ዣላሢጉዴ ባኣዚ ጌኤሺ ዎርቄይዳፓ ኮሼ። 23 ላምዖ ዎርቄ ዢኢሮ ኮሺ ዳዶ ቡራሾኮ ኬዶ ዛሎና ዎላ ካኣማ ካሮይዳ ዓይሤ። 24 ዎርቆይዳፓ ኮሺንቴ ዣላሢ ማላ ላምዖ ባኮ ላምዖ ዢኢራሢና ዎላ ካንሢ ዓይሤ። 25 ባጎ ዛሎና ዓኣ ላምዖ ዣላሢ ማላ ባኮኮ ካሮንሢ ላምዖ ፓልሞንሢና ዎላ ካንሤ፤ ዬያይዲ ቤርቶ ዛሎና ጌኤቶይዳ ዓጊንታ ዔፑዶ ዓፒሎኮ ሱፆና ካንሢ ዓይሤ፤ 26 ጊንሣ ላምዖ ዎርቄ ዢኢሮ ኮሺ ጋሮ ዛሎና ዔፑዶይዳፓ ሄሊሲ ዓኣ ዳዶ ቡራሾኮ ዾኦሎ ዛሎና ዎላ ካኣማ ካሮና ካንሢ ዓይሤ። 27 ዬንሢዳፓ ሜሌ ቃሲ ላምዖ ዎርቄ ዢኢሮ ኮሺ ቤርቶ ዛሎና ጌኤቶይዳ ዓጊንታ ዔፑዶ ዓፒሎኮ ሱፆና ዎላ ዾኦሎ ዛሎና ዓይሤ፤ ዎላ ዓይሣኒ ኮይሳሢያ ሲፓ ዎላ ካኣማ ካሮይዳ፥ ጊንሣ ሃሣ ዔራቶና ቃውሪ ኮሾና ኬርኖ ቱኮ ባኮኮ ኬዴኖይዳኬ። 28 ዳዶ ቡራሾይዳ ዓኣ ዢኢራሢ ዔፑዶይዳ ዓኣ ዢራሢና ዎላ ዲንኮ ዣላሢጉዴ ባኮና ቱኬ፤ ያዺ ማዔቴ ዳዶ ቡራሻ ኬርና ቱኮ ባኮኮ ኬዴ ማዔሢሮ ኮሪንዱዋሴ። 29 «ዓኣሮኔ ታኣም ዱማዼ ቤዞ ጌላ ዎዶና ዒስራዔኤሌኮ ፃጶ ሱንፃ ቆኦቂ ፃኣፒንቴ ዬኖ ቡራሾ ማኣዖንጎ፤ ዬያይዲ ታኣኒ፥ ናንጊና ናንጋ ጎዳ ቢያ ዎዴና ዴሮ ታኣኮ ጶቂሳንዳኔ። 30 ታ ማሊፆ ዱማሲ ዔርዛ ባኮንሢ ኔ ዒዛም ዒዛኮ ዳዶ ቡራሾይዳ ዓጌ፤ ዓኣሮኔያ ዓፒሎና ማዢንቴ ጌኤዦ ማኣሮ ጌላ ዎዶና ዳዶ ቡራሾይዳ ዬያ ዔኪ ጌሎንጎ፤ ታኣኮ ማሊፆ ዒስራዔኤሌ ዴሮም ፔጋሲ ኬኤዛኒ ዳንዳዓንዳጉዲ ታ ቤርቶ ሺኢኪ ማዻኒ ዒ ጌላ ዎዶና ቢያ ዳዶ ቡራሾይዳ ዬንሢ ጌሦንጎ።» 31 «ዔፑዶ ቃሚሻ ቢያ ዲንኪ ሱኡፖ ዓፒላፓ ኮሺንቴያ ማዖንጎ፤ 32 ቶኦኪና ጌልዚ ሆላ ማይንታኒ ጊኢጊሶናያ ማዖንጎ፤ ዬና ባኬላ ቡሊንቱዋጉዲ ጋርሲም ጳንጪንቲ ኩቻ ሲኮናያ ማዖንጎ። 33 33-34 ዾኦሎ ዛሎ ዓጮና ዲንኪ፥ ጋላፒ፤ ሃሣ ዞቄ ሱኡፖይዳፓ ማዢንቴ ሮኦማኣኔ ሚፆ ዓኣፖ ማላ ባኣዚ ጌሤ፤ ዬኖ ዓኣፖኮ ባኣኮይዳ ጌላንዳ ዎርቄይዳፓ ማዢንቴ ዻካ ዻካ ሂቾ ጌሤ። 35 ዓኣሮኔ ቄኤሴ ማዒ ታኣም ማዻኣና ዬያ ቃሚሾ ማኣዖንጎ፤ ታኣም ዱማዼ ቤዞይዳ ታ ቤርታ ዒ ጴዻ ዎዶና ማዖም ዒኢካፓ ኬስካ ዎዶና ሂቻሢኮ ዑኡዛ ዋይዚንታንዳሢሮ ሃይቢፓ ዒዚ ዻቃንዳኔ። 36 «ጌኤሺ ዎርቄይዳፓ ፔቴ ፓልሞ ማዢጋፓ ዑፆይዳ ‹ናንጊና ናንጋ ጎዳም ዱማዼያ› ጌይ ቆኦቂ ፃኣፔ። 37 ዬያይዴስካፓ ቶኦካ ማሪ ጌሦሢዳ ዲንኮ ዣሎ ማላ ባኮ ሱፄ፤ 38 ዓኣሮኔያ ዬኖ ፔ ባሊቶይዳ ጌሦንጎ፤ ዬያሮ ታኣም ዔኪ ሺኢኮ ባኮ ሺኢሺፆይዳ ዔያታ ዻቤታቴያ ዒስራዔኤሌ ዓሳ ታኣም ዒንጋ ዒንጊፆ ቢያ ታኣኒ ናንጊና ናንጋ ጎዳ ዔካንዳኔ። 39 «ዓኣሮኔኮ ሹራቦንታ ቶኦካ ማሮ ባኮንታ ቃራ ሱኡፖ ዓፒላና ኮሼ፤ ዒዚ ኬርና ቱካ ባካ ቃራ ሱኡፖ ዓፒላና ኮሺንቲ ሼኤሜና ማይሊ ሲኪ ጊኢጊሾናያ ማዖንጎ። 40 «ዓኣሮኔኮ ዓቲንቆ ናኣቶም ቦንቾና ሚዛጱሞናኮ ማዓንዳጉዲ ሹራቦ፥ ኬርና ቱኮ ባኮንታ ቶኦካ ዓጎ ቆኦቦዋ ኮሺ ጊኢጊሼ። 41 ዬያይዲጋፓ ዓካሪ ዬንሢ ዓፒሎንሢ ኔ ጌርሲ ዓኣሮኔና ዒዛኮ ናኣቶና ማይሴ፤ ታኣም ዔያታ ቄኤሴ ማዒ ማዻንዳጉዲ ሪሚቶ ዛይቶና ኔ ዔያቶ ቲሽኪ ቄኤሴ ማሂ ታኣም ዱማሴ። 42 ካሉማ ዔያቶኮ ፔጋዹዋጉዲ ቃራ ሱኡፖ ዓፒላና፥ ዔያቶኮ ኬርናፓ ዴንዲ ሙርታሢ ሄላንዳ ቆንፄ ዔያቶም ጊኢጊሼ፤ 43 ዓኣሮኔና ናኣቶና ቢያ ኬሊ ዓፒላፓ ማዢንቴ ጌኤዦ ማኣሮ ጌላ ዎዶና፥ ሃሣ ጊንሣ ጌኤዦ ቤዞይዳ ቄኤሴ ማዒ ማዻኒ ዒንጎ ባኮ ዒንጎ ቤዞ ባንሢ ሙካዖ ዬያ ማይንቶንጎ፤ ዬያይዲፆና ዔያቶኮ ካሉማ ጴዺንዱዋሢሮ ሃይቢፓ ዔያታ ቶላንዳኔ፤ ዬይ ዓካሪ ዓኣሮኔና ዒዛኮ ዜርፆናም ቢያ ዶዲ ናንጋንዳ ዎጌ ማዓንዳኔ» ጌዔኔ።