Numbers 2 (MAAL)
1 ናንጊና ናንጋ ጎዳ ሙሴና ዓኣሮኔናም፦ 2 «ዒስራዔኤሌ ዓሳ ናንጋ ጉርዶ ቢያይዳ ፔቴ ፔቴ ዓሳ ዔያታ ናንጋ ቤዞም ዒንጊንቴ ባንዲራ ዓኣ ቤዛ ቤዛ ዱንኪ ዴዖንጎ፤ ዔያታ ዴዓንዳሢ ዓፒሎና ማዢንቴ፥ ታኣኒ ዴሮና ካኣማ ማኣሮ ኮይላ ማዖንጎ» ጌዔኔ። 3 ዓባ ኬስካ ዛላ ዪሁዳ ዓሲ ማሂ ፓቂንቴ ፃጳ ዔያቶም ዒንጊንቴ ባንዲራ ዓኣ ቤዛ ዱንኪ ዴዖንጎ፤ ዪሁዳ ዓሶኮ ሱኡጋሢ ዓምናኣዳኣቤ ናኣዚ ናዓሶኔኬ፤ 4 ዔያቶኮ ፓይዲንቴ፥ ዖላ ዓሶ ሚርጉማ ላንካይታሚ ዖይዶ ሺያና ላሆ ፄኤታናኬ። 5 ዬያቶይዳፓ ሄሊሳዖ ዪሳኮኦሬ ማኣሮ ዓሳ ዱንኪ ዴዖንጎ፤ ዪሳኮኦሬ ማኣሮኮ ሱኡጋሢ ሶጌሬ ናኣዚ ናትናዔሌኬ፤ 6 ዔያቶኮ ፓይዲንቴ፥ ዖላ ዓሶ ሚርጉማ ዶንጊታሚ ዖይዶ ሺያና ዖይዶ ፄኤታናኬ። 7 ዬካፓ ሃሣ ዛብሎኦኔ ማኣሮ ዓሳ ዴዓንዳኔ፤ ዛብሎኦኔ ማኣሮኮ ሱኡጋሢ ኬሎኔ ናኣዚ ዔኤሊያቤኬ፤ 8 ዔያቶኮ ፓይዲንቴ፥ ዖላ ዓሶ ሚርጉማ ዶንጊታሚ ላንካይ ሺያና ዖይዶ ፄኤታናኬ። 9 ዱማ ዱማ ዖላ ዓሲ ማዒ ዪሁዳና ፓይዲንቴ ዓሶኮ ሚርጉማ ፔቴ ፄኤታና ሳሊታሚ ላሆ ሺያና ዖይዶ ፄኤታናኬ። ቤርታ ዓኣዻንዳ ዓሳ ዬኖ ዓሶኬ። 10 ዾኦሎ ዛሎና ሮኦቤኤሌ ዓሲ ማሂ ፓቂንቴ ፃጳ ዔያቶም ዒንጊንቴ ባንዲራ ዓኣ ቤዛ ዱንኪ ዴዖንጎ፤ ዔያቶኮ ሱኡጎ ማዓንዳሢ ሳዲዮሬ ናኣዚ ዔልሱሬኬ፤ 11 ዔያቶኮ ፓይዲንቴ፥ ዖላ ዓሶ ሚርጉማ ዖይዲታሚ ላሆ ሺያና ዶንጎ ፄኤታናኬ። 12 ዔያቶይዳፓ ሄሊሲ ሲሞኦኔ ማኣሮ ዓሳ ዱንኪ ዴዖንጎ፤ ዔያቶኮ ሱኡጎ ማዓንዳሢ ሱሪሳይዴ ናኣዚ ሴሌሚዔኤሌኬ፤ 13 ዔያቶኮ ፓይዲንቴ፥ ዖላ ዓሶ ሚርጉማ ዶንጊታሚ ታዞጳ ሺያና ሃይሦ ፄኤታናኬ። 14 ዬካፓ ጋኣዴ ማኣሮ ዓሳ ዴዖንጎ፤ ዬያቶኮ ሱኡጎ ማዓንዳሢ ራጉዔኤሌ ናኣዚ ዔልሳፔኬ፤ 15 ዔያቶኮ ፓይዲንቴ፥ ዖላ ዓሶ ሚርጉማ ዖይዲታሚ ዶንጎ ሺያና ላሆ ፄኤታና ዶንጊታሚናኬ። 16 ዱማ ዱማ ዖላ ዓሲ ማዒ ሮኦቤኤሌና ፓይዲንቴ ዓቲንቃ ቢያ ፔቴ ፄኤታና ዶንጊታሚ ፔቴ ሺያና ዖይዶ ፄኤታና ዶንጊታሚናኬ። ዬያይዲ ሮኦቤኤሌ ዓሳ ሄሊሲ ዴንዳኒ ኬስኮንጎ። 17 ቤርታሳ፥ ላምዖ ፓቆና ዓሶና ጋፒንፆይዳ ዓኣ ላምዖ ፓቆና ዓሶናኮ ባኣካ ሌዊ ዓሳ ዓፒሎና ማዢንቴ፥ ታኣኒ ዴሮና ካኣማ ማኣሮ ኬዲ ዓኣዾንጎ፤ ፔቴ ፔቴ ፓቂንቴ ዓሳ ዱማሳኒ ዒንጊንቴ ባንዲራ ዓኣ ቤዛ ቤዛ ማዒ ዎሊ ሄሊ ሄሊ ኬስኮም ጎዖና ጎይፆማ ዓኣዾንጎ። 18 ዓባ ጌላ ዛሎና ዔፕሬኤሜ ዓሲ ማሂ ፓቂንቴ ፃጳ ዔያቶም ዒንጊንቴ ማላታ ዓኣ ቤዛ ቤዛ ዱንኪ ዴዖንጎ፤ ዔያቶኮ ሱኡጎ ማዓንዳሢ ዓሚሁዴ ናኣዚ ዔኤሊሳሜኬ፤ 19 ዔያቶኮ ፓይዲንቴ፥ ዖላ ዓሶ ሚርጉማ ዖይዲታሚ ሺያና ዶንጎ ፄኤታናኬ። 20 ዬካፓ ሄሊሲ ሚናኣሴ ማኣሮ ዓሳ ዴዓንዳኔ፤ ዔያቶኮ ሱኡጎ ማዓንዳሢ ፒዳሱሬ ናኣዚ ጌማሊዔኤሌኬ፤ 21 ዔያቶኮ ፓይዲንቴ፥ ፖኦሊሶ ሚርጉማ ሃይሢታሚ ላምዖ ሺያና ላምዖ ፄኤታናኬ። 22 ዬካፓ ሃሣ ቢኢኒያሜ ማኣሮ ዓሳ ሄሊሲ ዴንዳንዳኔ፤ ዬያቶኮ ሱኡጌ ማዓንዳሢ ጊዲዮኔ ናኣዚ ዓብዳኣኔኬ፤ 23 ዔያቶኮ ፓይዲንቴ፥ ፖኦሊሶ ሚርጉማ ሃይሢታሚ ላምዖ ሺያና ዖይዶ ፄኤታናኬ። 24 ዱማ ዱማ ዖላ ዓሲ ማዒ ዔፕሬኤሜና ዎላ ፓይዲንቴ ዓቲንቃ ቢያ ፄኤታና ሳሊ ሺያና ፔቴ ፄኤታናኬ፤ ዬያይዲ ዔፕሬኤሜ ዓሳ ሃይሣሲ ዴንዳኒ ኬስኮንጎ። 25 ኬዶ ዛሎና ዳኣኔ ዓሲ ማሂ ፓቂንቴ ፃጳ ዔያቶም ዒንጊንቴ ባንዲራ ዓኣ ቤዛ ቤዛ ዱንኪ ዴዖንጎ፤ ዬያቶኮ ሱኡጌ ማዓንዳሢ ዓምሳዳዬ ናኣዚ ዓክዔዜሬኬ፤ 26 ዔያቶኮ ፓይዲንቴ፥ ፖኦሊሶ ሚርጉማ ላሂታሚ ላምዖ ሺያና ላንካይ ፄኤታናኬ። 27 ዬያቶ ሄሊሲ ዓሴኤሬ ማኣሮ ዓሳ ዱንኪ ዴዖንጎ፤ ዬያቶኮ ሱኡጌ ማዓንዳሢ ዓክራኔ ናኣዚ ፓግዒዔኤሌኬ፤ 28 ዔያቶኮ ፓይዲንቴ፥ ፖኦሊሶ ሚርጉማ ዖይዲታሚ ፔቴ ሺያና ዶንጎ ፄኤታናኬ። 29 ዬካፓ ኒፕታኣሌኤሜ ዓሳ ዱንኪ ዴዓንዳኔ፤ ዬያቶኮ ሱኡጌ ማዓንዳሢ ዔናኔ ናኣዚ ዓኪሬኬ፤ 30 ዔያቶኮ ፓይዲንቴ፥ ፖኦሊሶ ሚርጉማ ዶንጊታሚ ሃይሦ ሺያና ዖይዶ ፄኤታናኬ። 31 ዱማ ዱማ ዖላ ዓሲ ማዒ ዳኣኔና ዎላ ፓይዲንቴ ዓቲንቃ ቢያ ፔቴ ፄኤታና ዶንጊታሚ ላንካይ ሺያና ላሆ ፄኤታናኬ። ዬያይዲ ዳኣኔ ዓሳ ዖይዳሲ ዴንዳኒ ኬስኮንጎ። 32 ፔቴ ፔቴ ቤዛ ፓቂንቲ፥ ሱንፃ ፃኣፒንቴ ዒስራዔኤሌ ዴሮኮ ሚርጉማ ዎሊ ዑፃ ላሆ ፄኤታና ሃይሦ ሺያና ዶንጎ ፄኤታና ዶንጊታሚ ማዓኔ። 33 ሌዊ ዓሳ ጋዓንቴ ናንጊና ናንጋ ጎዳ ሙሴ ዓይሤ ጎይፆና ሃንጎ ዒስራዔኤሌ ዓሶና ዎላ ፃኣፒንቲባኣሴ። 34 ዬያይዲ ዒስራዔኤሌ ዴራ ናንጊና ናንጋ ጎዳ ሙሴ ዓይሤ ጎይፆ ቢያ ባኮ ኩንሤኔ፤ ፔቴ ፔቴ ፃጳ ፔኤም ዒንጊንቴ ባንዲራ ዓኣ ቤዛ ቤዛ ዴዔኔ፤ ሃሣ ፔቴ ፔቴ ዓሳኣ ፔ ዜርፆና ፔ ማኣሮ ዓሶና ማዒ ማዒ ዴንዴኔ።