1 Samuel 30 (TOMA)
1 Amalɛke nuiti ti kɔɔi ʋɛɛni Sikilage ʋa, ta Zuda yooi ʋa, lɛkpɛmaʋɛ nu yeezazuʋɛ. Siɛgi zu Davide ta ná-kɔɔɠɔ nuiti ti zeelini la foloi zaʋasiɛi Sikilage, ti kaani ga ti taai ɠoloɠologɛ, ti galaai ga abui. 2 Ti anzanuiti soni, ta niiti pɛ ti ɠɛni taazuʋɛ, doungo ʋɛɛ kpakolo ba. Ti la ɠɛni nu nɔpɛ paani, kɛlɛ ti ti zoni, ti pele zo, ti ɗa li. 3 Davide ta ná-kɔɔɠɔ nuiti ti zeeliai ma taazuʋɛ, ti taai ɠaani galaai. Ti-anzanuiti, ta ti-loun zunuiti, ta ti-loun anzanuiti, ti zogai ga kɔɔ luɔiti, ti li ga tiye. 4 Davide ta nuɓusɛiti ti ɠɛni polu, ti tɔɔzeini ga ɓainga, ti ɗa wɔlɔ, eyɛsu zɛbɛi pɛ ge ɠula ti ya. 5 Ti Davide anza felegɔiti pɛ soni ga duɔi, Ayinoame Zizeleyɛle nui, ta Aɓigayile poanzai, nii Kaalamɛle nui Naɓale zɛni. 6 Davide yii wola ɓɔlɔni, mazɔlɔɔ nuɓusɛiti ti ɠɛni ɠɛɛzu, ti sɔ ga kɔtui, é za, tɔɔzei ti ɠilagilagi pɛ ti yii ɠɛni zoolɛzu ga ti-loun zunuiti, ta ti-loun anzanuiti ta-vai. Kɛlɛ Davide ɓɔɠɔ ɠalivaani Ɠɔoɠɔ GALAGI ma, ná-GALAGI, é zɛbɛ niinɛ zɔlɔɔni ʋolu. 7 Davide ɠɛni zalaɠa ɠula nui Ayimelɛke ná-doun zunui Aɓiataal ma: «Ʋa ga zalaɠa ɠula zeɠei, nii Ɠɔoɠɔ GALAGI ɠaazaɠasu da.» Aɓiataal ʋaani la, é fe zea. 8 Davide Ɠɔoɠɔ GALAGI ɠaazaɠani, é ɠɛ ma: «Nà zoo nɛi gè ʋilɛ niima nuiti polu? Nà ʋilɛna ti ʋolu, nà ti ɠɔɠɔzumɛɛn nɛi?» Ɠɔoɠɔ GALAGI gooɠaaʋoteni, é ɠɛ ma: «Ʋilɛ ti ʋolu, ɗa ti ɠɔɠɔzumɛɛnsu, nii pɛ ti liai la, è ti pɛ unmɔɔ.» 9 Davide ta ná-nu undɔzitaiti (600) ti ʋilɛni pelei ma. Ti zeeliai ma Ɓezɔɔl kɔtuɗɛi ma, tanigaa ti yɛni miná. 10 Davide ʋilɛni nɔ pelei ma, nui naati polu, ta nu unnaanigɔ (400), nu unfelegɔ (200) zɔiti ti ɓɔlɔni, ti la zooni ti ʋa Ɓezɔɔl kɔtuɗɛi ɓudɛ, naati ti yɛni miná. 11 Ti Ezipete zunui ta ɠaani dɔɓɔi zu, ti so, ti lii la Davide ʋɔ. Ti ɓului veeni zea, é mi, ti ziɛi ve zea, é ɓɔɔle, 12 ti kooleɠoolegi ma waa vɔɔi ta veeni zea, ta zeeɲɛ felegɔ leezɛn vɔɔi zu. Kpegai ma ga daamii wo, é zɛbɛ zɔlɔɔni, mazɔlɔɔ é kɛɛni ga folo saʋagɔ, ta kpidi saʋagɔ, é la daami wosu, é la ɓɔɔlezu. 13 Davide gaazaɠani, é ɠɛ ma: «Ɓɛ ná-nu ɠa ga ɗe? Mini ɠa è zeɠezu ná?» É gooɠaaʋoteni, é ɠɛ ma: «Nà ga Ezipete zunu loungo, Amalɛke zunui ta ná-duɔ ɠa ga ze, folo saʋagɔ ɠa nà-duɔ kɛɛɠɛi tòai ya, mazɔlɔɔ gè la ɠɛdɛni. 14 Kɔɔi ɠa gi liai gi too, Kelɛte yooi zu lɛkpɛmaʋɛ nu yeezazuʋɛ, Zuda yooi, ta Kalɛɓe yooi lɛkpɛmaʋɛ nu yeezazuʋɛ, gi abui logɛ ɓalaa Sikilage ʋa.» 15 Davide gaazaɠani, é ɠɛ ma: «Ɗa kɛ è lo tùɠɔ, de zeeli kɔɔɓɔgi naa ma?» Ezipete zunu loungoi ɠɛni Davide ma: «Ɠona bɛ̀ GALA daaseigi zu, ga è la pàa, ta è la fèa nà-duɔ kɛɛɠɛi ya, naa a ɠɛɛna, nà lo è luɠɔ, de zeeli ti ma.» 16 É loni Davide luɠɔ, ti zeeli Amalɛke nui naati ma, ti vazagai naama you yɔɠɔzuʋɛ, ti ɗa daamii ta kpɔɔlei wo, ti ɗa fɛtii ɠula, koozunɛɛi maaʋele ma, é lɔɔzei naama ani mɔinmɔingi vaa ʋa, nii ti soni kɔɔi zu, Filisiti yooi, ta Zuda yooi zu. 17 Davide kɔɔi ʋɛɛni ti ʋa gosui, é yɛ ti ʋaazu, eyɛsu poluma voloi kpɔkɔi. Tanɔpɛ ge la ɠulani zea, kɛni zunu loungo unnaanigɔiti (400), niiti ti zeini ɲɔmɛiti kɔma, ti ʋela. 18 Davide naati pɛ unmɔɔni, niiti Amalɛke nuiti ti ti zeɠeni, é anza felegɔiti ɓalaa unmɔɔni. 19 Ti la ɠɛni ʋalani nu ɠila kpalaa ma, doungoa zu, kpakologaa zu, zunu loungo, ɓaa anzanu loungo, nii pɛ é zoni kɔɔi zu, ti la ʋalani gilazu ɓalaa ma. Nii pɛ ti kulani ti ya, Davide ɠaleni ma ga ti pɛ. 20 Davide togani ʋɛlɛʋɛlɛgiti, ta ma ɓaazagiti soni, nui niiti ti ɠɛni loni togani ɓulugi naati tuɠɔ, ti ɠɛni ɠɛɛzu ma: «À ka, nii ɠa Davide sogai kɔɔi zu.» 21 Davide zeelini nu unfelegɔiti (200) ma, niiti ti ɓɔlɔni, ti la ɠɛni zooni ti ʋa ʋilɛ polu, ti yɛni Ɓezɔɔl kɔtuɗɛi ʋɔ bɛ. Naati ti ʋaani Davide laaɠomisu, ta nui niiti ti ɠɛni polu. Davide maaɓuɠani ti ʋa, é ti luʋɔ. 22 Nui niiti ti ɠɛni Davide ʋolu, nu ɲɔiti ta nu ɲakai tanigaa ti ɠɛni ti zaama, ti ɗa ɠɛ ma: «Tɛi ti la ade maazaani kɔɔɠɔzuʋɛ, nii pɛ ade sogai kɔɔi zu, tɔnɔ la ba, kɛni ti-anzaiti, ta ti-lointi nɔ ɠa ta ve ti ya, ti ɗa li.» 23 Kɛlɛ Davide ɠɛni ti ma: «Kɛ̀ɛlointi, à mina naa ɠɛ, ga nii Ɠɔoɠɔ GALAGI feai ade ya, mazɔlɔɔ é ade makɛga, é naati dɔ ade yeezu, niiti ti laalɛai ade wu. 24 Ɓɛ ɠa é woilosu wo-woo ma niima vai zu? Zɔi diai kɔɔɠɔzuʋɛ, ta nii zɛgai kasɔiti koba, tɔnɔi ɠa ɠɛɛzu ga ɠɛʋele, ti gaaɠwɛ yɔɠɔzu ʋɔɔma.» 25 Ʋele ɠana è ɠɛɛni la, é lɔɔzei naama voloi ma, é li ga naa luɠɔʋelei, ti naa ɠɛɛni ga tɔgi, ta devei Izilayɛle yooi zu, zaaɠaza tɔgi naa ɠa ná. 26 Davide liai ma Sikilage, aniiti ti zogai kɔɔi zu, é naati gaaɠwɛɛni, é ta leʋe bɔɔlaiti ma, Zuda ɠundiɠiiti, é ɠɛ ti ma: «Wo-zabai ɠaa, kulaai anii naati su, ti zogai kɔɔi zu, nii kɔai Ɠɔoɠɔ GALAGI zili nuiti daalɔɠɔma.» 27 Ʋele ɠana é kɛɛni la Ɓetɛle geleiti bɛ, é ta leʋe Lamɔte ɠundiɠiiti ma ti lɛkpɛmaʋɛ nu yeezazuʋɛ yooi zu, é ta leʋe Yatiil ɠundiɠiiti ma. 28 É ta leʋe Alowɛɛl ɠundiɠiiti ma, ta Sifemɔte ɠundiɠiiti, é ta leʋe Esetemoa ɠundiɠiiti ma. 29 É ta leʋe Lakale ɠundiɠiiti ma, é ta leʋe Yelameyɛle laa wolaiti su ɠundiɠiiti ma, ta Ken laa wolaiti su ɠundiɠiiti ma. 30 É ta leʋe Ɠɔɔlema ɠundiɠiiti ma, ta Ɓɔɔl-Asan ɠundiɠiiti, é ta leʋe Atake ɠundiɠiiti ma. 31 É ta leʋe Eɓelɔn ɠundiɠiiti ma, ta ʋɛ kpein Davide ta ná-kɔɔɠɔ nuiti ti leʋeni ná.