1 Samuel 6 (TOMA)
1 Ɠɔoɠɔ GALAGI ná-minazeɠe kesui kɛɛni ga alu dɔfela Filisiti nuiti ta-yooi zu. 2 Filisiti nuiti, ti ta-zalaɠa ɠula nuiti ta ʋelela ʋele vaa wo nuiti gaalɛɛni ba, ti ɠɛ ti ma: «Leeni ɠa gá kɛ ga Ɠɔoɠɔ GALAGI ná-minazeɠe kesui? À pele lɛ ga giye, nii gá leʋe da, gi daazeeli ná-zooi zu.» 3 Naati ti ti wooɠaaʋoteni, ti ɠɛ ma: «Ni wa Izilayɛle ná-GALAGI ná-minazeɠe kesui leʋesu ná-zooi zu, à mina ma ɲakai nɔ leʋe. Kɛni wo faazuɓɛtɛ zalaɠaa ɠula bɛ. Wa naa ɠɛɛna, wa ɠɛdɛ, wa kwɛɛ leeni vaa zu é wuzeɠezu wo laalɔɠɔma siɛnɔpɛ.» 4 Filisiti nuiti ti ti ɠaazaɠani ʋolu ga: «Faazuɓɛtɛ zalaɠai ma zii ɓɛgele ɠa gá kula?»Zalaɠa ɠula nuiti ta ʋelela ʋele vaa wo nuiti ti ti wooɠaaʋoteni ga: «À zanu sɔɔla lɔɔlugɔ ɓɛtɛ, é ɠɛ ga puzɛɠulagi ʋaaɠulabai, ta zanu sɔɔla lɔɔlugɔ, nii é ɠɛɛzu ga inɛgiti baaɠulabai, naa ɠa é zoloosu Filisiti ɠundiɠi lɔɔlugɔiti tiegɔi ma, mazɔlɔɔ kpakɔ ɠilagi nɔ ɠa seeliai wo ma, wa-o, wa-ɠundiɠiiti-yo. 5 À wa-ʋuzɛɠulagiti ta inɛgiti baaɠulabaiti kpɛtɛ, niiti ti faa zuɠoloɠologi ɠɛɛzu zooi zu, wo zɛba wo lɛbiyai ve Izilayɛle ná-GALAGI ʋɛ, tanisu toɠa ná-ziiɠaawanai yɛ ná, é bosu wo laalɔɠɔma, wa-o, wa-ɠalagiti-yo, ta wa-yooi. 6 À mina ɠikpa ga Falaɠɔn ta Ezipete nuiti kɛʋele. Wo ɠizɛ su, ga GALAGI nii ɠa é naati kpɔlɔni ga kɛʋele mɔinmɔin, eyɛsu naati ti ɓe Izilayɛle ʋa, é ɠula duɔlai zu. 7 «À wotolo niinɛi ɓɛtɛna, wo nikɛ zaa felegɔ zeɠe, niiti ti-ma yiʋoiti ti ɲiimii ɓɔlezu, nikɛ zaai niiti unbawului laade laani ti unma kaipa. Wo ti ɠili wotoloi ʋa, kɛlɛ wo li ga ti-ma yiʋoiti togani makɛ ʋɛlɛi wu. 8 À Ɠɔoɠɔ GALAGI ná-minazeɠe kesui zeɠe, wo da wotoloi zu, wo zɛba wo kesui taɠili seɠe, wo zanu sɔɔlaiti pu su, niiti wo ti ɠulaai ga wa-vaa zuɓɛtɛ zalaɠai, Ɠɔoɠɔ GALAGI ʋɛ, à naama ɠesui la minazeɠe kesui ɠoba, wotoloi zu, wo ɓe wotoloi ʋa, é ɗa li. 9 Wa losu, wo ɗa wɛlɛ nikɛiti ba. Ni ta liina ga Izilayɛle yooi zu ʋele, kwɛpelema ʋelei, ʋɛ ʋele Ɓɛte-Semɛse ná, wa kwɛɛ naazu, ga Izilayɛle ná-GALAGI ɠa é maanɔɠɔi niiti seiɗa ade ma. Kɛlɛ, ni ti la liini ga naa ʋele, ada ɠɛ ma naazu: ‹Tɔ laade zee ʋa ɠɛ ade ʋa, kɛlɛ niima vai ʋaaʋɛ nɔ ɓɔɠɔ ʋɛ.› » 10 Filisiti nuiti ti ziɛni ga naama lɛnɛ gooi. Ti koima nikɛ zaa felegɔi zeɠeni, ti ti ɠili wotoloi ʋa, ti nikɛ yiʋoiti tɛ togani makɛ ʋɛlɛi wu. 11 Ti Ɠɔoɠɔ GALAGI ná-minazeɠe kesui laani wotoloi zu, ta kesui nii zanu sɔɔlaiti ti su, puzɛɠulagi ta inɛgiti baaɠulabai. 12 Nikɛ zaaiti ti liini ga Ɓɛte-Semɛse ʋele, ti lete nɔ tein, ti ɗa li ga ɓainga, ti la ɠɛni zeɠeni pelei ʋa, ti ʋa li ga yeezazu ʋele, ɓaa ɠɔʋɛzu ʋele. Filisiti ɠundiɠiiti ti yɛni ti ʋolu, eyɛsu ti zeeli Ɓɛte-Semɛse ɠwɛpelemaʋɛ. 13 Ɓɛte-Semɛse nuiti ti ɠɛni nɛmɛ wolai zu, molo leʋezuʋɛ. Ti minazeɠe kesui ɠaai ma, ti wola ɠoozunɛɛni. 14 Wotoloi zeelini Ɓɛte-Semɛse nui, Zozuwe ná-kpalagi zu, wotoloi loni kɔtu wolai ɠobaʋɛ. Nuiti ti wotoloi ma wuluiti teʋeleʋeni, ti baliʋali, ti zɛba ti nikɛ zaa felegɔiti kɛ ga gala zalaɠai Ɠɔoɠɔ GALAGI ʋɛ. 15 Levi nuiti ti Ɠɔoɠɔ GALAGI ná-minazeɠe kesui ɠulani wotoloi zu, ta kesui nii zanu sɔɔlaiti ti ɠɛni su, ti ti la kɔtu wolai maazu. Naama volo ɠilagi nɔ, Ɓɛte-Semɛse nuiti ti gala zalaɠaiti kulani Ɠɔoɠɔ GALAGI ʋɛ, ta zalaɠai taɠiligaa. 16 Siɛgi zu Filisiti ɠundiɠiiti ti miná ɠaai ma la, ti ɠaleni ma naama voloi nɔ Ekelɔn. 17 Filisiti nuiti ti faazuɓɛtɛ zalaɠai ɠulani Ɠɔoɠɔ GALAGI ʋɛ. Zanu sɔɔla lɔɔlugɔ ɠɛni de, nii é ɠɛni ga ta-ʋuzɛɠulagi ʋaaɠulabai, é zoloo ta-laa wola lɔɔlugɔi niiti tiegɔi ma: Asadɔde, Gaza, Asekalɔn, Gate, ta Ekelɔn. 18 Inɛgiti baaɠulabaiti ɓalaa ti ɠɛni ná, naa ɓalaa zolooni taai naati ma, niiti Filisiti ɠundiɠi lɔɔlugɔiti ti zeini ti unda, é lɔɔzei taa wolaiti ma, niiti siɠigi ti ma, é li taa goiti pɔ, niiti siɠi ge la ti ma. Kɔtu wolai nii Levi nuiti ti Ɠɔoɠɔ GALAGI ná-minazeɠe kesui laani ma, Ɓɛte-Semɛse nui Zozuwe ná-kpalagi zu, naa ɠa dɛ ná, zaaɠaza, ga niima vaiti ma zeelei. 19 Ɠɔoɠɔ GALAGI yeeʋɛɛni Ɓɛte-Semɛse nuiti ma, nu ʋuulɔfela (70) ɠa é zaani ti zaama, mazɔlɔɔ ti wɛlɛni minazeɠe kesui zu. Bɛbɛi kpein ge naama zaa wɔlɔi woni, tɔɔzei Ɠɔoɠɔ GALAGI vɔɔɠuni ti ʋa gola. 20 Ɓɛte-Semɛse nuiti ti ɠɛni ma: «Ɓɛ ɠa a zoo é lo Ɠɔoɠɔ GALAGI ɠaazu, GALA ɲadegai nii? Ɓɛ ʋɔɔda ɠa ada zoo ade ná-minazeɠe kesui leʋe ná, nii a kɛ é zeɠe ade ʋɔ bɛ?» 21 Ti keelaiti teʋeni Kiliyate-Yeyalime nuiti ma, ti ɠɛ ti ma: «Filisiti nuiti ti Ɠɔoɠɔ GALAGI ná-minazeɠe kesui ɠaaɠalega ma, à ʋa, wo seɠe, wo lii la wa-laazuʋɛ.»