2 Kings 10 (TOMA)
1 Akaɓe ná-doun zunu ʋuulɔfela (70) ɠa é ɠɛni Samali. Zewu sɛʋɛiti teʋeni Zizeleyɛle ɠundiɠiiti ta taa ɠɛwolaiti ma, naa ʋɛɛ nui naati ba ti ɠɛni Akaɓe ná-doun zunuiti kalasu, sɛʋɛi zu wooi ɠɛni ga nii: 2 «Wa ɠa wo ɠaaɓaazu wo-maliɠii ná-pɛlɛyeɠei wu lointi ma, wotoloiti ta sooiti ta kɔɔɠɔ zɔɔlaiti ta wo ya, wa zeini ɓalaa taa wolai zu siɠigi ma. Naa ɠa é ba, wa sɛʋɛi nii zɔlɔɔna nɔ feya, 3 à wɛlɛ masagi ná-doun zunuiti saama, zɔi a zoo ta soloogai ma ga é ɠɛ ga masagi, wo naa zei ga masagi, wo zɛba wo ɠɛʋele ɓɛtɛ, wo kɔɔi ɠɔ masagi ná-pɛlɛyeɠei ʋɛ.» 4 Naama nuiti ti naa mɛnigai ma, ti wola luani, ti ɗa ɠɛ ɓɔɠɔ ma: «Masa felegɔ mu ka ti la zooni ti ʋa lo Zewu laawu, ada zoo ɠale ade lo daawu?» 5 Gaamago masa pɛlɛi ma ɠundiɠii, ta salaʋusu ɠundiɠii é taazuʋɛ, naa ʋɛɛ kɛwolaiti ta masagi ná-doun zunuiti kala nuiti ba, ti gooɠaaʋotegi nii leʋeni Zewu ma, ti ɠɛ ma: «Gá ga ɗa-wotiɠɛ nuiti, nii nɔpɛ ɗa bo, naa ɠa gi kɛɛzu, gi la nu nɔpɛ seizu ga masa. Naa ɠa é ba, nii nɛai è ʋɛ, naa ɠɛ.» 6 Zewu sɛʋɛi velesiɛi leʋeni ti ma, é ɠɛ ti ma: «Ni wa pɔ̀, ni wa ɠolozu nà-deveiti bɛ, lina niima yeeɠɛɠalai nɔ ma, à masagi ná-doun zunuiti kpein tɔungiti teʋe ti ʋa, wo ʋa ga tiye pɔ̀ Zizeleyɛle.» Tama, masagi ná-doun zunu ʋuulɔfelaiti gaaɠwɛa ɠɛni de taa wolai zu nu ɓiigiti ba, naati ka ti ɠɛni ti ɠulazu su. 7 Sɛʋɛi zeeliai ma ti ma, ti masagi ná-doun zunu ʋuulɔfelaiti (70) soni, ti ti ɠɔdaaleʋe, ti tɔungiti pu kpɔlɔgiti su, ti ti leʋe Zewu ma Zizeleyɛle. 8 Keela ɠila ge liini, é bo Zewu ma ga ti ʋaa ga nu unkalagi naati, Zewu devei veeni ga ti nu ungiti sei su ga ma ziɠi felegɔ taa ziɠidaʋɛ eyɛsu geelaa ɗa lao. 9 Poluma voloi sobui é ɠulani taai ʋa, é ɓɔɛ bɛbɛi ʋɔ, é ɠɛ ti ma: «Wɔun wa ga sɔbalala ʋea! Nà ɠa gè ga sɔba nui, mazɔlɔɔ nà ɠa gè yaavai ɠiliai masagi Yolame ma, gè paa. Kɛlɛ niiti ma, ɓɛ ɠa é ti ʋaai? 10 À kwɛɛ ga Ɠɔoɠɔ GALAGI laawooi niiti kpein é ti woni Akaɓe ná-pɛlɛyeɠei laalɔɠɔma, gila kpalaa ge la yɛni ʋoluzu nii daa la zeelini. É naama wooiti kpein daazeelia, niiti é ti woni, é ɠula ná-botiɠɛ nui Eli la.» 11 Zewu Akaɓe ná-pɛlɛ wu nui mɔtaiti paani niiti ti ɠɛni Zizeleyɛle, ta ná-botiɠɛ nu wolaiti, naa ʋɛɛ bɔɔlaiti ta zalaɠa ɠula nuiti ba, é la gila kpalaa zɛni ná. 12 Naa ʋoluma Zewu ʋilɛni pelei ma, é ɗa li Samali. Seelizuʋɛ togani makɛ nuiti ta-ɠaalɛba ʋɛlɛi gila ma, nii é ɠɛni pelei zu, 13 Zewu ɠomini ga Zuda masagi Aɠazia kɛɛɠɛlointi, é ɠɛ ti ma: «Ɓɛ ɠa ga woye?» Ti gooɠaaʋoteni, ti ɠɛ ma: «Gá ga masagi Aɠazia kɛɛɠɛlointi, gá liizu masagi ná-dointi tuʋɔsu, ta masa anzanui Zezaɓɛle ná-dointi.» 14 Zewu ɠɛni ná-siɛpoluiti ma: «À ti ma vuluiti so.» Ti ti ma vuluiti soni, ti ti ɠɔdaaleʋe, ti ti ʋili ya gaalɛba ʋɛlɛi naa ma ziɛyeɠei zu. Ti ɠɛni ga nu ʋuunaanigɔ maazu felegɔ (42), Zewu la ɠɛni gila kpalaa zɛni ná. 15 Seɠeai ma miná, ti ɠomini ta Lekaɓe ná-doun zunui Yonadaɓe, é ɠɛ naa ma: «È yiima ɠoleʋɛ nɛi bɛ̀, ʋelei zìima ɠoleai la è ʋɛ?» Yonadaɓe ɠɛ ma: «Zìima ɠoleʋɛ.» Zewu ɠɛ ma: «Ni ʋele ɠana é la, yeela zèa.» Yonadaɓe yeelaani zea. Zewu zɛba é tɛ, é sei ɠoba ná-wotoloi zu, 16 é ɠɛ ma: «Ʋa, de li, è ka ʋelei gè botii ɠɛɛzu la Ɠɔoɠɔ GALAGI ʋɛ ga zɛbɛi.» É liini ga naa ná-wotoloi zu. 17 Zewu zeeliai ma Samali, é Akaɓe ná-pɛlɛ wu nui mɔtaiti paani niiti ti ɠɛni Samali, é ti zuwuɠaaleʋe, eɠɛʋelei nɔ Ɠɔoɠɔ GALAGI boni la Eli ma. 18 Naa ʋoluma, é nuɓusɛiti gaalɛɛni ba, é ɠɛ ti ma: «Akaɓe la wola Ɓaale lɛbini, nɔ̀un nà Zewu nà dɛbizu ga gola. 19 Naa ɠa é ba, à Ɓaale ɠala goo wo nuiti kpein toli, ti ʋa pɔ̀ bɛ, nui niiti kpein ti dɛbizu ta ná-zalaɠa ɠula nuiti, gila kpalaa ge mina yɛ ʋoluzu, mazɔlɔɔ nà pɔ gè zalaɠa wola ɠula Ɓaale ʋɛ. Zɔi nɔpɛ a yɛ ʋoluzu, naama nui la yɛga vulua.» Zewu ɠɛni naa wosu ga keleɠelegi, nii a kɛ é Ɓaale lɛbi nuiti paa. 20 É ɠɛni ti ma: «À fɛti ɠula ɠui lo, Ɓaale lɛbi vai zu.» Ti kui loni. 21 Zewu keelai leʋeni Izilayɛle yooi zu ná pɛ. Ɓaale lɛbi nuiti pɛ ti ʋaani, nu ɠila kpalaa ge la ɠɛni yɛni ʋoluzu nii é la ʋaani. Ti lɛɛni Ɓaale lɛbi ʋɛlɛi wu, buulaave é zeeli kwɛgi pɛ ma. 22 Zewu ɠɛni zalaɠa ɠula zeɠeiti makɛ nui ma: «Seɠeiti kula Ɓaale lɛbi nuiti pɛ bɛ.» Zunui naa seɠeiti kulani ti ʋɛ. 23 Zewu ta Lekaɓe ná-doun zunui Yonadaɓe ti lɛɛni Ɓaale lɛbi ʋɛlɛi wu, é ɠɛ ti ma: «À wɛlɛ ɓɔɠɔ zaama, Ɠɔoɠɔ GALAGI ná-botiɠɛ nui tanɔpɛ ge mina ɠɛ wo zaama, Ɓaale lɛbi nuiti wo ma letele nɔ yɛ pɛlɛi wu.» 24 Ti lɛɛni ga ti zalaɠaiti ta gala zalaɠaiti kula. Zewu salaʋusu ʋuulɔsaʋa (80) loni eteaʋɛ, ti ɠaku pɛlɛi ma, é ɠɛ ti ma: «Zɔi nɔpɛ a ɓe nu ɠila kpalaa ba, é li, niiti su gè ti veezu wo ya, è ma nui ɗa za potogi zu.» 25 Ti ɓegai ma ga gala zalaɠaiti kula, Zewu ɠɛni salaʋusuiti ta ta-ɠundiɠiiti ma: «À lɛ, wo ti ʋaa, tanɔpɛ ge mina ɠula ba.» Ti lɛɛni, ti ɗa naati paa ga boɠa zɔkpɔi, ti ɗa poomaiti pili ya etea ʋelei, ti yɛni ti ʋaazu eyɛsu ti lɛ Ɓaale ná-pɛlɛi ma ada ɲadega wolai wu. 26 Ti Ɓaale ʋɛlɛi wu zale zɔɔlaiti kulani, ti abui lo ti ʋa, ti ɠala. 27 Ti Ɓaale ná-sale ɠɔtui loka ta ti ná-pɛlɛi ɓalaa golo, ti ná lati ga bɛbɛi ná-maagba wosu, naa ɠa é su, zaaɠaza. 28 Zewu Ɓaale ɠulani Izilayɛle yooi ʋa tɛtɛ. 29 Kɛlɛ é la ɠɛni zeɠeni naama ɠotoiti polu, niiti Neɓate ná-doun zunui Zeloɓoame Izilayɛle nuiti diini kɛɛ vai ma, mazɔlɔɔ zanu nikɛ yiʋoiti ti ɠɛni dɛ Ɓetɛle, ta Dan. 30 Ɠɔoɠɔ GALAGI ɠɛni Zewu ma: «Tɛi è naa ɠɛa nii sɔlegai gàazu, è naa kpein kɛ nii é ɠɛa ga zìima vai é lo Akaɓe ná-pɛlɛyeɠei ʋa, è-lointi ta yɛ zeizu Izilayɛle masa kpɔkpɔgi ɠa eyɛsu è-mavofodai zeizu naanisiɛi.» 31 Naa pɛ ge ɠɛɛni, kɛlɛ Zewu la ɠɛni ziɛni ga yii pɛ Ɠɔoɠɔ GALAGI ná-tɔgiti su, Izilayɛle ná-GALAGI. É la zeɠeni pɛ naama ɠotoiti polu, niiti Zeloɓoame Izilayɛle nuiti diini kɛɛ vai ma. 32 Naama ziɛgi zu Ɠɔoɠɔ GALAGI tɔɔzeini ga é ɗa ta leʋe Izilayɛle yooi ʋa. É vaani bu Siili masagi Ɠazayɛle vɔni ti ma ta-yooi ɠwɛpelemaʋɛti pɛ. 33 Ʋele ɠana ti ʋalani la zooi ɠilazuʋɛ ma, é folo ɠulazu ʋelei Zuludɛn letegi ma, é zo taa wolai Alowɛɛl ma é lɛkpɛma maazu ʋelei ziɛ wolai Aalanɔn letegi ma, Galaade ta Ɓasan yooi ɠɛni ga mináti, ná ɠa Luɓɛn wolodamaiti ta Gade wolodamaiti, naa ʋɛɛ Manasé wolodamaiti ba ti ɠɛni zeini ná. 34 Zewu ná-kɛɛwotii mɔtaiti, ta nii kpein é kɛɛni, naa ʋɛɛ ná-tɔɠɔɠula faiti ba, naati sɛʋɛʋɛ Izilayɛle masagiti ta-ɠɛɛwoti zɛʋɛi zu. 35 Zewu zaani. Ti maaɠuluni Samali. Ná-doun zunui Yoaɠaze ɠa é masadai ɠɛɛni potogi zu. 36 Zewu kɛɛni masadai zu Izilayɛle unda Samali ga kona ʋuufele maazu lɔsaʋa (28).