2 Kings 8 (TOMA)
1 Elizé ɓɔɛni anzanui naa ʋɔ, nii é ná-doun zunui yɛnvui ʋuuni su, é ɠɛ ma: «À ɠula ʋɛ ʋa wa ɗa-ʋɛlɛyeɠei. Wo li seikɔɠɔma ʋele zu, zou ɠili su, ʋɛ wa zoo zeizu ná, mazɔlɔɔ Ɠɔoɠɔ GALAGI deveʋɛ ga é pului loo zooi nii zu, é yɛsu kona dɔfela.» 2 Anzanui ziɛni ga GALA goo wo nui ná-tɛnɛ gooi, ta ná-pɛlɛyeɠei ti liini, ti zei Filisiti yooi zu kona dɔfela laawu. 3 Kona dɔfelai ɓegai ma, anzanui zeɠeni Filisiti yooi zu, é li masagi ʋɔ bɛ ga ti ná-pɛlɛi ta ná-zooiti fe zea. 4 É zolooni kpein masagi ta GALA goo wo nui Elizé ná-botiɠɛ nui Geyazi ti ɗa yɛpɛ, é naa ɠaazaɠagai, é ɠɛ ma: «Faa wolai niiti Elizé ti ɠɛai, ti wo dɛɛ mà.» 5 Siɛgi zu é ɠɛni naa wosu da ʋelei Elizé gɔvɛi ta wuzeɠeni la, é kula saai ya, anzanui nii Elizé ná-doun zunui yɛnvui ʋuuni su, naa unkulani masagi ʋɔ bɛ ga naa ɓɔ ba ná-pɛlɛi ta ná-zooiti fai zu. Gaamago Geyazi wooɠulani, é ɠɛ ma: «Wɛlɛ anzanui ʋa gè ɠɛa ná-fai wosu è ma, màliɠii masagi, wɛlɛ ná-doun zunui ɓalaa ba, nii Elizé buzeɠeni, é kula saai ya.» 6 Masagi anzanui ɠaazaɠani, naa ná-faiti pɛ suɠula ma. Masagi ná-botiɠɛ nu wolai gila feeni anzanui ya, é ɠɛ naa ma: «Li, è bo, ti anzanui nii ɠɔligiti pɛ gaaɠale ma pɔ, ti ani ve zea ga ná-zooi ʋaalɔnɔgi ti kulaai, é zo dii volo nuu ma, é zeeli niizu ma, naama zalai.» 7 Yeeta mɔnɔ Elizé liini Damase. Siili masagi Ɓɛne-Ɠadade ɠɛni zeeɓɛzu, ti ɠɛni ma: «GALA goo wo nui ʋaaʋɛ ʋɛ.» 8 Masagi ɠɛni Ɠazayɛle ma: «Vebɛani zeɠe, è li GALA goo wo nui ʋɔ bɛ, é Ɠɔoɠɔ GALAGI ɠaazaɠa bɛ̀, ni nà ɠulazu niima zeeɓɛi zu.» 9 Ɠazayɛle vebɛaniiti seɠeni, niiti ti ga Damase yooi ʋaalɔnɔ pagɔiti, é ɲɔmɛ ʋuunaanigɔ (40) ɠasɔɠili ga tiye, é li GALA goo wo nui Elizé ʋɔ bɛ. Seeliai ma, é loni naa ɠaazu, é ɠɛ ma: «Ɗa-wotiɠɛ nui Siili masagi Ɓɛne-Ɠadade tèʋegɛ ga gè è ɠaazaɠa, ni toɠa ɠɛdɛsu, é ɠula niima zeeɓɛi zu.» 10 Elizé gooɠaaʋoteni, é ɠɛ ma: «Li, è ɠɛ ma: ‹Ungo, ɗa ɠɛdɛsu, è ɠula seeɓɛi nii zu.› Kɛlɛ Ɠɔoɠɔ GALAGI dɛɛʋɛ ga ze ga toɠa zaazu.» 11 GALA goo wo nui ɠaazuloni Ɠazayɛle ʋa, é yɛ wɛlɛzu ba, naa unfe, naa ʋoluma Elizé ɗa wɔlɔ. 12 Ɠazayɛle gaazaɠani, é ɠɛ ma: «Toɠa ɠale màliɠii wɔlɔzu?» Elizé gooɠaaʋoteni, é ɠɛ ma: «Mazɔlɔɔ gè kwɛni faa ɲɔi nii kpein è ʋaazu kɛɛzu ga Izilayɛle nuiti. Ɗa ʋaazu abui losu ta-laa wolaiti ba niiti siɠigi ti ma, è ta-zunu loungoiti paa ga boɠa zɔkpɔi, è lati, è ta-loungo ʋɛlɛʋɛlɛgiti kpɔnɛkɛlɛ, è koma anzanuiti kogiti daaʋali.» 13 Ɠazayɛle kpɔɛi zeɠeni, é ɠɛ ma: «Nà ga leeni kae, nɛ̀i gè ga ɗa-wotiɠɛ nui, kɛ̀ai nɔ eɠɛ gilɛi, nà zoo nii ɠɛɠala vaa wolaiti kɛɛzu?» Elizé ɠɛ ma: «Ɠɔoɠɔ GALAGI dɛɛʋɛ ga ze ga ɗa ɠɛɛzu ga Siili masagi.» 14 Ɠazayɛle zeɠeni Elizé ɠoba, é li maliɠii ʋɔ bɛ, naa gaazaɠa, é ɠɛ ma: «Leeni ɠa Elizé bogai è ma?» É ɠɛ ma: «É ɠɛ ɗa ɠɛdɛsu, è ɠula seeɓɛi nii zu.» 15 Poluma voloi Ɠazayɛle pɛɛmazeɠei gila seɠeni, é dɔ ziɛi wu, é pɛɛ masagi ɠaazu, naa za, é masadai ɠɛ naa ʋotogi zu. 16 Akaɓe ná-doun zunui Yolame ná-kona dɔɔlusiɛi ma masadai zu Izilayɛle unda, Zozafate ná-doun zunui Yolame zeini Zuda unda ga masagi. 17 Ná-konagi ɠɛni ga puusaʋa maazu fele (32), siɛgi zu é zeini la ga masagi. Kona dɔsaʋa ɠa é kɛɛni masadai zu Zeluzalɛme. 18 É ziɛ ʋele ɲɔuni ga Izilayɛle masagiti kɛʋele, eɠɛʋelei nɔ Akaɓe ná-pɛlɛyeɠei kɛɛni la, mazɔlɔɔ é Akaɓe ná-doun anzanui gila fuluni. É Ɠɔoɠɔ GALAGI wanama vai ɠɛɛni. 19 Kɛlɛ Ɠɔoɠɔ GALAGI la ɠɛni kɛɛni é ʋa Zuda masadai ɠoloɠolo, mazɔlɔɔ é minazeɠeni ná-botiɠɛ nui Davide ʋɛ ga naa mavofodaiti ta ɠɛ masadai ɠɛɛzu nɔ ɠɔ. 20 Yolame ná-masa fai ma ziɛgi zu ɠa Edɔme nuiti ti ɓakani la Zuda masadai laalɔɠɔma, ti ɓɔɠɔ masa sei. 21 Názu ɠa Yolame ná-kɔɔɠɔ wotoloiti pɛ gaalɛɛni ba la, é li Sayiil. Kɛlɛ, kɛni kua zaamai masagi ta ná-kɔɔɠɔ wotolo ɓizɛ ɠundiɠiiti pɛ ti lɔɔni Edɔme nuiti ta-ɠɔɔɲɛkpɛi zaama, ti leʋe ga zeeɠaaɓa, mazɔlɔɔ naati ti ti maaɠakuni niina, kɛlɛ ná-salaʋusuiti ti ʋelani, ti li ta-zeɠe ɠotaiti bu. 22 É zo názu ma niina, é zeeli za ma, Edɔme nuiti ti la mɔ Zuda masadai yeema, ta ɓɔɠɔ yeema. Naama yeeɠɛɠalai nɔ Liɓina taa wolai wuzeɠeni Zuda laalɔɠɔma. 23 Yolame ná-kɛɛwotii mɔtaiti, ta nii kpein é kɛɛni, naati sɛʋɛʋɛ Zuda masagiti ta-ɠɛɛwoti zɛʋɛi zu. 24 Yolame zaani. Ti maaɠuluni mɛmɛwolani ta-ɠabamaʋɛ, Davide ná-taa wolai zu. Ná-doun zunui Aɠazia ɠa é masadai ɠɛɛni potogi zu. 25 Akaɓe ná-doun zunui Yolame ná-kona puugɔ maazu felegɔ (12) ma masadai zu Izilayɛle unda, Yolame ná-doun zunui Aɠazia zeini Zuda unda ga masagi. 26 Ná-konagi ɠɛni ga puufele maazu fele (22), siɛgi zu é zeini la ga masagi. Kona gila ka é kɛɛni masadai zu Zeluzalɛme. Dee laa ɠɛni ga Atali, Izilayɛle masagi Womeli ná-dounloin ta ɠɛni de. 27 É ziɛ ʋele ɲɔuni ga Akaɓe ná-pɛlɛyeɠei ɠɛʋele, é Ɠɔoɠɔ GALAGI wanama vai ɠɛɛni, eɠɛʋelei nɔ pɛlɛyeɠei naa kɛɛni la, mazɔlɔɔ vulu ɠalui ɠɛni ti yɔɠɔzu. 28 Aɠazia ta Akaɓe ná-doun zunui Yolame ti liini ga kɔɔi Siili masagi Ɠazayɛle laalɔɠɔma, Lamɔte Galaade yooi zu. Siili nuiti ti masagi Yolame maawanani, 29 naa ɠale ma Zizeleyɛle, ná-maawanaiti salezu nii Siili nuiti ti pɛɛni ba Lama, siɛgi zu ti lia la ga kɔɔi Siili masagi Ɠazayɛle laalɔɠɔma. Názu ɠa Aɠazia liini la pɛtɛsu, mazɔlɔɔ é ɠɛni zoolɛzu ga ʋe.