2 Kings 8 (YAPE)
1 Chiney e keyog Elisa ngak fare pin ni i par u Shunem, ni fa’anem ni faseg Elisa ba pagel ni fak, nike pi’ SOMOL ba uyngol nga daken fare nam, nra par ni medlip e duw n’umngin nap’an, ma ir e nge chuw nge tabnaw rok ngranod ra pired ngabang. 2 Me fol fare pin ko n’en keyog Elisa mranod chon e tabnaw rok ngranod ra pired nga Filistia ni medlip e duw. 3 Me m’ay fa medlip i duw me sul fare pin nga Israel me yan ngak e en ni pilung ni nge yog ngak ngan fulweg e naun nge binaw rok ngak. 4 Me yan ma be non fare pilung nge Gehazi, ni tapigpig rok Elisa; ya ba’adag fare pilung ni nge nang murung’agen e pi maang’ang ni i rin’ Elisa. 5 Nap’an ni be weliy Gehazi ngak fare pilung rogon nike faseg Elisa be’ ko yam’, me yib fare pin ni nge wenignag e tirok’ ngak fare pilung. Me ga’ar Gehazi ngak fare pilung, “Gur e en ni pilung, irera’ fare pin ma ba’aray fare pagel ni fak ni faseg Elisa ko yam’!” 6 Mri micheg fare pin e pin’en ni be weliy Gehazi ni fulweg ko duwer rok fare pilung, ma aram me pining fare pilung ba tolang ko salthaw rok me yog ngak ni nge fulweg urngin e tirok fare pin ngak, nib mu’un puluwon urngin wom’ngin e woldug ko yungi flang rok ngay ko medlip i duw ni immoy u bang. 7 Me yan Elisa nga Damaskus u bangiyal’ i n’en nib m’ar Benhadad ni Pilung nu Syria. Nap’an nnog ngak e en ni pilung ni bay Elisa urom, 8 me ga’ar fare pilung ngak Hazael, ni reb e tolang ko salthaw rok, “Mu fek ba tow’ath i yan ngak fare profet ma gog ngak nge fith laniyan’ SOMOL nge nang ko kug ra gol ko m’ar fa dangay.” 9 Ma aram me suguy Hazael daken aningeg i ragag e kamel nga gubin mit e pin’en ni bfel’ nu Damaskus me yan ngak Elisa. Nap’an ni mada’nag Hazael facha’, me ga’ar ngak, “Fare tapigpig rom i Benhadad ni Pilung e ke l’oegeg ni nggu fithem ko ku ra gol ko fare m’ar rok fa dangay.” 10 Me fulweg Elisa, ni ga’ar, “Mman mog ngak ni bayi gol, machane SOMOL e ke dag ngog ni bayi yim’.” 11 Ma aram me lik’ath Elisa nike lanmit i morus ngak fare mo’on me kirkireb fare mo’on. Me yib e lu’ u mit Elisa nib tomgin. 12 Me fith Hazael ni ga’ar, “Siro’, mangfan ni ga be yor?”Me fulweg Elisa ni ga’ar, “Ya kugnang e pin’en nib gel e kireb riy ni bay mu rin’ nib togopluw ngak e girdi’ nu Israel. Bay mu tay e nifiy ko pi yoror rorad, ma ga thang e fan rok e pi pagel rorad ni th’abi gel, ma ga pirdi’iy pifakrad ngarm’ad, ma ga sey e yal rok e ppin rorad nib diyen.” 13 Me fith Hazael ni ga’ar, “Ra di’in me er fanag gel? Ya gag be’ ni dariy rogog!”Me fulweg Elisa ni ga’ar, “Ke dag SOMOL ngog ni bay mmang pilung nu Syria.” 14 Me sul Hazael ngak Benhadad, me fith ni ga’ar, “Mang e keyog Elisa?”Me fulweg Hazael ni ga’ar, “Keyog ngog ni ga ra gol.” 15 Machane fa’ani yan i reb e rran riy me fek Hazael bangi blanket nge lithag nga fithik’ e ran, me ning e fan ko fare pilung ngay.Me yan nga luwan Benhadad nge mang pilung nu Syria. 16 U lan e duw ni lal ko gagiyeg rok Joram ni Pilung nu Israel nib mo’on ni fak Ahab, me mang Jehoram nib mo’on ni fak Jehoshafat e pilung nu Judah, 17 ni guyey nge l’agruw e duw rok, me par u Jerusalem nge yog e thin ni meruk e duw. 18 Ma le’engin e be’ ni bpin ni fak Ahab, miki bod fare tabnaw rok Ahab niki yan u kanawo’en e kireb rok fapi pilung nu Israel. I denen nib togopluw ngak SOMOL, 19 machane de fel’ u wan’ SOMOL ni nge gathey yu Judah, ni bochan e ke micheg ngak e tapigpig rok i David ni pi’in owchen e gubin ngiyal’ ni yad e bay u ra gagiyeggad. 20 Nap’an e gagiyeg rok Jehoram me togopluw yu Edom nga Judah, miyad par rorad ni yad e yad be gagiyeg nagrad. 21 Ere me yan Jehoram nge urngin e pi chariot rok nga Zair, ko gin ni yib i longbiyrad e pi salthaw nu Edom riy. Me nep’ me ir nge pi ga’ ko pi chariot rok e ra thaygad ngar milgad, ma pi salthaw rok e ra weargad ngranod nga taferad. 22 Yu Edom e ka’aram e ra chuwgad u tan pa’ yu Judah ngar pired rorad. Ma ku re ngiyal’ i ney e ki togopluw fare binaw nu Libnah. 23 Ma gubin e tin kabay ni rin’ Jehoram e kan yoloy ngalan e babyor ni Chepin e Pilung nu Judah. 24 Me yim’ Jehoram min k’eyag u lan fapi low ko yam’ rok e pilung u lan fare Binaw rok David, me Ahaziah nib mo’on ni fak e yan nga luwan nge pilung. 25 U lan e bin ragag nge l’agruw e duw u nap’an nike gagiyeg Joram ni Pilung nu Israel nib mo’on ni fak Ahab, me mang Ahaziah e pilung nu Judah nib mo’on ni fak Jehoram 26 ni ngiyal’nem e ke gaman rliw’ nge l’agruw e duw rok, me par u Jerusalem ni ta’reb e duw ni yog e thin u rom. Chitinngin e Athaliah, ni be’ ni bpin ni fak Ahab ni Pilung ma Omri ni Pilung nu Israel e tutuw rok. 27 Ku ta’reb rogon e n’en ni rin ko tin i rin’ e tabnaw rok Ahab, i rin’ e n’en nib kireb u p’eowchen SOMOL, ya bay tha’en ko re tabnaw rok Ahab nem. 28 I Ahaziah ni Pilung e un ngak Joram ni Pilung nu Israel ngar maelgow nib togopluw ngak Hazael ni Pilung nu Syria. Me chafin fa yu raba’ i salthaw u Ramoth u lan yu Gilead, me maad’ad Joram u fithik’ fare mael. 29 Me sul ngalan fare binaw nu Jezreel ni nge gol ko pi maad’ad rok, me yan Ahaziah ngaram ni nge nang salpen.