2 Timothy 2 (TOMA)

1 Ɗɔun ɗa, dòun, è-zɛbɛi ɠaiziɛ zaalai zu, de sɔlɔɔsu da-ɠilibalai zu, da Yesu Kilista. 2 Kalagi nii è sɔlɔɔgai zèa, gè ɗa bo zeele mɔinmɔin gaazu, ti ɠaliva wooɠɛɠila nuiti ma, niiti tiya ɓɔɠɔi ta zoo ti taɠiligaani kala da. 3 Va bu, è ɗɔnɔ zɔlɔɔ kpɔlɔi zu, eɠɛ Yesu Kilista ná-salaʋusu ʋagɔi. 4 Salaʋusu nɔpɛ ge la ná, nii a ɗa ɓɔɠɔ lɔ faa ɠiligiti su, ni toɠa pɔ ga é nɛɛ ná-kundiɠii ʋɛ. 5 Ɠaɠo bo nu nɔpɛ ge la ná, a zoo zalai zɔlɔɔsu, ni é la ziɛni ga deveiti, ti zeiɗai. 6 Tii ɠɛ nui é botii ɓaaɓaagi ɠɛɛzu, maanɛɛʋɛ tɔ mɔunpa é nɔnɔ zɔlɔɔ ma lɔnɔgi zu. 7 Ɠida naa wu ga pagɔ, nii gè bosu è ma, naazu Maliɠii ɠa ti pɛ gaaɠaa ɠigi ve è ʋɛ. 8 Ɠigi yɛ Yesu Kilista zu, nii é ga Davide mavofodai, buzeɠeai é ɠula saai ya, eɠɛʋelei Woo Niinɛ Ʋagɔi bosu la, nii gè daazeelizu. 9 Naa ɠa gè kpɔlɔi zɔlɔɔsu ma vaa zu, ti ɗa gìli eɠɛ faa ɲɔu ɠɛ nu. Kɛlɛ GALA daawooi la ɠilini. 10 Naa ɠa é ba, nà yiilɔɔzu fai pɛ bu, naati ta-vaa zu, niiti GALA ge yiimazeɠeai ga tiye, naa ɠa a kɛ tiya ɓalaa ti kizogi ta ɠɔoɠɔ lɛbiyai zɔlɔɔ ga Yesu Kilista maaʋele. 11 Wooi niiti ta ga lada ɓɔɛi:«Ni ada zaa ʋɔɔma ada tɔun,da zɛnvui wo tɔun ba. 12 Ni da lona kpaan,da masadai ɠɛ ɓalaa tɔun ba.Ni da ɠɛlɛna ba,tɔ ɓalaa ka ɠɛlɛ ade ʋa. 13 Ni da ɠɛna ga wooʋalada nuiti,tɔun ka yɛsu ga wooɠɛɠila nui,mazɔlɔɔ é la ɓɔɠɔ maaɠaalia tɔ ɓɔɠɔi.» 14 Nuiti kitoo niima vaiti su, è ti maaɓakpa GALA gaazu, ti ɓeteʋe maaɠaali vaiti ba, ti la faa nɔpɛ paa nu ma, kɛni nɔ ti ti woomɛni nuiti ziiɠoloɠolo. 15 Ɠaaɓa ga zɛbɛi pɛ, è ɓɔɠɔ lɛ ga nui nii GALA ka yeezei bu, botiɠɛ nui nii nu la unfe faa nɔpɛ ka ba, nii é gaama wooi laazeelizu ga sɔledai. 16 Yeeɠula wafuun kpɔɛzuɠulaiti su, niiti ti la zolooni kidaaleʋei ma, mazɔlɔɔ zɔiti ti ʋilɛsu naati polu, naati ta ɗa li nɔ luɠɔma, GALA gaazuluabalalai zu. 17 Kalagi ti bosu, naa ɠa luula eɠɛ palai, su ɗa li ga wɔɔlɔa. Yimené ta Filɛteni ta ga naama nui ta. 18 Ti zeɠea gaamai ʋa, ti ɗa ɠɛ ma: «Kula saayai ɓega ga ɠɛ niina.» Ʋele ɠana ti nu mɔinmɔin kakasu la kidaaleʋe ʋelei ʋa. 19 Anɛɛ naa ʋe, seɓasemai GALA ge daai, naa ɠa loni kpaan, niima wooiti sɛʋɛʋɛ ma ga poogi: «Maliɠii ná-nuiti kwɛɛ», ta «Zɔi nɔpɛ é bosu ga toɠa ga Maliɠii nɔnɔ, é maaɠooza telebotalai ʋa». 20 Pɛlɛ wolai wu, zanu aniɲakai ta wali aniɲakai ɠila nɔ laade, é ʋa ɠɛ ná, gulu geleiti ta pɔlɔ geleiti ɓalaa ta ɗa ɠɛ ná. Tanigaani ta ɗa ɠɛ faa unbu yɛ, mɔtaiti botii ɗa ɠɛ naati su yeenɔpɛ. 21 Ni deɠɛmu nu a ɓɔɠɔ makɛna ɲadedai zu, é ʋilɛ niima vaiti ba, gè ti wosu, toɠa ɠɛ ga lɛbiya aniɲakai, é makɛsu yɛ, é pɛlɛ kɛɛɠɛi maavai ɠɛɛzu, soloogai kɛɛwoti ʋagɔi pɛ ma. 22 Ɓizɛ nu niinɛlai ma ɠaazuɠulapɔiti ba, è telebodai ɠaiziɛ, ta kidaaleʋei, ta nɛɛbɛi, ta ziilɛigi, wa naati, niiti ti wooɠulazu Maliɠii ma ga ti-yiima ɲadegai. 23 Ɠɛlɛ ɠimalala maaɠaaliiti ba, un ge la ti ʋa, naati ka ta ɗa kpɔɛi wuzeɠe. 24 Tama Maliɠii ná-botiɠɛ nui maa la nɛɛni, é ʋa ɠɛ ga kpɔɛleʋe nu. Kɛlɛ kɛni tuʋalaa nɛɛ ɛsɛ pɛ bɛ, é zoo nuiti kalasu, ziilɔɔ. 25 Maanɛɛʋɛ é ɗa sakpe nuiti kala ga sɛsɛbogi. Tanisu GALA ka pelei lɛɛ ga tiye, nii a kɛ ti-ziɛ ʋelei maavalibo, ti gaamai ɠwɛɛ. 26 Ta ʋa ɠima naazu, ti ɠɛ ʋolu ga sɔɓelama nuiti, ti ɓɔɠɔ ɠula Inɛgi ná-balii ɠa, nii é ti zoni, ti lɔ ziimai ɠɛɛ vai zu.

2 Timothy 2 (TOMA)

In Other Versions