Deuteronomy 21 (TOMA)

1 Zooi nii Ɠɔoɠɔ GALAGI wa-ƓALAGI feezu wo ya ga wɔnɔ, ni ta nui ta ʋaana ná, wo ma ʋoomai ɠa dɔɓɔi zu, wo la nu ʋaa nui ɠwɛɛni, 2 wa-ɠundiɠiiti ta wa-lukpɔɠaaleʋe nuiti ta li naama adaʋɛ, ti ná yɔɠɔzuʋɛ ɠɔɠɔ, é zo poomai ʋɔ bɛ ʋa, é zeeli maaɠoolii ma laaiti su, 3 ti ɠɛ kwɛɛ nii maaɓuɠaai. Naama laai ma ɠundiɠiiti ta nikɛ zaa yiʋoi zeɠe, nii é la dɛ botii ɠɛɛni, unbawulu la dɛ ʋilini unba. 4 Ta lii la kɔtuɗɛi ta ʋɔ bɛ, nii é la ɗa ga vɔa eyɛsu ɠɔ, ʋɛ nu la dɛ wozawolini ná, ɓaa nu ʋa ani vaza ná. Miná ɠa ta nikɛ yiʋoi ma zaai ɓoɓoɠaʋɛ wolo ná, kɔtuɗɛi wu. 5 Názuʋɛ ɠa zalaɠa ɠula nuiti, Levi nuiti ta maaɓuɠa la ná ʋa, mazɔlɔɔ tiya ɠa Ɠɔoɠɔ GALAGI wa-ƓALAGI yiimazeɠeai ga tiye, ga ti ɠɛ ná-botii zu, ti ɗa tuyai loo daaseigi zu. Tiya ɠa ti maanɛai, ti kpɔɛ vaiti gaaɠula ba, ta doɠa vaiti, ta nu maawana vaiti. 6 Naa ʋolu, kundiɠiiti ti taai naa zu, nii dɛai ga maaɓuɠaʋɛ poomai ʋa, ta yagba nikɛ zaa yiʋoi maazu, nii kpoɓoɠaʋɛ woloai kɔtuɗɛi wu. 7 Ti ɠɛ ma: «Gi-yeeiti ti la ɠɛɛni ga, nui nii ma ɲama ʋuu nua, gi ɠaazuʋɛ la faa nɔpɛ kaani, é ʋa lo ba, gá ɠɛ su ga zeele. 8 Ee, Ɠɔoɠɔ GALAGI, ɗa-nuɓusɛiti maavaayɛ, Izilayɛle nuiti, è ti unmɔɔgai. Mina sɔbalala nu ʋaa vai ma ɠasɔi la ti unma.» Pele ɠana ɲamai puai ma ɠoto gba vai a ɠɛ la ti ʋɛ. 9 Wa sɔbalala nu ʋaa vai ma ɠasɔi zeɠe ɓɔɠɔ unma ɠana, tɔɔzei wo naa ɠɛa, nii sɔlegai Ɠɔoɠɔ GALAGI ɠaazu. 10 Siɛgi zu wo liizu la, wo kɔɔi loo wo zili nuiti ma, Ɠɔoɠɔ GALAGI wa-ƓALAGI ti lɔ wo yeezu, niiti wo ti ɠɛɛzu ga duɔiti, tanisu ti zaama, 11 wo zaama ta a duɔ anzanu ʋagɔ ta ɠana, wɔin so, é pɔ ga é zei bɛ ga anza. 12 Toɠa lii la ná-pɛlɛi wu. Anzanui ɠa nɔungi ɓuye, ta é zeezaingiti teʋe. 13 Toɠa ná-duɔ zeɠei ʋu, nii é ɠɛni kɔba. Toɠa zei sinigi ná-pɛlɛi wu, é wɔlɔ kɛɛɠɛ ta dee ta-vaa zu, alu gila daawu. Naa a leʋena, toɠa ʋilɛ polu niina, é ɠɛ ga sinigi, naa ɠɛ ga anzai. 14 Su a ɠoozana, wɔin a zeɠena zunui ma, toɠa ɓe ba, é li ʋɛ ná nɛai bɛ. Zunui la zooga é ʋa pɔdi, ɓaa é ʋa dɔ duɔla zu, tɔɔzei é laa koba, ti ɓɔ faa ma. 15 Ni anza felegɔ a ɠɛna zunui ta ya, tanisu toɠa gilagi nɛɛ ʋɛ, é leʋe zɔi ʋa. Ni ti felegɔ ta dointi sɔlɔɔna bɛ, tanisu doun zunu mɔungi ɠɛ ga anzanui naa nɔnɔi, nii gola la ziimani. 16 A ɠɛna pogani ɠaaɠwɛa ná-doun zunuiti zɔɠɔzu, é la zooga é ʋa doun mɔun tosuʋɛ ve anzanui naa ná-doun zunui ya, nii gola nɛai bɛ, é ʋa kula naa ná-doun zunui ya, nii gola la ziimani, ni naa ɠa é ga doun mɔungi. 17 Kɛni anzanui naa gola la nɛɛni bɛ, é ná-doun zunui ɠwɛɛ ga doun zunu mɔungi, é pogani ma ʋɛɛda felegɔi ve zea, zeaɠɔligi kpein su. Mazɔlɔɔ doun zunui naa ɠa é ga suvikɛi ma mɔungi, doun mɔun tosuʋɛ ɠa ga tɔun nɔnɔ. 18 Ni zunui ta ɠa ná, doun zunui ta zea, kpakagai, gaazulɛ, é la ɠoloni kɛɛɠɛ ta dee ʋɛ, ni ta maaɠolona, kɛlɛ é la ɠoloni, 19 kɛɛɠɛ ta dee ta so, ti lii la taa ɠundiɠiiti pɔ bɛ, taa ziɠidaʋɛ. 20 Ta ɠɛ kundiɠiiti ma: «Gi-loun zunui ʋɛtɛ, kpakagai, gaazulɛ, é la ɠoloni gi ʋɛ, é ɠɛa ga koloɠolo nu, ta dɔɔ ɓɔle nu.» 21 Ná-taazu zunuiti kpein ta sɔ ga kɔtui, é za. Wa faa ɲɔi lɔɔɠula ɠana ɓɔɠɔ zaama. Izilayɛle nuiti kpein ta ma wooi mɛnina, ta lua. 22 Ni zunui ta a faa ɲɔi ta ɠɛɛna, soloogai ga é za, wo sɛlɛ gului ʋa, 23 ma ʋoomai maa la nɛɛni é ʋa kpidii ɠɛ zɛlɛni gului ʋa. Wa maaɠulu ma yeei nɔ, mazɔlɔɔ nii sɛlɛgai gului ʋa, naa ɠa ga foovooi GALA gaazu. À mina zooi ɠɔzɔ, nii Ɠɔoɠɔ GALAGI wa-ƓALAGI feezu wo ʋɛ ga wɔnɔ.

Deuteronomy 21 (TOMA)

In Other Versions