Ephesians 2 (TOMA)

1 Mɔungi, wo zaa ɠɛni de, zɛnvu zu vaiti tetemazu, wa-vaaɠaazagiti ta wa-ɠotoiti maaʋele ma. 2 Wo wa-etea ziɛi ʋokɔɠɔni niima eteai zu vaiti ma. Wo ʋilɛni fiilɛ zu yɛnvu ɲɔiti ta-ɠundiɠii ʋolu. Zɛnvui naa ɠa é botii ɠɛɛzu niizu nuiti ziimaʋɛ, niiti ti la ɠolozu GALA bɛ. 3 Mɔungi zu, adea ɓalaa, de ɠɛni ga ti ɠɛʋele, de ɗa eteai ziɛ eɠɛʋelei de-ɓusɛi yiimaiti ti la. Nii nɛai de-ɓusɛi ʋɛ ta da-ɠisiɛi, naa ɠa de ɠɛni kɛɛzu. De zɔlɔɔ pelei maaʋele ma, GALA ná-ziiɠaawanai ɠa é zolooni de ma ga zɔiti kɛʋele. 4 Kɛlɛ GALA nii ná-gaazumaawɔinɠai zuwɔɔlɔai gola, tɔɔzei ná-nɛɛbɛ wolai ʋa, é de nɛai la ʋɛ, 5 siɛgi zu de zaa ɠɛni de la zɛnvu zu vaiti tetemazu, da-vaaɠaazagiti maaʋele ma, é zɛnvui vea ade ya Kilista ʋɔ. Zaalai ɠa wo ɠizogai la. 6 Ada-ɠilibalai maaʋele ma da Yesu Kilista, GALA ge ade wuzeɠeni ʋɔɔma, é ade ɠula saai ya, é ade zei ʋɔɔma geeɠɔlɔgi zu. 7 É naa ɠɛɛni, nii a kɛ é dɛɛ yeeɠɛɠalaiti pɛ su ti ʋaazu, ʋelei ná-zaala wolai wɔɔlɔai la ga ná-nuɓɔɠɔlai maaʋele ade ʋɛ, ada-ɠilibalai maaʋele ma da Yesu Kilista. 8 Mazɔlɔɔ wo ɠizogɛ ga GALA ná-zaalai, ga kidaaleʋei maaʋele. Naa la ɠulazu wa ɓɔɠɔi zu, kɛlɛ GALA ná-vebɛanii ʋe. 9 Kɛɛwotiiti maaʋele laade ɲɛgɛlɛin, naa ɠa a kɛ nu nɔpɛ ge mina ɓɔɠɔ maamusɛ pa. 10 Mazɔlɔɔ GALA ka é ade ɓɛtɛai, é ade ɓɛtɛʋɛ ada-ɠilibalai zu da Yesu Kilista, kɛɛwoti ʋagɔiti kɛ vaiti ma, niiti é ti ɠɛʋele ɓɛtɛni ma yeeluɠɔ, nii a kɛ de ʋilɛ naati kɛ vai ʋolu. 11 Zuifuiti ti latigai pɛlɛʋolu kpusɛi zu, ti ɗa ɓɔɠɔ loli ga tatipɛlɛʋolu nuiti. Wɔiti wo la latini pɛlɛʋolu kpusɛi zu, ti ɗa wo loli ga tatipɛlɛʋolulala nuiti. Tama, à ɠizɛ naa zu, ʋelei wo ɠɛni la mɔungi: 12 Wo la ɠɛni dɛ Kilista ɠwɛɛ, wo la ɠɛni levezu ga Izilayɛle nuɓusɛi ta, wo ɠɛni ga wɛɛinti GALA ná-minazeɠegiti faa zu, wo ɗa eteai ziɛ, kito ge la wo ʋɛ, wo la GALA kwɛɛ. 13 Wɔigiti wo maaɠoozani GALA ba mɔungi, kɛlɛ niizu niina, wa-ɠilibalai maaʋele ma wa Yesu Kilista, wo maaɓuɠaa ba ga Kilista ɲamai maaʋele. 14 Mazɔlɔɔ Kilista ɓɔɠɔi ɠa é ga ada-yiilɛigi. É Zuifuiti ta zii ɠiligiti kpɔga su, é ti ɠɛ ga nuɓusɛ zii ɠila kpegi. Ná-saai maaʋele ma, é siɠigi woloa ti yɔɠɔzu, nii é ɠɛni ti zilizu ga ɓɔɠɔ. 15 É tɔgi zeɠeni ga, ta tɔgi zu leveiti, ta ma vaazeikpasuiti. É ɠɛni pɔ ga é nuɓusɛ niinɛi ɓɛtɛ, é Zuifuiti ta zii ɠiligiti gili tɔ ɓɔɠɔi ʋa, é ziilɛigi lɔ ti yɔɠɔzu. 16 É ɠɛni pɔ é ti felegɔ yɔɠɔzuɓɛtɛ ta GALA, é ti ɓɔ su kpusɛ ɠilagi zu, ga ná-saai maaʋele saa wului ma, é naa ɠoloɠoloni, nii é ɠɛni ti zilizu ga ɓɔɠɔ. 17 É ʋaani, é woo niinɛ ʋagɔi laazeeli wo ma nii é ga ziilɛigi wo ʋɛ, wɔiti wo maaɠoozani GALA ba, ta zɔiti bɛ, niiti ti maaɓuɠani ba. 18 Mazɔlɔɔ Kilista maaʋele ma, Zuifuiti ta zii ɠiligiti, de losu zɔlɔɔga Ɠɛɛɠɛ ɠobaʋɛ ga Zɛnvu Ɲadega ɠilagi maaʋele. 19 Naa ma, wo la mɔ ga wɛɛn ɓaa seikɔɠɔma nu, kɛlɛ wa niina ga zou lointi ʋɔɔma wa GALA ná-nuiti, ta wa niina ga GALA ná-pɛlɛyeɠei wu nuiti. 20 GALA ge wo logɛ ga pɛlɛi, ma seɓasemai ɠɛ ga keelaiti ta GALA goo wo nuiti, naama ʋɛlɛi ma zɔɓelama ɠɔtu wolai ɠa é ga Yesu Kilista ɓɔɠɔi. 21 Tɔun maaʋele ma, pɛlɛi naa pɛ togɛ ɓɔɠɔ la ga pagɔ ná pɛ, é ɠɛ GALA sei ʋɛlɛ ɲadegai Maliɠii ʋɛ. 22 Wa-ɠilibalai maaʋele ma wa Kilista, wo logɛ ʋɔɔma, wo ɠɛ ga GALA sei ʋɛlɛi, ga GALA Zɛnvui maaʋele.

Ephesians 2 (TOMA)

In Other Versions