Esther 8 (TOMA)
1 Naama voloi nɔ masagi Zuifuiti sili nui Aman yeaɠɔligiti pɛ feeni anzai Ɛsetɛɛl ʋɛ. Ma yeei nɔ masagi Maledosé lolini, é li pɔ bɛ, mazɔlɔɔ Ɛsetɛɛl dɛɛni ga masagi ga ta ga bolodamaiti ta Maledosé. 2 Ná-balaɠaegi nii é kulani Aman ya, é naa veeni Maledosé ya. Ɛsetɛɛl ma ge Maledosé zei Aman ɠɔligiti pɛ unda. 3 Ɛsetɛɛl ɓɔɛni ʋolu masagi ʋɔ, é loo kɔɠɔwu ga gɔlɔi, é ɗa maanɛɛnɛ ga naa Agage mavofodai Aman ná-faazeikpasu ɲɔi ɠoloɠolo, nii é kɛai Zuifuiti daalɔɠɔma. 4 Masagi ná-zanu tukpɔi leteni Ɛsetɛɛl ma, naa wuzeɠe, 5 é ɠɛ ma: «Masagi, ni nɛɛʋɛ è ʋɛ, ta ni gè zaala zɔlɔɔga masagi ɠaazu, ni ɗa vaana bu, ta è nɔ̀un nɛɛʋɛ ʋɛ, soma è bo, ti sɛʋɛi ɠɛ, nii a Ɠamedata ná-doun zunui Agage mavofodai Aman ná-sɛʋɛi zu wooi zeɠe ma, sɛʋɛi nii é kɛɛni ga ti Zuifuiti suwuɠaaleʋe ɗa-yooi zu. 6 Nà zoo ɠale gè ɗa wɛlɛ maanɔɠɔi ʋa, é ɗa ʋa nà-nuɓusɛiti pɔ? Gè la zooga gè ʋa ɗa wɛlɛ ná ʋa, ti ʋa ɗa nɔ̀un ma zii zuwuɠaaleʋe.» 7 Masagi Zɛɛlesɛse ɠɛni masa anzai Ɛsetɛɛlɛni ta Zuifui Maledosé ma: «Gaamazu fàaʋɛ bu ga Aman zɛlɛ gului ʋa, gè lati, gè kɔligiti pɛ fe è ʋɛ, Ɛsetɛɛl, mazɔlɔɔ é wuzeɠeni Zuifuiti daalɔɠɔma. 8 Kɛlɛ zobo ge la veeni bɛ̀ ga sɛʋɛi nii kɛai dàaseigi zu, poogi ʋilɛgai su ga nà-balaɠaegi, gè ʋa naa zu wooi zeɠe ma. Naa ɠa é ba, wa ɓalaagi à sɛʋɛi ta ɠɛ dàaseigi zu. Nii kpein wo kaazu ga Zuifuiti ta-ɠulanuma, wo naati bo su, wo poogi ʋilɛ su ga nà-balaɠaegi.» 9 Ti masagi ná-sɛʋɛ ɠɛ nuiti gaalɛɛni ba naama voloi nɔ, alugi zaʋasiɛi daa ga Sivan, naa ma volo ʋuufelegɔ maazu saʋagɔi (23) ɠɛni de. Ʋelei Maledosé boni la ti ma, ti sɛʋɛiti kɛɛni, ti ti leʋe Zuifuiti pɛ ma, ta masagi ná-nu wolaiti ma, ta zou zɛʋɛ ɠundiɠiiti, ta zooi ma ɠaaɠwɛsu ungila puufele maazu lɔfelai (127) ma wotiɠɛ nu wolaiti pɛ ma, é zo Inde ma é zeeli Etiyopi ma. Sɛʋɛi naati ti ɠɛɛni zii ɠilagilagi laawooi ta ná-sɛʋɛ ɠɛ ʋelei zu, ma un ge daa ma ga Zuifuiti. 10 Sɛʋɛiti ti ɠɛɛni masagi lɔɠɔi zu, poogi ʋilɛ ti zu ga masagi ná-balaɠaegi. Naa ʋoluma, ti veeni keelaiti zea, ti lɛ sooiti kɔma, niiti ti yiimazeɠeni ga tiye masagi ná-sooiti saama. 11 É woni sɛʋɛi naa zu ga, masagi zobogi vea Zuifuiti bɛ ná-zooi zu ná pɛ, ga ti ɠaalɛ ba, ti ɓɔɠɔ maaɠɔkɔ, nu nɔpɛ ɓaa zii nɔpɛ é masagi ná-zooi zu, é laalɛɛzu ti wu ga kɔɔɠɔ zɔɔla, ti ma nuiti kɔdaaleʋe, ti ti ʋaa, ti zuwuɠaaleʋe. Zobogi veeni ti ʋɛ ɓalaa ga ti ma nuiti ti-anzaiti ta ti-lointi paa, ti ti-ɠɔligiti seɠe ga maaɓaai. 12 Naa kpein maanɛɛni é ɠɛ folo ɠila nɔ masagi ná-zooi zu ná pɛ, alugi puugɔ maazu velesiɛi (12), nii daa ga Adaal, naa ná-folo puugɔ maazu saʋagɔi (13) ma. 13 Zou zɛʋɛi ɠilagilagi kpein ma laa wolaiti su, sɛʋɛi naa maanɛɛni é ɠɛ ga tɔ sɛʋɛi, su wooi lɛ ga ɛsɛ pɛ, naa ɠa a kɛ Zuifuiti ti ɠɛʋele ɓɛtɛ, nii a kɛ ti tɔnɔi ʋotokula ti zili nuiti ma, naama voloi nii dɛai. 14 Masagi devei woni nɔ feya, keelaiti ti zei masagi ná-sooiti kɔma ga gaazuvilɛi, ti ɗa li ga kpizɛ wolai, gaamanɔ sɛʋɛi naa zu wooi laazeelini Suze taa wolai zu. 15 Maledosé ɠulani masa pɛlɛi wu, maaɠiliai ga masa seɠei pɔnɛai ga ma ɠolegi, ta ma ɓiinii, geze ʋagɔ zeɠe wolai kɔba kpɔiɗai, zanu masa bɔɔlɔ golai unma. Zealoɠa lugi ta koozunɛ wooi ɠulani Suze taa wolai zu. 16 Naama voloi ɠɛni Zuifuiti bɛ ga lɛbiya voloi, undaanɛ voloi, koozunɛ voloi ta fɔnifaama voloi. 17 Zou zɛʋɛi ɠilagilagi kpein su, ta taa wolaiti kpein su, ʋɛ nɔpɛ masagi ná-sɛʋɛi ta ná-devei a la zeeli ná, é ɠɛni ga koozunɛɛi ta undaanɛɛi Zuifuiti bɛ, ti ɗa fɛtiiti ta daami wolaiti kɛʋele ɓɛtɛ. Zɔɔma zii tanigaa ti ɗa ɓɔɠɔ ɠɛ ga Zuifuiti, tɔɔzei Zuifuiti baaluabai ʋa, é ti zoni.