Esther 8 (YAPE)

1 Ka rofen nem me pi’ Xerxes ni Pilung tafen Haman ni to’ogor rok e Jew ngak Queen Ester. Me yog Ester ngak fare pilung ni Mordekai e be’ rok. Ma aram mi ni pi’ mat’wun Mordekai ngi i yan nga p’eowchen fare pilung. 2 Me luf fare pilung e luwaw rok ni bay e hang riy (nike fulweg rok Haman) nge pi’ ngak Mordekai. Me tay Ester Mordekai nge milfan tafen Haman ngak. 3 Miki non Ester ko fare pilung bayay, nike pag ir nga but u rifrifen ay ni be yor. Ma be wenig ngak ni nge taleg fare makath rok Haman nib togopluw ko Jew, ni Haman e reb i owchen Agag. 4 Me k’iyag fare pilung e sog rok nib gol ngak Ester, me sak’iy me ga’ar, 5 “Fa’anra bfel’ u wun’um i gur pilung ma fa’anra gub t’uf rom, ma ga be finey nib mat’aw, ma wenig ngom mu yoloy bang e babyor ngam siyeg e tin keyog Haman nib mo’on ni fak Hammedatha ni owchen Agag, ni ngan rin’ ni fan e nge mathmit gubin e Jew ni bay u tan gil’ilungum. 6 Bu uw rogon i lubeg rog e biney e riya’ ni nge aw ko tirog e girdi’, ni ngan thang owcharad?” 7 Ma aram me ga’ar Xerxes ni Pilung ngak Ester ni Queen nge ngak Mordekai nib Jew, “A musapgow, kugog kan uchuluy Haman ke yim’ ni bochan e makath rok nib togopluw ngak e pi Jew, ma kug pi’ tafen ngak Ester. 8 Machane bbug i thin ni kan yoloy kan garareg ni bay fithingan e en pilung riy ma ka ni pirdi’iy e pow rok e pilung ngay e dabyag i thilyeg. Ma demturug e tin gimew be leamnag mra yag ni mu yoloyew nge yan ngak e pi Jew; ni ngan yoloy u tan fithingag mi ni pirdi’iy e hung ko pilung ngay.” 9 Pin’ey e buch ko rran ni rliw’ nge dalip ko pul ni dalip ni fare pul ni Sivan. Me pining Mordekai fapi tayol rok fare pilung me yog ngorad ko mang e ngar yoloyed ngak e pi Jew nge ngak e pi governor, pi tolang ko am, nge pi tayugang’ u gubin fa 127 yang i nug ni tabab u India me yan i mada’ nga Sudan. Fa yung i babyor e go’ ni yoloy nthin rok e pi girdi’ ko yungi nug nem nge yol rorad. 10 Yog Mordekai ni ngan sayinnag fithingan Xerxes ni Pilung ngay, mi ni pag e hung rok ngay. Mini milnag u os ngan wereg nib machreg. 11 Bay ko yungi babyor nem ni be yog fare pilung ko pi Jew, nra yib e cham ngorad, ma ngar ayuweged e pogofan rorad. Demturug e re mit i girdi’ u lan fa yungi nug ni yad ra yib ni cham ngak e Jew, fa ngak pifakrad, fa ppin rorad, mra yag ni ngar chamgad ngorad ngar thanged owcherad; miyad fanay e tirorad. 12 Re thin ney e ni fanay u ga’ngin yu Persia ko rofen nturguy ni ngan thang mit e Jew, rofen ni ragag nge dalip ko bin ragag nge l’agruw e pul ni Adar. 13 Re bugithin ney e nog nib motochiyel minog ngak urngin e girdi’ nu lan gubin yang e pi nug, ni bochan e nge fal’eg e pi Jew rograd ni ngar filed biyan e pi to’ogor rorad e rofen nem. 14 Me yog fare pilung ngak e pi tayan u os ni ngar afgad nga daken e pi os rok ngranod ni kari mus machranginrad. Ngar wereged fare thin u lan yu Susa ni fare binaw ntochuch. 15 Me chuw Mordekai u tafen fare pilung nike yin’ madan e pilung nib ra’en mak’ef nge wech, nge ba wuru’ e mad nni ngongliy ko mad nrib fel’ nib purple, nge ba te’elyaw ko pilung nib gol ni rib fel’ ya’an. Min tolul mi ni garusnag e felfelan’ u lan e yu pa’ i kanawo’ u Susa. 16 Ya ke felan’ ma ke pagan’ e pi Jew, ka ra felfelan’gad ma ka ra thamiyed ni ngar gelgad. 17 Mu lan urngin e pi binaw nge pi yungi nug nnap’an ni yira be’eg fare thin nike yib rok e en pilung, me tabab e pi Jew ko madnom nge mur ni kar felan’gad. Ma aram me yo’or e girdi’ ko taliw rok e pi Jew e ngiyal’nem ni bochan e kar rusgad ngorad.

Esther 8 (YAPE)

In Other Versions