Exodus 19 (TOMA)

1 Alugi zaʋasiɛi ma, ti ɠula ʋoluma Ezipete yooi ʋa, Izilayɛle nuiti ti zeelini Sinayi teʋebai zu naama voloi. 2 Ti zeɠeni Lefidime, ti liini, ti zeeli Sinayi teʋebai zu, ti ʋuuni teʋebai zu. Izilayɛle ʋuuni miná, gizei ɠakalaʋɛ. 3 Moize lɛɛni GALA pɔ pelei, Ɠɔoɠɔ GALAGI tolini gizei unmaʋɛ, é ɠɛ ma: «Wɛlɛ, nii ɠa ɗa bo Zakɔɓe ná-pɛlɛyeɠei ma, è daazeeli Izilayɛle nuiti ma: 4 ‹Wa ɓɔɠɔgoi wo naa ɠaani, nii gè kɛɛni ga Ezipete nuiti, gè wo zeɠeni koɠɛ ɠoʋegiti su, gè ʋa ga woye pɔ̀ pelei. 5 Niizu, ni wa woilona gòoi ma, ni wa makɛna nà-minazeɠegi ma, wa ɠɛ ga nɔ̀nɔ ɠiteɠitegiti, nuɓusɛiti kpein saama. Anɛɛ ni eteai kpein ka ga nɔ̀nɔ, 6 wɔun wa, wa ɠɛ bɛ̀ ga zalaɠa ɠula zii, nii ɲadegai.› Wooiti kana ɗa ti wo Izilayɛle nuiti ma.» 7 Moize liini, é nuɓusɛiti ta-ɠɛwolaiti toli, é wooi nii kpein daani ti ʋɛ, eɠɛʋelei Ɠɔoɠɔ GALAGI devei veeni la zea. 8 Nuɓusɛiti kpein ti zolooni faa ɠila ma, ti ɠɛ ma: «Gá naa kpein kɛ, nii Ɠɔoɠɔ GALAGI bogai.» Moize nuɓusɛiti gooi laazeelini Ɠɔoɠɔ GALAGI ma. 9 Ɠɔoɠɔ GALAGI ɠɛni Moize ma: «Wɛlɛ, nà ʋaazu è ʋɔ tonaɓiin gaaɠiligi zu, naa ɠa a kɛ, siɛgi zu gè ɓɔɛzu la è ʋɔ, nuɓusɛiti ti mɛni, ti la è la ɠɔ.» Moize nuɓusɛiti gooi laazeelini Ɠɔoɠɔ GALAGI ma. 10 Ɠɔoɠɔ GALAGI ɠɛni Moize ma: «Li nuɓusɛiti pɔ bɛ, è ti ɲade za ta lina, ti ta-zeɠeiti gba. 11 Ti ɠɛʋele ɓɛtɛai ɠɛle foloi zaʋasiɛi ma, mazɔlɔɔ foloi zaʋasiɛi ma, Ɠɔoɠɔ GALAGI ɠa ʋaazu yeizu nuɓusɛiti kpein gaazu, Sinayi gizei ma. 12 Ɗa nuɓusɛiti kwɛsuʋɛ leʋe ba gizei maaɠoolii zu, è ɠɛ ma: ‹À dama, wo mina lɛ gizei ma, wo mina vɔɔɠu dakɔlɔgaʋɛ ʋa. Nu nɔpɛ a vɔɔɠuna gizei ʋa, ta naama nui ʋaa. 13 Nu la yeevɔɔɠua ba, kɛlɛ toɠa zɔɔ ga kɔtui, ɓaa ti bɔ ga mɛɛinti, é ɠɛni ga sua, ɓaa nu, é la yɛga vulua ɲɛgɛlɛin.› Siɛgi zu baala sinɛ minɛi ma ʋuʋugi a vɛɛna la, tanigaa ta lɛ gizei ma názu.» 14 Moize yeini nuɓusɛiti pɔ pelei, é zeɠe gizei ma, é nuɓusɛiti ɲadeni. Naati ti ta-zeɠeiti gbani. 15 É ɠɛni nuɓusɛiti ma: «À ɠɛʋele ɓɛtɛ folo saʋagɔ laawu. À mina maaɓuɠa anzanu ɠila kpalaa ba.» 16 Foloi zaʋasiɛi, ma zobui, tonai kpunɛni, mainmainti ti ɗa saɠa, ta tonaɓiin gaaɠiligai ɠɛni gizei ma, puʋu gooi wola ɠulani. Nuɓusɛiti kpein ti ɠɛni zeini ti-ʋuuzuʋɛ, ti tɔɔzeini ga sasuɓalii, dualuagi maaʋele ma. 17 Moize nuɓusɛiti kulani ti-ʋuuzuʋɛ, ti GALA daaɠomi. Ti liini, ti lo gizei ɠɔɠɔaʋɛ. 18 Sinayi gizei kpein ge ɠɛni ga duulu letele, tɔɔzei Ɠɔoɠɔ GALAGI yeini ná, abui zaama. Naama luului ɠɛni ɠulazu eɠɛ abuzulugi zu luului, gizei kpein ge ɠɛni ɓalizu ga zeeɠaaɓaai. 19 Puʋu gooi ɠɛni lɛɛzu, tugi ɗa zizi. Moize ɠɛni ɓɔɛzu, GALA ge ɠɛni gooɠaaʋotesu ga woo wola. 20 Zekana Ɠɔoɠɔ GALAGI yeini la Sinayi gizei ma, gize losaamaʋɛ. Moize lɛɛni ná. 21 Ɠɔoɠɔ GALAGI ɠɛni Moize ma: «Yei, è nuɓusɛiti kwɛteʋe, ta mina ɓudɛ, é ʋa ʋa Ɠɔoɠɔ GALAGI ʋɔ pelei, faazuɓɛɛwo faa ma, ma mɔinmɔin undaa mina ʋa ʋilisu ti zaama. 22 Zalaɠa ɠula nuiti ɓɔɠɔi ti maaɓuɠazu Ɠɔoɠɔ GALAGI ʋa, ti ɓɔɠɔ ɲade, Ɠɔoɠɔ GALAGI mina ʋa ta zeɠezu ti ʋa.» 23 Moize ɠɛni Ɠɔoɠɔ GALAGI ma: «Nuɓusɛiti ti la zooga ti ʋa lɛ Sinayi gizei ma, mazɔlɔɔ è gi lɛnɛgɛ ga gi kwɛgi la gizei maaɠoolii zu, maaɲɛɛi ʋɛɛ ba.» 24 Ɠɔoɠɔ GALAGI ɠɛni ma: «Li, è yei, ɗa lɛɛzu ʋolu wa Aalɔn. Kɛlɛ zalaɠa ɠula nuiti ta nuɓusɛiti ti mina ɓudɛ ɲɛgɛlɛin, ti ʋa lɛ Ɠɔoɠɔ GALAGI ʋɔ bɛ, nii a kɛ saa mina ʋa loozu ti zaama.» 25 Moize yeini nuɓusɛiti pɔ bɛ, é ɓɔɛ ti ʋɔ.

Exodus 19 (TOMA)

In Other Versions