Galatians 5 (TOMA)

1 Kilista ade unmɔɔga, ga de ɠɛ ga wɔɔlɔ ɠiteɠitegiti. Deɠɛmu à lo kpaan wɔɔlɔyai naa zu. À dama, wo mina mɔ ɠale ma wo ʋa lɔ tɔgi zo fai ma luɔla ɠasɔi wu. 2 À woilo! Nà Pɔle, nà bosu wo ma ga: Ni wa ɓɔɠɔ latina pɛlɛʋolu, Kilista la mɔ faa nɔpɛ paa wo ma názu. 3 Nà nii wosu, gè maaɓakpa mɔnɔ, zunu nɔpɛ é latisu pɛlɛʋolu, kɛni é Zuifuiti ta-lɔgi pɛ so, é ziɛ la. 4 Wɔi wo ɠaaɓaazu wo ɠɛ wo ɓɔɠɔ lɛ GALA gaazu ga telebo nu ga tɔgi zogai maaʋele, wo ɓɔɠɔ ɓeteʋea Kilista ʋa, wo ʋala GALA ná-zaalai ma. 5 Gɔnɔi, gá-ɠitogi ɠa ga gi ɠɛ ga telebo nuiti GALA gaazu, naa ɠa gi maaɓɔunsu ga Zɛnvu Ɲadegai ná-zɛbɛi maaʋele, é botii ɠɛɛzu ga gá-ɠidaaleʋei maaʋele. 6 Mazɔlɔɔ ni nu ɠiliʋɛ Yesu Kilista ʋa, tatipɛlɛʋolui ɓaa tatipɛlɛʋolulalai, naa tanɔpɛ ge la ga faa ɓii. Nii é ga faa ɓiigi, naa ɠa é ga kidaaleʋei, é botii ɠɛɛzu ga nɛɛbɛi maaʋele. 7 Wo ɠɛni ɓizɛzu ga pagɔ! Ɓɛ ɠa é pele leʋeai wo luɠɔ, ga wo mina ɠolo gaamai ʋɛ? 8 GALA nii é wo loligai, naa lɛi, niima unsu leʋe vai ʋa ɠula zea. 9 Eɠɛʋelei ta ɗa bo la ga: «Lɛʋɛi tago nɔ ɠa a ɗa ɓulu vukɔ ɠaayɔgai pɛ kpokolo.» 10 Maliɠii naama ladalai veeʋɛ zèa wa-vaa zu ga wo la kisiɛ ɠili boga. Kɛlɛ zɔi é wo ɓɔlɔzu, é ɠɛni ga nui ma zii nɔpɛ, GALA ka yeeʋozɛ ba. 11 Nɔ̀un nà, kɛ̀ɛleaiti, ni gaamazu gè ɠɛa dɛ tatipɛlɛʋolu vai laazeelizu, leeni vaa zu ta yɛ wɔ̀inzeɠezu nɔ ɠɔ? Naazu ma, wooi gè daazeelizu Kilista ná-faa zu, ga é ɓadɔni saa wului ma, naa la mɔ ɓena ɠɛ ga kɔɠɔziɠa zaɓu Zuifu nɔpɛ bɛ. 12 Wɔin ɠa mà ga zɔiti ti wo ɓɔlɔzu, ti ɓɔɠɔ zɛɛɠa! 13 Wɔun, kɛ̀ɛleaiti, GALA ge wo loligɛ ga wo ɠɛ ga wɔɔlɔiti. Kɛlɛ à mina wɔɔlɔyai naa ɠɛ ga zaɓui, wa ɠɛ eteai ziɛzu la ga kpusɛi yiimaiti. Kɛlɛ à ɓɔɠɔ ɠɛ ga botiɠɛ nui ɛsɛ pɛ bɛ ga nɛɛbɛi maaʋele. 14 Mazɔlɔɔ tɔgi pɛ daazeeliʋɛ woo ɠila kpe su: «È-zeiɲɔɠɔi nɛɛ ʋɛ, eɠɛ ɗa ɓɔɠɔi.» 15 Kɛlɛ ni wa ɓɔɠɔ maawanazu wo ɠilagilagiti, wo ɗa ɓɔɠɔ ʋali ga wo ɠilagilagiti, à dama, wo mina ɓɔɠɔ ɠoloɠolo. 16 Wɛlɛ deɠɛmu, nii gè bosu wo ma: À va bu, GALA Zɛnvui lo wo luɠɔ wa-eteai zu, wo la ziaa ga kpusɛi yiimaiti naazu. 17 Mazɔlɔɔ nii é ga kpusɛi yiimai, naa la nɛɛni Zɛnvu Ɲadegai ʋɛ. Nii é ga Zɛnvu Ɲadegai yiimai, naa la nɛɛni kpusɛi ʋɛ. Ta ɓɔɠɔ laalɔɠɔma, naa ɠa a kɛ, nii wo wɔinni wo kɛ, wo la zooga wo ʋa naa ɠɛ. 18 Kɛlɛ ni Zɛnvu Ɲadegai a lona wo luɠɔ, wo la mɔ tɔgi ná-zobogi wu. 19 Tama kpusɛi ɠɛɛwotiiti kulaʋɛ kɛlɛma, tiya ɠa ti ga niiti: koloɠologi, kɔzɔba vai, ɓaaɠulama vai, 20 kɔɔɠɔ gani kɔɔ vai, zoɠo vai, maayobalabɛ vai, kpɔɛ vai, tolo ɲɔi, ziiɠulagi, maaɠɔɔ fai, zeeɠaaɠwɛɛ vai, balima vaiti, 21 gaazuɠulapɔi, dɔɔzodai, ziimaɠɛɛ lateʋegai, ta naa ɠɛɠala vaiti. Nà wo lɛnɛsu niina, eɠɛʋelei gè boni la wo ma, zɔiti ti naama vaiti kɛɛzu, ti la GALA ná-masadai zɔlɔɔga. 22 Kɛlɛ Zɛnvu Ɲadegai ma waai ɠa é ga niiti: nɛɛbɛi, koozunɛɛi, ziilɛigi, ziilɔɔi, nuɓɔɠɔlai, nuʋagɔlai, wooɠɛɠiladai, 23 sɛsɛbogi, ɓɔɠɔzogi. Tɔ ge la niima vaiti daalɔɠɔma. 24 Zɔiti ti ga Yesu Kilista nɔnɔiti, naati ti ti-ɓusɛi ɓadɔa saa wului ma, naa ʋɛɛ ná-ɓɔɠɔyiimai ta ziima vai ʋa. 25 Ni ada zɛnvui wosu Zɛnvu Ɲadegai zaɓui zu, ade zɛ ná ɓalaa é lo ade-ziɛ ʋeleiti tuɠɔ. 26 Ade mina ɠɛ ga waso nu, ade mina ɗa ga ɓɔɠɔ yiiɠaawana vaiti kɛ, ɓaa de ʋa ɗa toloi ɠula ga ɓɔɠɔ.

Galatians 5 (TOMA)

In Other Versions