Haggai 2 (TOMA)
1 Masagi Daliyuse ná-masadai ma ɠona felesiɛi ma alugi lɔfelasiɛi ma volo ʋuufelegɔ maazu ɠilagi (21) ma, Ɠɔoɠɔ GALAGI laawooi laazeelini ga GALA goo wo nui Azé maaʋele, é ɠɛ ma: 2 «Nii ɠa ɗa bo Zuda you zɛʋɛ ɠundiɠii Zoloɓaɓɛle ma, Seyalitiyɛle ná-doun zunui, ta zalaɠa ɠula ɠundiɠi wolai Zozuwe ma, Yewosadake ná-doun zunui, ta nuɓusɛiti mɔtaiti pɛ ma, niiti ti ʋaani ti ɠula duɔlai zu, ɠɛ ti ma: 3 ‹Ɓɛ ɠa é wo zaama, é niima ƓALA sei ʋɛlɛi tɛi kaani ná-pada mɔungi zu? Wa pɛtɛsu ɠale niizu? É la mɔ wo ɠaazu ga ani nɔpɛ niizu, kɛlɛ? 4 Niizu, zɛbɛzeɠe, Zoloɓaɓɛle. Zɛbɛzeɠe, zalaɠa ɠula ɠundiɠi wolai Zozuwe, Yewosadake ná-doun zunui,› » Ɠɔoɠɔ GALAGI wooi ɠana. « ‹À zɛbɛzeɠe, wa ʋe, zooi zu nuɓusɛiti pɛ,› » Ɠɔoɠɔ GALAGI wooi ɠana. « ‹À ɓɔɠɔ ve botii ya, mazɔlɔɔ nà wo ʋa,› » Ɠɔoɠɔ GALAGI, Fai-Pɛ-Maliɠii wooi ɠana. 5 « ‹Gè naama minazeɠegi ɠɛɛni wo ʋɛ, siɛgi zu wo ɠulani la Ezipete yooi ʋa. Nà-Zɛnvui ɠa wo zaama, à mina lua ɲɛgɛlɛin!› 6 «Mazɔlɔɔ Ɠɔoɠɔ GALAGI, Fai-Pɛ-Maliɠii wooi ɠaa: ‹Naa ʋoluma mɔnɔ, su la mɔ ɠoozazu gè geeɠɔlɔgi ɓali ta zooi, ta kpoloɗɛi ta zooiti. 7 Nà zii ɠiligiti pɛ kɛɛzu unga wuulee, ta-naavoloiti pɛ ta ʋa ʋɛ, nà niima ƓALA sei ʋɛlɛi laave ga padai.› Ɠɔoɠɔ GALAGI, Fai-Pɛ-Maliɠii ɠa é boga. 8 ‹Walii kpein ka ga nɔ̀nɔ, zanugi kpein ka ga nɔ̀nɔ,› Ɠɔoɠɔ GALAGI, Fai-Pɛ-Maliɠii wooi ɠana. 9 ‹Naazu, niima ƓALA sei ʋɛlɛ niinɛi ɠa ʋa, é ɗa volo, é leʋe ma mɔungi ʋa.› Ɠɔoɠɔ GALAGI, Fai-Pɛ-Maliɠii ɠa é boga. ‹Nà ziilɛigi zei miná.› » Ɠɔoɠɔ GALAGI, Fai-Pɛ-Maliɠii wooi ɠana. 10 Masagi Daliyuse ná-masadai ma ɠona felesiɛi, ma alu taaʋuusiɛi ma volo ʋuufelegɔ maazu naanisiɛi (24) ma, Ɠɔoɠɔ GALAGI ɓɔɛni GALA goo wo nui Azé ʋɔ, é ɠɛ ma: 11 «Ɠɔoɠɔ GALAGI, Fai-Pɛ-Maliɠii wooi ɠaa: ‹Zalaɠa ɠula nuiti gaazaɠa, ti ɠi fe è ʋɛ niima vaiti su: 12 Ni zalaɠa zua ɲadegai ta a ɠɛna nui ta ná-seɠe la, seɠei naa a vɔɔɠuna ɓului ʋa, ɓaa ɠɔnɔgi ta, ɓaa dɔɔi, ɓaa gulɔi, ɓaa daamiani nɔpɛ nɔ, naama anii ɠa ɲade niina ɓaa?› » Zalaɠa ɠula nuiti ti gooɠaaʋoteni, ti ɠɛ ma: «Ɓa-o.» 13 Azé ti ɠaazaɠani mɔnɔ, é ɠɛ ti ma: «Ni nui ta a ɠɔzɔna, tɔɔzei é vɔɔɠuni nu ʋoomai ta ʋa, ni a vɔɔɠuna daamianigi tanɔpɛ ba, naa ɠa ɠɔzɔ niina ɓaa?» Zalaɠa ɠula nuiti ti gooɠaaʋoteni, ti ɠɛ ma: «Ungo, toɠa ɠɔzɔ.» 14 Názu ɠa Azé kpɔɛi zeɠeni la, é ɠɛ ti ma: «Deɠɛmu zekana niima nuɓusɛiti ti la, zekana zii nii la gàazu, zekana ta-woti zulɔnɔgi kpein ge la, nii ti feezu bɛ̀ ɠana, kɔzɔʋɛ,» Ɠɔoɠɔ GALAGI wooi ɠana. 15 «Niizu, à ɠida lɛɛ bu ga pagɔ, nii é ʋaazu ɠɛɛzu, é zo za ma, é li. Aisa wo ʋa kɔtuiti da ɓɔɠɔ maazu, Ɠɔoɠɔ GALAGI zei ʋɛlɛi lo fai zu, 16 leeni ɠa é ɠɛɛni ga woye? Ni nui ɠigi ɠana panisu ʋuufelegɔ (20) ʋa ná-kpalagi zu, puugɔi nɔ ɠa é sɔlɔɔsu ná. Ni nui ɠigi ɠana litɛlɛ ʋuulɔɔlugɔ (50) ʋa ná-dɔɔi ʋɔ bɛ, puufelegɔi (20) nɔ ɠa é sɔlɔɔsu ná. 17 Gè vɔɔɠuni wo ʋa, gè wa-wotiiti pɛ ma lɔnɔ fai ɠaaʋala ba, ga siinziin ganigiti ta-zeeɓɛiti, ta sakɔtuiti, kɛlɛ wo la zeɠeni yee ma, wo ʋa ʋa pɔ̀,» Ɠɔoɠɔ GALAGI wooi ɠana. 18 « ‹Za ɠa ga alugi laaʋuusiɛi ma volo ʋuufelegɔ maazu naanisiɛi (24), yeei Ɠɔoɠɔ GALAGI zei ʋɛlɛi lo fai lɔɔzeini la. Niizu, à ɠida lɛɛ bu ga pagɔ, nii é ʋaazu ɠɛɛzu, é zo za ma, é li. 19 Kɛbɛ ani zuwu nɔpɛ ge la mɔ wo ya kotaiti su, kɛlɛ? Leezɛn ɓelei, ta kooleɠoole guluiti, ta gelenade guluiti ta wolive wuluiti, tanɔpɛ ge la gwaa woni, ɲɛgɛlɛin. Kɛlɛ é zo za voloi ma, nà nà-tuyai zuwɔɔlɔzu wo ʋɛ.› » 20 Ma volo ná nɔ, alugi ma volo ʋuufelegɔ maazu naanigɔi (24) ma, Ɠɔoɠɔ GALAGI ɓɔɛni mɔnɔ Azé ʋɔ, ná zeizu velesiɛi zu, é ɠɛni ma: 21 «Ɓɔɛ Zoloɓaɓɛle ʋɔ, Zuda you zɛʋɛ ɠundiɠii, è ɠɛ ma: ‹Nà ʋaazu geeɠɔlɔgi ɲiikpisu ta zooi. 22 Nà ʋaazu masagiti tokasu, gè zii ɠiligiti ta-masadaiti ma zobogiti koloɠolo, gè kɔɔɠɔ wotoloiti daaʋɛ ta ti ɓizɛ nuiti, sooiti ta za, ti ɠɔma nuiti ti ɓɔɠɔ ʋa.› 23 Ɠɔoɠɔ GALAGI, Fai-Pɛ-Maliɠii wooi ɠaa: ‹Kɛlɛ naama volo ná, nà boti ɠalivaazu è ma, nà-botiɠɛ nui, Zoloɓaɓɛle, ɗɛi è ga Seyalitiyɛle ná-doun zunui,› » Ɠɔoɠɔ GALAGI wooi ɠana. « ‹Gè yiimazeɠea ga ɗe, gè è ɠɛ ga nà-balaɠaegi, nii nu ɠa ɗa poogi ɠɛ la.› » Ɠɔoɠɔ GALAGI, Fai-Pɛ-Maliɠii wooi ɠana.