Isaiah 41 (TOMA)

1 Ziɛ zaama yooiti ta kpoloɗɛi laaʋɛ yooiti,à maaɠɛ kpɔ tùɠɔ, wo gòoi mɛni!Nuɓusɛiti ti zɛbɛi niinɛ ʋolu, ti maaɓuɠa, ti ɓɔɛ.Ungo, ade li ʋɔɔma tukpɔlosuʋɛ. 2 Ɓɛ ɠa é naa wuzeɠea folo ɠulazu ʋele,zɔi telebodai ziɛzu kɔɠɔ ʋogi zu?Ɓɛ ɠa é ziiti dɔa zeezu,ta ɓɛ ɠa é masagiti gaayeiɗa?Ná-boɠa zɔkpɔi ɠa ti vukɔzu eɠɛ fufiligi,ná-mɛɛin ɗa ti zuvaza eɠɛ molo ɓooloi,fiilɛi seɠezu, é ɗa lii la. 3 Toɠa ti ɓɛɛzu, é li ɠoozama, faa la ba,é ɗa li ga pelei nii é la dɛ ziɛni la ɠila. 4 Ɓɛ ɠa é vaazu bu pɛ fai niiti ti ʋa ɗa ɠɛ?Naa ʋe, nii é yeeɠɛɠalai ɠilagilagi zu nuiti tolisu,kaite tɔɔzeizu mɔunpa.«Nà ʋe, Ɠɔoɠɔ GALAGI, nɛ̀i gè ga ma mɔungi,ta gè ma ɠaaɓelagiti ba, ungo, nà ɓɔɠɔɓɔɠɔgi ʋe. 5 Ziɛ zaama yooiti nuɓusɛiti ta kpoloɗɛi laaʋɛ yooiti su geleiti ti kaani, ti lua,nuiti ti zeini zou ɓela ga, ti tɔɔzeini ga sasuɓali,ti ɗa maaɓuɠa, ti ɗa ʋa. 6 Ti ɗa ɓɔ ɓɔɠɔ ʋa,ɛsɛ ge ɗa ɠɛ kɛɛɠɛloin ma: ‹Yiilɔɔ!› 7 Ɲɛɛliɠi nui ɗa zanu kpɛtɛ nui iɲɔdɔ.Zɔi é suɓilisu ga malitoi,naa ɗa iɲɔdɔ, nii é doɠazu kɔtui ma.Ta kpatana ɓɔɠɔ ʋa, ti ɠɛ ma:‹Boti ʋagɔi ɠa kɛai.›É kɔɔɠɔ ganigi ɓakpani ga kɔlu ɠaazoɓagiti, a ʋa ɲiikpi. 8 Ɗɔun ɗa, Izilayɛle, nà-botiɠɛ nui,Zakɔɓe, ɗɛi gè yiimazeɠeai ga ɗe,bɔ̀ɔlai Abalaame mavofodai, 9 ɗɛi dìai, gè è ɠaiziɛ zou ɓela ga,gè è loli, è zeɠe ɠoozamaʋɛti,ɗɛi gè ɠɛni è ma:‹Ɓa-o, gè la è ʋilini ya,tɔun gè yiimazeɠeni ga ɗe,nà-botiɠɛ nui ɠa ga ɗe,› 10 maaɠili mina ɠɛ è ma, mazɔlɔɔ nà è ʋa.Mina yiizoolɛ, mazɔlɔɔ nà ga ɗa-ƓALAGI.Nà è zɛbɛlɔɔzu, nà ná ga gè ɓɔ è ʋa,nà è maalobo ga nà-zɛbɛsu yeei, é zobogi zɔlɔɔsu. 11 Wɛlɛ, zɔiti kpein ti è laalɔɠɔma,ta unfe, ɓaaɠula ti ma.È-ɓɔɛɲɔɠɔiti ta ɠoloɠolo, ti ɲɛɛlɛ. 12 Ɗa ɓɔlɔ ga ti ɠaiziɛ, è la mɔ ti ɠaa,niiti ti ɠɛa kpɔɛi ʋɛɛzu è ʋa,ti ɗa laalɛ è wu.Ti pɛ ta ɠoloɠolo, ti la ɠɛa ga ani nɔpɛ. 13 Mazɔlɔɔ nà ga Ɠɔoɠɔ GALAGI, ɗa-ƓALAGI,é è zosu è-yeei ʋa,é ɠɛɛzu è ma: ‹Maaɠili mina ɠɛ è ma,nà ná ga gè ɓɔ è ʋa.› 14 Izilayɛle, Zakɔɓe ná-nuɓusɛiti,maaɠili mina ɠɛ wo ma,wɔiti wo levezu kpeinɲaɠagi,wɔiti wo lɛɛvɛzu eɠɛ kpeinɲaɠagi.Nà ɓɔɠɔi ɠa gè ʋaazu ɗa-ɓɔba vai ma,zɔi é ga è Unmɔɔ Nui,Izilayɛle ná-GALA Ɲadegai,»Ɠɔoɠɔ GALAGI wooi ɠana. 15 «Wɛlɛ, nà è ɠɛɛzu ga kaʋa loɠa wulu zɛpɛ niinɛi,kɔlu ɠaazoɓagiti ti ba.Ɗa gizeiti golowolo, è ti ʋali ga,è gize goiti so eɠɛ molo ɓooloi. 16 Ɗa ti ɠaavɛ, fiilɛi li ga tiye,tɔngɔlɔ fiilɛi ti zuvaza.Kɛlɛ ɗɔun ɗa, ɗa ɠoozunɛ Ɠɔoɠɔ GALAGI ɠoba,è ɓɔɠɔ maamusɛ ga Izilayɛle ná-GALA Ɲadegai ná-fai.» 17 «Maanɔɠɔ nuiti ta bala nuiti ta ziɛi ɠaiziɛzu,é la zɔlɔɔsu pɛ.Kpɔɔle wɔin ti-nɛgi vɔa.Kɛlɛ nà, Ɠɔoɠɔ GALAGI, nà ti wooɠaaʋote,nà, Izilayɛle ná-GALAGI, gè la ɠɛlɛa ti ʋa pɛ. 18 Nà ziɛ wolaiti da gize unmaʋɛti, niiti gulu la ti ma,gè ziɛungiti da nɛmɛiti su,gè teʋebai valibo ga kpoigi, ziɛi daavegai,zou vɔɔi zu ɠɛ ga ziɛ yeizuʋɛ. 19 Nà sɛdelegi ta akasiai ta milɛtegi wuluitita wolive wuluiti sin teʋebai zu.Adaʋɛti ziɛ la ná,nà sipɛlɛ gului ta sapɛingi ta buisegiti pilɛ miná, 20 naa ɠa a kɛ ɛsɛ pɛ ge ka, ti kwɛɛ,ti ɠida bu, ti gaaɠa,ga Ɠɔoɠɔ GALAGI yeei ɠa é naa pɛ kɛai,Izilayɛle ná-GALA Ɲadegai ɠa é ga ti pɛ Kpɛtɛ Nui.» 21 «Wa ʋe, zii ɠiligiti ta-ɠalagiti, à wa-vaiti dɛɛ,»Ɠɔoɠɔ GALAGI ɠa é boga,«à wa-woozuɠulagiti dɛɛ lɛɛ,Zakɔɓe ná-masagi ɠɛ naa. 22 À maaɓuɠa, wo naa zuɠula gi ma, nii é leʋesu.Faa mɔungiti ti ɠɛɛni, naati ti ɠɛni ga ɓɛgeleni?À bo dɛɛ, gá ɠigaiziɛ su.Ɓaa mu nii é ʋaazu ɠɛɛzu ná luɠɔi zu,wo naa lɛ ga giye, gi ɠɛ kwɛɛ. 23 À faiti dɛɛ lɛɛ ga giye,ti ʋaazu ɠɛɛzu ná luɠɔi zu,gá kwɛɛ naazu ni gaamazu wa ga galagiti.À faa ʋagɔ go nɔ ɠɛ lɛɛ, ɓaa ma ɲɔu go,ga gi ɠaazuzeɠe ma, gi ɠɛ ga ma zeeleiti. 24 Kɛlɛ wɛlɛ, naa ɲaka vizɔgɛ wo ʋa,faa ɲaka nɔ ɠa wo kɛɛzu.Nu a yiimazeɠena ga woye,ga wo ɠɛ ga galagiti,toɠa ɠɛ ga ɓaaɠulama vaa nɔ. 25 «Munu, lɛkpɛmaʋɛ nu ɠɔʋɛzuʋɛ,gè zunu ɠila pilɛgɛ pelei ma,wɛlɛ toɠa nuu é ʋaazu.Munu, folo ɠulazu ʋelei, toɠa dàaseigi maalolisu,toɠa kundiɠiiti gaayɔsu,eɠɛʋelei nu a ɗa palaʋalai ɠaayɔ da,ɓaa eɠɛʋelei pɔlɔ liɠi lo nui a ɗa ɠɔɠɔlo da pɔlɔi zu. 26 Ɓɛ ɠa deɠɛmu é niima vai woni,kaite ma yeeluɠɔ, gi ʋa suɠwɛɛ?Ɓɛ ɠa é boni ma yeeluɠɔ,gá ʋa ɠɛ ma: ‹Gaamai ɠɛni zea›?Koleʋɛ ga wo zaama,nu nɔpɛ ge la ɠɛni zooni naa la,nu la tanɔpɛ mɛnini wo la, wo ʋa bo. 27 Nà ɠa mɔunpa, gè daazeeli Siyɔn,gè nu leʋe Zeluzalɛme, é li ga woo niinɛ ʋagɔi. 28 Gè wɛlɛni galagiti naati saama,gè la gila kpalaa kaani,é ʋa ɠɛ ga tɛnɛbo nu ɠila kpalaa.Ni nà ti ɠaazaɠana,ti la gooɠaaʋote nɔpɛ fea. 29 Ti pɛ ti la ga ani nɔpɛ,nii ti kɛɛzu, naa ɠa nɔ ga wafuungi.Ta-maaniinigiti ta nɔ ga fiilɛi ta faa ɲakai.»

Isaiah 41 (TOMA)

In Other Versions