James 3 (TOMA)

1 Kɛ̀ɛleaiti, wo ma mɔinmɔin ge mina ɠɛ ga kalamɔn, mazɔlɔɔ wo suɠwɛɛ ga gɛiti gi ga kalamɔinti, gá-lukpɔɠaaleʋei ɠa ɓaa gola. 2 Ade pɛ da ɗa ɠaka fai ma zii mɔinmɔin su. Zɔi é la ɠakasu pɛ kpɔɛzuɠulaiti su, naa ɠa é ga zunui daazeeliai fai pɛ su, a zoo é ziɛ kpusɛi wu, é ɓɔɠɔ zo fai pɛ su. 3 Da kɔlu ɓuɠai lɔɔzu sooiti daaʋɛ ga ti ɠolo de ʋɛ, da vɔnisu ɠana ti-ɓusɛi kpein ma. 4 Ɠigaiziɛ lɛɛ ɓato wolaiti su. Anɛɛ ni ti wɔɔlɔʋɛ gola, fiilɛ wolai ɗa ti laaʋili, ɓato laalati kɔlu goi ɠa ɗa ti laalati, ti li ga dii nui yiima ʋelei. 5 Zekana é la, nu nɛgi ɠa ga kpusɛi ʋaalobazu goi, kɛlɛ toɠa zoo é ɓɔɠɔ waso ga faa wolaiti.Ɠigaiziɛ lɛɛ ɓalaa, ʋelei abu goi a ɗa so da dɔɓɔ wolai ʋa, é ná pɛ gala! 6 Nu nɛgi ɓalaagi ɠa ga abui. Telebotala eteai ʋe. De-ɓusɛ ʋaalobazuʋɛ ta ʋe, tɔ ɠa a ɗa kpusɛi pɛ kɔzɔ. Tɔ ɠa a ɗa undaaʋiligi ma abui ʋili da-eteai zu vaiti pɛ ba. 7 Mazɔlɔɔ, dɔɓɔ zuai ma zii pɛ, ta wɔniiti, naa ʋɛɛ kpokpo ganiiti, ta kpoloɗɛi wu aniiti pɛ ba, nuɓusɛi ɠa zoo é ti maaɠolo. Tama nuɓusɛi ɠa ɗa naa ɠɛ pɔlɔma. 8 Kɛlɛ nu nɔpɛ ge la zooga é ʋa nɛgi maaɠolo. Toɠa ga faa ɲɔi, nu la zooga da, yeenɔpɛ daavegɛ ga nu ʋaa ani wanai. 9 Tɔ ɠa da ɗa de-Maliɠii de-Ɠɛɛ GALA maamusɛ la, tɔnɔ ɠa ɓalaa da ɗa nuɓusɛiti koto la, niiti ti ɓɛtɛai GALA maaniinigi zu. 10 Maamusɛ wooiti ta koto loo wooiti ti ɗa ɠula daa ɠilagi. Kɛ̀ɛleaiti, maa la nɛɛni, é ʋa ɠɛ ɠana. 11 Ziɛun gilagi ɠa zoo é ziɛ ʋagɔi ta ziɛ ɲɔi ɠula ada ɠilagi ɓaa? 12 Kɛ̀ɛleaiti, kooleɠoole gului ɠa zoo é wolive wului ma waai wo ɓaa? Ɓaa dɔɔɓɔi ansaɠɔ tɔkulugi ɠa zoo é kooleɠoole gului ma waai wo ɓaa? Ɓa-o! Ziɛun gilagi nii kpoloi ma ɗɛi ʋa, naa la zooga ziɛ ʋagɔi ɠulazu ada ɠilagi miná nɔ. 13 Ɠima nui ta keleɠele nui ɓɛ ɠa é wo zaama? É dɛɛ lɛɛ ga kɛɛwoti ʋagɔi, ti ɠɛɛzu ga sɛsɛbogi ta ɠimalai. 14 Kɛlɛ ni tolo ɲɔi ɠa wo-yiimaʋɛ, ta maaɠɔɔ fai, à mina waso, wo ʋa zɛɛi wo ga wo ɠɛlɛ vai gaamai ʋa. 15 Naama ɠimalai ma zii laade, é ʋa ʋa, é zeɠe geezuʋɛ. Kɛlɛ naa ɠa ga eteai nɔnɔi. GALA zɛnvui lɛi, é ʋa ɠɛ naa veezu, kɛni inɛgi. 16 Mazɔlɔɔ ʋɛ nɔpɛ tolo ɲɔi ta maaɠɔɔ fai ná, faazupui ta faa ɲɔi ma zii pɛ ka é miná. 17 Ɠimalai paai, é zeɠe geezuʋɛ, mɔunpa ɲadegɛ, naa ʋolu ziilɛigi nɛɛʋɛ bɛ, ná-fai ɠaanɛ, kɛʋele ɓɛtɛʋɛ ga é woilo zɔiti goo ma, daavegɛ ga gaazumaawɔinɠai, toɠa ɗa kɛɛwoti ʋagɔiti kɛ, é la zeelɔzɔɠɔzu ɠɛa, wooveleda la su. 18 Zɔiti ti botii ɠɛɛzu ziilɛi fai ma, nii ti fazasu ziilɛigi zu, ma zuwui ma waai ɠa ɠɛ ga telebodai.

James 3 (TOMA)

In Other Versions