Job 19 (TOMA)

1 Zɔɓe gooɠaaʋoteni, é ɠɛ ma: 2 «Wa yɛsu kpɔ̀lɔzu eyɛsu yeelɛ?Ungo, wa yɛsu kpɔ̀lɔzu ga wa-ɓɔɛiti eyɛsu yeelɛ? 3 Ná zeizu ɠɛa puu, wo ɗa kìgi zupu!Wo la unfesu ga kpɔ̀lɔ vai? 4 Ni kàkagɛ, nà-kaka fai ma ɠasɔi ɠa la ùnma. 5 Ni wɔun wa kaana ga wo vizɔgɛ bà,ni wa ɠɛna zeliloga mà nà-unfe fai zu, 6 à suɠwɛɛ ga GALA ka é tòsuʋɛ ɠoloɠologai,é ná-tumɔi lo màaɠoolii zu. 7 Ni nà kpee loona suɲɔu vai laalɔɠɔma, nu nɔpɛ ge la gòoɠaaʋotesu.Ni nà kpɔbai maalolina, telebo faa la ɠɛɛzu. 8 GALA ge pelei leʋeni tùɠɔ, gè la zooni gè ʋa leʋe.É kpidii ʋɛɛni nà-peleiti su. 9 É ɓaazeɠeni mà,é nà-lɛbiya wɔɔlɔgi ɠula ùnba. 10 É tòka mini-o-mini, ta nà ga li.É nà-kitogi lɔɔɠula eɠɛ gului. 11 Ná-ziiɠaawanai lokoleʋeni dàalɔɠɔma.É dèveni eɠɛ sili nui ta. 12 Ná-kɔɔɓɔgiti pilɛgɛ pelei ma ʋɔɔma,ti ʋaa pɔ̀, ti ta-ʋelei laani,ti ti-zeizuʋɛ ʋu sèizuʋɛ maaɠoolii zu. 13 «É nà-nu ɓɔɔɓɔgiti maaɠoozani bà.Kwɛ̀ɛ nuiti ti vazani, ti maaɠooza bà. 14 Nà-nu ɓɔɔɓɔgiti ti ɠɛlɛni bà,nɛ̀ɛɲɔɠɔiti ti ɠɛlɛni bà. 15 Nà-pɛlɛ wu nuiti ta nà-botiɠɛ anzanuiti ɓɔɠɔi,ta kɛɛzu eɠɛ nà ɠɛ ga wɛɛn.Kɛ̀ɛʋɛ ti ɠaazu, eɠɛ nii nu la kwɛɛ. 16 Nà nà-botiɠɛ zunui lolisu, é la gòoɠaaʋotega,anɛɛ ni nà maanɛɛnɛzu. 17 Dàaʋɛ makugi ɠa ɠulazu ànzai ɓɔɠɔi zokpai zu.Wɔ̀inzeɠea kòozu lointi ma. 18 Anɛɛ doungoiti ti ɠɛlɛa bà.Siɛgi zu gè pɔ gè wuzeɠe la, ta ɲɛɛɠulazu sù. 19 Bɔ̀ɔlaiti kpein ta luazu bà.Niiti gè ti nɛɛni ʋɛ gola, naati ti ʋoluavega bà. 20 Gè vɔa ɠae ma,ta gè ʋalaga anii pɛ ma. 21 À màawɔinɠa, à màawɔinɠa, wɔiti wo ga bɔ̀ɔlaiti!Mazɔlɔɔ GALA zeei ɠa é dòɠani. 22 Leeni vaa zu wo ʋilɛsu pòlu, eɠɛʋelei GALA ge ʋilɛsu da pòlu?Wo la dɛ ɓɔlɔni ɓaa ga kpùsɛi ɓɔlɔ vai? 23 «Ee, ni nui ta ɠa dàawooiti sɛʋɛ!Ni nui ta ɠa yeeʋozɛ ti ʋa, ti zɛʋɛ sɛʋɛi zu! 24 Ti zoo ti kɔlu ɠaazoɓagi zeɠe, ti sɛʋɛ la fasai ma,ti kena kpui ziɛ su, sulɛi, é yɛ ná eyɛsu ɠɔ! 25 Gè kwɛɛ gè ɠɛ ùnmɔɔ nui ɠa vulua,tɔ ɠa é wuzeɠezu ga gaaɓelagi eteai zu. 26 Niima ɓusɛi ɠoloɠologa ʋoluma,nà ɠɛ kpùsɛi zu, gè GALA ka. 27 Nà ka nà ɓɔɠɔi ga gàazuʋɛ.Nà ka ga gàazuʋɛ, nu ɠili nɔnɔ laade.Ee! Zìi ɠa ɠalazu kòozu ga maaɓɔungi naa wo fai. 28 Wa ɓɔɠɔ ɠaazaɠasu ga, gá ʋilɛ polu ɠale?Goozuɠulagi ɓɛgele ɠa ada tukpɔ la? 29 À lua boɠa zɔkpɔi ʋa,mazɔlɔɔ maaɠoloi ɲɔu ʋe, nii é ɠɛɛzu ga boɠa zɔkpɔi,naa ɠa a kɛ wo suɠwɛɛ ga tukpɔɠaaleʋei ɠa ná!»

Job 19 (TOMA)

In Other Versions