Job 29 (TOMA)

1 Zɔɓe ɓɔɠɔ liini ga luɠɔ ná-kpɔɛzuɠulai zu, é ɠɛ ma: 2 «Ee, wɔ̀inʋɛ ga gè ɓɔɠɔ ɠa nà-kɛʋele wɔlɔmai zu,siɛgi zu GALA ge ɠɛni ɓaazu la màazu, gè ɗa nà-eteai ziɛ, 3 siɛgi zu ná-sɔmɔgi ɠɛni volozu la màazu,ná-wozakalagi ɠɛni ɓɔsu bà, gè ɗa kpidii zuziɛ, 4 eɠɛʋelei gè ɠɛni la mɔungi sɛ̀bɛi pɛ gaavɔnigai sù,siɛgi zu GALA ge ɠɛni la ga nà-pɛlɛyeɠei nɛɛɲɔɠɔi, 5 siɛgi zu Zɛbɛi-Pɛ-Maliɠii ɠɛni bà la dɛ.Naama ziɛgi zu, dòun zunuiti pɛ ti ɠɛni ɠɛɛzu màaɠoolii zu. 6 Naama ziɛgi zu, gè ɠɛni lasesu undaanɛɛi zu,gulɔ ɓoigi ɠɛni yeizu nà-gulɔ ɓɛtɛzuʋɛ. 7 «Nà la ɠɛna ɠulaa, gè ʋa li taa ziɠidaʋɛ,siɛgi zu gè ɠɛni liizu la, gè seizuʋɛ ɓɛtɛ maaɓɔ bosuʋɛ, 8 nu niinɛiti ta la kàana, ti ɓena ʋoluazo,kɛwola wɔlɔiti ti wuzeɠe, ti lo. 9 Kundiɠiiti ti ɓena kpɔɛzuɠulai yɛ ná,ti yeeʋɛɛ la, ti maaɠɛ kpɔ. 10 Nu wolaiti ti ɠɛni maaɠɛsu kpɔ,ti-nɛgi ɠata ti-laaɠoozuʋɛ ʋa. 11 «Zɔi a la gòoi mɛnina, naa ɠɛni ɠɛɛzu mà, undaanɛ nui.Zɔi a la kàana, naa ɓena li, é nà-faa ʋagɔi wo. 12 Gè ɠɛni maanɔɠɔ nuiti kulazu, niiti ti ɠɛni kpɔbai ɠaiziɛzu,ta podoin ɓalaa, nii é la ɠɛni kpɔba zɔlɔɔsu. 13 Niiti ta la ɠɛ saa yeɠei la, naati ti ɠɛni tuya loozu bɛ̀.Gè ɠɛni poanzaiti koozunɛɛzu. 14 Telebodai ɠa é ɠɛni kɔ̀ba ga seɠei,faa zɔle fai ɠɛ kɔ̀ba ga seɠeungi, ta bɔɔlɔgi ùnba. 15 Gè ɠɛni ga gaazuɠole nuiti gaazuɠɛzɛi,ta kɔɠɔ ɠoloɠolo nuiti kɔɠɔi. 16 Gè ɠɛni ga bala nuiti ti-ɠɛɛ,gè ɠɛni wɛɛinti maavaiti gaaɠulazu ba. 17 Gè ɠɛni nu ɲɔi ɓalɔɠaeiti galeɠalezu,gè daamianigi ɠula ɲiigaiti ga. 18 «Gè ɠɛni ɠɛɛzu ma naazu:‹Nà zaazu mà laɠagi zu,sìi ma voloi ɠa mɔinzu eɠɛ ɲaɠaegi. 19 Gè ɠɛa eɠɛ gulu wolai, kɔɠɔi ziɛi wu,kpidii nɔɗagi ɠa yeizu, é ɗa ʋu mà ɓekegiti ga. 20 Nà tɔɠɔɠula niinɛ zɔlɔɔ ʋolu,ta zɛbɛ niinɛi, eɠɛ mɛɛin maalegai.› 21 «Naama ziɛgi zu, ti ɠɛni wòilosu, ti ɗa maaɓɔun,ti ɗa maaɠɛ kpɔ, ga ti woilo nà-tɛnɛ gooiti ma. 22 Nà la ɓena ga ɓɔɛ, nu la ɠɛni maaɠaalia,dàawooi ɠɛni ʋilɛsu ti pɛ ma, pein, pein. 23 Ti ɠɛni màaɓɔunsu, eɠɛʋelei nu a ɗa tonai maaɓɔun da.Ti-ɠigi loni bà, eɠɛʋelei a ɗa ɠɛ la foɠo lonai ʋa. 24 Gè ɠɛni ɲɛɛzu ti ʋɔ, kɛlɛ ti la ɠɛni laani da,gàazuʋɛ ná ɠɛni volozu, ti la ɓena zoo ti ʋa naama voloi ɠaaʋa. 25 Gè ɠɛni ti untuɠɔ, gè ɗa pelei lɛ ga tiye,gè ɠɛ ti zaama eɠɛ masagi nii é ná-salaʋusu ɓulugiti saama,eɠɛ nui nii é iɲɔteʋe nuiti gaanɛɛnɛzu.»

Job 29 (TOMA)

In Other Versions