Leviticus 9 (TOMA)

1 Foloi lɔsaʋasiɛi ma, Moize Aalɔn ta ná-doun zunuiti tolini, ta Izilayɛle ɠɛwolaiti, 2 é ɠɛ Aalɔn ma: «Nikɛ yiʋo zinɛ ɠila seɠe koto gba zalaɠa vai zu, ta baala sinɛ ɠila gala zalaɠa vai zu, nɛɛʋuzu mina ɠɛ tanɔpɛ ba, è ti lo Ɠɔoɠɔ GALAGI ɠaazu. 3 Ɗa ɓɔɛ Izilayɛle nuiti pɔ, è ɠɛ ti ma: ‹À boli zinɛ ɠila seɠe koto gba zalaɠai vaa zu, ta nikɛ yiʋo ɠila, ta baala ziʋo ɠila, kona gila keleiti, nɛɛʋuzu mina ɠɛ ti ʋa, gala zalaɠai vaa zu, 4 ta nikɛ zinɛ ɠila, ta baala sinɛ ɠila ziilɛi zalaɠai vaa zu, naa ɠa a kɛ, ti ɠula ga zalaɠai Ɠɔoɠɔ GALAGI ɠaazu, ta vebɛ zalaɠai, nii é ga ani vukɔi, gaayɔgai ga gulɔi. Mazɔlɔɔ za Ɠɔoɠɔ GALAGI ɠa ɠulazu kɛlɛma wo ʋɛ.› » 5 Nii Moize deveni, ti ʋaani ga naa GALA daaɠomi seɠe ʋɛlɛi laaʋɛ. Bɛbɛi kpein ge maaɓuɠani ná ʋa, ti lo Ɠɔoɠɔ GALAGI ɠaazu. 6 Moize ɠɛni ma: «Wa naa ɠɛ, nii Ɠɔoɠɔ GALAGI deveai, Ɠɔoɠɔ GALAGI ná-lɛbiyai ɠa ʋaazu ɠulazu kɛlɛma wo ʋɛ.» 7 Moize ɠɛni Aalɔn ma: «Maaɓuɠa zalaɠa ɠulazuʋɛ ʋa. Ɗa-ɠotoi gba zalaɠai ɠula, ta ɗa-ɠala zalaɠai, è koto gba vai ɠɛ ɓɔɠɔ ʋɛ, ta nuɓusɛiti bɛ. Nuɓusɛiti ta-vebɛanii ɠula, è koto gba vai ɠɛ ti ʋɛ, eɠɛʋelei Ɠɔoɠɔ GALAGI deveni la.» 8 Aalɔn maaɓuɠani zalaɠa ɠulazuʋɛ ʋa, é nikɛ yiʋoi ɠɔdaaleʋe tɔ ɓɔɠɔi ná-kotoi gba vai zu. 9 Aalɔn ná-doun zunuiti ti ɲamai veeni zea. É yeeɓeɠai lɔɔni ɲamai wu, é ta ziɛ zalaɠa ɠulazuʋɛ ma minɛiti ma. É ɲamai mɔtai ʋuuni ya zalaɠa ɠulazuʋɛ ɠɔɠɔaʋɛ. 10 É ma wulɔi ɠalani zalaɠa ɠulazuʋɛ, ta ma lɔɠɔiti, ta koto gba zalaɠa zuai ma mɔɔin ʋasuʋɛ, eɠɛʋelei Ɠɔoɠɔ GALAGI ma levei veeni la Moize ya. 11 Kɛlɛ é ma zuai ta ma ɠɔlɔgi ɠalani abui ɠa, ti-ʋuuzuʋɛ ʋoluʋɛ. 12 Aalɔn gala zalaɠa loganii ɠɔdaaleʋeni. Ná-doun zunuiti ti ɲamai veeni zea, é pili zalaɠa ɠulazuʋɛ ma, é ɠaku ma kpoloo. 13 Ti gala zalaɠai veeni zea, teʋeleʋeai, é ɓulukpulu, é ʋɛɛ ma ungi ʋa, é ti ɠala zalaɠa ɠulazuʋɛ. 14 É koozu zɔɔlaiti ta kɔɠɔiti gbani, é ti ɠala zalaɠa ɠulazuʋɛ, gala zalaɠai maazu. 15 Naa ʋolu, é nuɓusɛiti ta-zalaɠai ɠulani. É boli zinɛi zeɠeni nuɓusɛiti ta-ɠoto gba zalaɠai, é kɔdaaleʋe, é kula koto gba vai zu, eɠɛʋelei zalaɠa zua mɔungi ɠɛni la. 16 É gala zalaɠai ɠulani, eɠɛʋelei deveai la tɔgi zu. 17 É vebɛ zalaɠai ɠulani, é zeeɲɛ gila seɠe su, é naa ɠala zalaɠa ɠulazuʋɛ. Naa la ɓɔni gala zalaɠai ʋa, nii kulaai sobui. 18 É nikɛ zinɛi ɠɔdaaleʋeni, ta baala sinɛi ga ziilɛi zalaɠai, nuɓusɛiti faa zu. Aalɔn ná-doun zunuiti ti ɲamai veeni zea, é pili zalaɠa ɠulazuʋɛ ma, é ɠaku ma kpoloo. 19 Ti nikɛ zinɛi ta baala sinɛi ma wulɔi veeni zea: ma wɔɔngi, ta ma wulɔi é koozu zɔɔlaiti maavelevelegai, ta ma lɔɠɔiti, ta ma mɔɔin ʋasuʋɛ. 20 Ti ma wulɔiti puuni ma ɠekegiti su, é ma wulɔi ɠala zalaɠa ɠulazuʋɛ. 21 Aalɔn ma ɠekegiti ta zeezazu ɓalai zeɠeni, é ti latɛɠɛ vai ma ʋoogi ɠɛ Ɠɔoɠɔ GALAGI ɠaazu, eɠɛʋelei Moize ma levei veeni la. 22 Aalɔn yeeiti tɛɛni geezu nuɓusɛiti pɔ pelei, é tuya loo ti ʋɛ. Kpegai ma ga koto gba zalaɠai ɠula, ta gala zalaɠai, naa ʋɛɛ ziilɛi zalaɠai ʋa, é zeɠeni zalaɠa ɠulazuʋɛ, é yei. 23 Moize ta Aalɔn ti lɛɛni GALA daaɠomi seɠe ʋɛlɛi wu. Siɛgi zu ti ɠulani la ná, ti tuya looni nuɓusɛiti bɛ. Ɠɔoɠɔ GALAGI ná-lɛbiyai ɠulani kɛlɛma nuɓusɛiti kpein bɛ. 24 Abui ɠulani Ɠɔoɠɔ GALAGI ʋɔ bɛ, é gala zalaɠai ɠala, ta ma wulɔiti, niiti ti ɠɛni zalaɠa ɠulazuʋɛ. Nuɓusɛiti kpein ti kaani. Ti kpeeiti tooni ga koozunɛɛi, ti nɔkɔ.

Leviticus 9 (TOMA)

In Other Versions