Luke 21 (TOMA)
1 Yesu ɠaazuwuzeɠeni, é naavolo nuiti ka, ti ɗa ta-vebɛaniiti dɔ GALA kɔɔ aniɲakai zu. 2 É wɛlɛni ɓalaa, é poanzai gila ka, nii é ɠɛni ga bala nui, é ɗa wali ɠae go felegɔ lɔ su. 3 É ɠɛni ma: «Gè bo wo ma ga gaamai, poanzai tɛi é ga bala nui, é feeʋɛ é leʋe ɛsɛ pɛ ba. 4 Mazɔlɔɔ zɔiti ti waliiti feeʋɛ, nii ti ɓɛdɛ la ɠɛa ba. Kɛlɛ tɔun, anɛɛ balagɛ, é kɔnɔgi pɛ feeʋɛ.» 5 Nui tanigaa ti ɠɛni GALA sei ʋɛlɛi ʋa pelei zuɠulazu, ʋelei maaɠiliai la ga kɔtu ʋapagiti, ta ani ʋapagiti niiti nuiti ti ʋaazu la ga vebɛaniiti. Yesu ɠɛni ti ma: 6 «Foloi tanigaa ta ʋaazu, nii ɠani wo kaazu, kɔtu ɠila kpalaa ge la yɛga laani bɔɔla maazu, ti pɛ ta lokasu.» 7 Ti gaazaɠani, ti ɠɛ ma: «Kalamɔn, yeelɛ ɠa naama vai ʋaazu ɠɛɛzu la? Naa ʋoluma poogi ma ɓɛgele ɠa nu a kwɛɛ da ga naama vaiti ta ga ʋa ɠɛɛzu?» 8 É ti wooɠaaʋoteni, é ɠɛ ti ma: «À dama, nu nɔpɛ ge mina wo ɠaka. Tɔɔzei nu mɔinmɔin ka kpɛtɛ ɠisu ga ti ʋa dàaseigi zu, ti ɗa ɠɛ ma: ‹Nà ɠa gè ga Kilista,› ta ‹Yeeɠɛɠalai zeelia!› À mina ʋilɛ ti ʋolu. 9 Siɛgi zu wo kɔɔiti maawoo mɛnisu da, ta faa wuuleegiti, à mina lua. Mazɔlɔɔ kɛni naama vaiti ti ɠɛ, kɛlɛ naa lɛi é ʋa ɠɛ ɠɛɛzu ga gaaɓelagi gaamanɔ.» 10 Naa ʋoluma, é ɠɛni ti ma: «Zii ta ɠa wuzeɠe bɔɔla zii laalɔɠɔma, masadai ta ɠa wuzeɠe bɔɔla masadai laalɔɠɔma. 11 Zou ɓali wolaiti ta ɗa ɠɛ, pulu wolaiti ti ɗa loo ada mɔinmɔin, ta ɗɔfɔ zeeɓɛiti ti ɗa ʋa. Maalua vaiti ta poo golaiti ta ɗa zeɠe geeɠɔlɔgi zu, ti ɗa ʋa. 12 «Kɛlɛ naati ti ʋa ɠɛ ti ɠɛ, ta wo zo, ti wo wɔinzeɠe, ti li ga woye tukpɔɠaaleʋezuʋɛti, GALA dɛbi ʋɛlɛiti bu, ti wo ʋili kasoiti ga. Ta li ga woye masagiti ta kundiɠiiti kakala nɔ̀un maaʋele ma. 13 Naa ɠa zobogi ve wo ʋɛ, wo zeele wooi wo ti ma. 14 À da ɠisu ga wo mina yiizoolɛ ma yeeluɠɔ ga ʋelei wa woozuɠula la. 15 Mazɔlɔɔ nà daaʋɛ ta ɠigi ve wo ya, niiti wo zili nuiti ti la zooga losu ti luɠɔ, ɓaa ti ʋa maaɠaali. 16 Wo zɔlɔɔ nui, ta wo-ɠɛɛlointi, naa ʋɛɛ wa-nuiti ta wo-wɔɔlaiti ba, ta wo ɠwɛɛ, ti tanigaa ʋaa wo zaama. 17 Ɛsɛ pɛ ka wo wɔinzeɠe nɔ̀un maaʋele ma. 18 Kɛlɛ anɛɛ wo unma undeɠai gila kpalaa ge la loa ya. 19 Wa lona kpaan, wa wo-yɛnvui ɠizo.» 20 «Siɛgi zu wo Zeluzalɛme ɠaazu la, maaɠakugai ga kɔɔɓɔgiti, à kwɛɛ naazu ga koloɠolo fai maaɓuɠaa. 21 Naazu zɔiti ta ɠɛ Zudé, naati ti ʋela, ti lɛ gizeiti ma. Niiti ta ɠɛ Zeluzalɛme taa zaamaʋɛ, naati ti ɠula taai ʋa. Zɔiti ta ɠɛ kpalagiti su, ti mina ɠale ma taazuʋɛ. 22 Mazɔlɔɔ naati ta ɠɛɛzu ga GALA ná-doɠa wo foloiti, nii a kɛ nii kpein sɛʋɛai, ti laazeeli. 23 Naama voloiti su, maanɔɠɔi ɠa ɠɛ koma anzanuiti bɛ ta zɔiti ti ɲiimi veezu, mazɔlɔɔ nimiza wolai ɠa ɠɛ zooi nii zu, ta GALA ná-ziiɠaawanai ɠa ɠɛ su nuɓusɛiti ma. 24 Ta za ga boɠa zɔkpɔi, ta ɠɛ ga kɔɔ luɔiti, ti li ga tiye zou ɠilagilagi pɛ su. Zii ɠiligiti ta ɠɔɠɔziɛ Zeluzalɛme zu, eyɛsu zii ɠiligiti ta-yeeɠɛɠalai ɓe.» 25 «Poogiti ta ɠɛ foloi, alugi ta somideɠaiti su. Zooi ma zii ɠiligiti ta ɠɛ koozuʋili golai zu, ti la kwɛɛga nii ta zoo kɛɛzu, tɔɔzei kpoloɗɛ lugi ʋa, ta ma lakpatakpa golaiti. 26 Nuiti su ɠa vidi ga maanɔɠɔ wolai ʋa luabai, nii é ʋaazu zooi ɠɔlɔkɔlɔma ná pɛ, mazɔlɔɔ geeɠɔlɔgi zu zɛbɛiti ta ɲiikpi. 27 Naazu, ta ʋaazu Nu ná-Doun Zunui ɠaazu, é ɗa ʋa tonaɓiingi maazu ga zɛbɛi ta lɛbiya wolai. 28 Siɛgi zu wo naama vaiti kaazu la, ti tɔɔzei ga ti ɗa ɠɛ, à ɠaalɔ, wo wɔungi wuzeɠe, mazɔlɔɔ wa-unmɔɔgi maaɓuɠaa.» 29 Yesu faalaali ɠila boni ti ma, é ɠɛ ma: «À kooleɠoole gului ʋɛtɛ dɛɛ, ta guluiti pɛ. 30 Siɛgi zu ti lɛnusu la, wa ɓɔɠɔi wo kwɛni naazu ga foɠoi maaɓuɠaa. 31 Ʋele nɔ ɠana é la, siɛgi zu wo niima vaiti kaazu la, ti ɗa ɠɛ, à kwɛɛ ga GALA ná-masadai maaɓuɠaa. 32 Gè bo wo ma ga gaamai, yamanii nii la ɓega ga leʋe, eyɛsu niima vaiti pɛ ti ɗa ɠɛ. 33 Geeɠɔlɔgi ta zooi ta leʋe, kɛlɛ nɔ̀un daawooiti ti la leʋega pɛ.» 34 «À wɛlɛ ɓɔɠɔ ma, nii a kɛ wo mina ɓɔɠɔ ɠidaaʋili ga faa lateʋegaiti ta dɔɔzodai, naa ʋɛɛ etea yiizoolɛiti ba, nii a kɛ niima voloi mina ɠula wo viliba, 35 ga balii ɠɛʋele, mazɔlɔɔ toɠa ʋaazu eteai ɠɔlɔkɔlɔma, nuɓusɛiti pɛ ma. 36 À wɛlɛ ɓɔɠɔ ma mu, wo GALA fali ɠɛ siɛnɔpɛ su, naa ɠa a kɛ wo zɛbɛi zɔlɔɔ, wo ziɛ naama vaiti pɛ bu, wo zoo wo lo Nu ná-Doun Zunui ɠakala.» 37 Yesu ɠɛni ná-foloiti seɠezu, é ɗa kalagi wo GALA sei ʋɛlɛi wu, kɛlɛ kpɔkɔi é ɠɛni ɠulazu, é li, é ɲi Wolive wulu ɓelei ma ɠizei ma. 38 Nuɓusɛiti ma, ti ɠɛni ʋaazu ga sobuzobui GALA sei ʋɛlɛi wu, nii a kɛ ti woilo gooi ma.