Proverbs 17 (TOMA)

1 Fizɔgɛ ɓulu ɓuɠa vɔɔ goi ɠɛ nu ya, è ɗa mi ziilɛigi zu,nu ʋa ɠɛ pɛlɛi naa wu, daamiani pagɔi kpein ge ná, kɛlɛ sakpegi la ɓega ná. 2 Botiɠɛ nui é ga ɠima nui, naa ɠa ɗa zei doun zunui unda, nii é ɓaaɠulama vai ɠɛɛzu.Toɠa nɔnɔ zɔlɔɔ poganii zu ɠɛɛɠɛleaiti saama. 3 Wali ɠaei ta zanugi, ti ɠaa ɠa ɗa wuun ga abui, ma nɔɠɔi ʋa ɠula ba,ʋele ɠana Ɠɔoɠɔ GALAGI nuiti zii ʋoluɠulazu la. 4 Zɔi é faa ɲɔi ɠɛɛzu, toɠa ɗa woilo faa ɲɔu ɠɛ nuiti goo ma,zɛɛ nui ɠa ɗa woilo, woo ɲɔu wo nɛgiti goo ma. 5 Ɗa ɲɛɛɠulana bala nui zu, Kpɛtɛ Nui ɠa è unfesu,zɔi é ɠoozunɛɛzu seiɲɔɠɔi ná-maanɔɠɔ vai zu, salalalai la yɛga. 6 Nu wɔlɔiti ta-lɛbiya wɔɔlɔgi ɠa é ga ti-lounlointi,lointi ma zaalai ɠa é ga ti zɔlɔɔ nuiti. 7 Nu woozuɠɛzɛi la zolooni faaɠaaɠalala nui ma,zekana nɔ, zɛɛi la zolooni la kundiɠii ma. 8 Tanigaa ta ɗa ɠisiɛ ga, lobɛanii ɠa ɠɛ ti ʋɛ ga undaanɛɛi,naa ɠa ta ɓɔɠɔ zɔlɔɔ su, ta-vai pɛ su. 9 Zɔi é pɔ é nɛɛ nuiti bɛ, naa ɠa ɗa tɔ koloɠologiti suvaayɛ, niiti ti ɠɛai la,tɔɔzei ɗa ɠɛna suɠulaa kenein, naa ɠa ɗa è-wɔɔlaiti maaɠooza è ʋa. 10 Zeliloma ɠilagi ɠa ɗa faa ʋaa keleɠele nui ma,é leʋe kpakɔ ɲɛ ungila (100) ba, ta faaɠaaɠalala nui loɠa la. 11 Nu ɲɔi ɠa ɗa buzeɠe daalɔɠɔma vai nɔ ɠaiziɛ,keelai é la maawɔinɠa ɠɛa, naa ɠa ɗa leʋe daalɔɠɔma. 12 Nu ɠomi ga filɛ zua leei, nii ná-ziʋoiti kulaai zea,naa vizɔgɛ, è ʋa ɠomi ga faaɠaaɠalala nui é ná-ɠimalalai zu. 13 Ni nu a faa ʋagɔi zalana ga faa ɲɔi,maanɔɠɔi la zeɠea maala pɛ. 14 Sakpegi lɔɔzei, naa ɠa é ga è ziɛi luɠɔlosuʋɛ laavie,zeɠe ná, aisa kpɔɛi ʋa leʋe. 15 Nii é losu faa ɲɔu ɠɛ nui ʋolu, ta zɔi é telebo nui ʋeelalazu,ti felegɔ pɛ ti maayoseɠeʋɛ Ɠɔoɠɔ GALAGI ʋɛ. 16 Walii a ɠɛna ɠimalala nui ya, leeni ɠa a kɛ la?Toɠa zoo é ɠimalai ɠeya la ɓaa?Kɛlɛ ɠi pagɔ la zea. 17 Bɔɔla nui ɠa ɗa nɛɛbɛi ɠɛ yeenɔpɛ.Ɠɛɛɠɛloin ɠa ɗa kpɔbai ɠɛ, faaɓaagi a ʋaana. 18 Kɛni nui balagai ɠigi ma, naa ɠa a ɗa minazeɠe,é ɓɔɠɔ ɠɛ ga zeelagai, nu ɠiligi ná-kuyei zala vai zu. 19 Nui kpɔɛba vai nɛai bɛ, tɔ koloɠologi nɛɛʋɛ bɛ.Zɔi kibɔɔlɔmai su, naa wɔinʋɛ ga é ɓɔɠɔ ɠoloɠolo. 20 Nui yaavai ziimaʋɛ, é la undaanɛ zɔlɔɔga,zɔi é ga nɛ felegi, naa ɠa lɔ nimizai zu. 21 Zɔi é faaɠaaɠalala loun zunui zɔlɔɔsu, ziizoolɛi ɠa ɗa ɠɛ ma.Ɠimalala loun zunui, kɛɛɠɛ ɠoozu la ga nɛ. 22 Ziilaai ɠa ga kɛdɛya zaɓu wola,kɛlɛ kiteʋei ɠa ɗa nui zuɲɛgi ɓe. 23 Yaava nui ɠa ɗa lobɛanii zo, ti dɔɔɠu seɠei wu,nii a kɛ é tukpɔi maaʋe. 24 Ɠimalai maaɓuɠaʋɛ keleɠele nui ʋa,kɛlɛ ɠimalala nui ɠaazuʋɛ ɠa liizu faiti pɔ, niiti é la zooga é ʋa ti zɔlɔɔ. 25 Faaɠaaɠalala loun zunui kɛɛɠɛ ɠa ɗa ɠɛ ziiɓɔlɔi zu,é ɠɛ ga ziiɠoloɠologi naa ʋɛ, nii é sɔlɔɔga. 26 É la zolooni, nu ʋa fuun gani ɠula sɔbalala nui ya,toɠa ga telebotala vaa, è ʋa unfema nui loɠa. 27 Nui nii é ziaa faa mɔinmɔin su, naa ɠa ɗa dama, é mina ɓɔɛ ga gola,keleɠele nui ɠa ɗa yeeɠɛɠalai zeɠe, é ɗa ɠisiɛ. 28 Ɠimalala nui ɓalaa a ɗa leve ga ɠima nu, ni toɠa zoo maaɠɛsu kpɔ.Zɔi é laaɠulusu, naa ɠa é ga zunui nii keleɠelegai.

Proverbs 17 (TOMA)

In Other Versions