Proverbs 22 (TOMA)

1 Tɔɠɔɠulagi vizɔgɛ naavolo wolaiti ba,è unfe zɔiti ma, naa vizɔgɛ, é leʋe walii ʋa ta zanugi. 2 Kpɛtɛ nui ta bala nui ti ɓɔgɛ faa ɠila ma:Ɠɔoɠɔ GALAGI ɠa é ti felegɔ pɛ kpɛtɛa. 3 Ɠima nui ɠa ɗa maanɔɠɔi ɠa é ʋaazu, é lɛkpɛ tuɠɔ,kɛlɛ nui é la dɛ faa mɔinmɔin kwɛɛ, naa ɠa ɗa ziɛ ná ɠobaʋɛ, é ma ɓɔlɔi zɔlɔɔ. 4 Ɓɔɠɔmaayeii ta Ɠɔoɠɔ GALAGI ɠaazuluabai ma ɠulanumai ɠa ga,kulagaanɛɛzui, ta unfemai, ta sii zuɠoozai. 5 Yaava ʋelei, ɠaingiti ka ti su, ta baliiti, maanɛai nu maaɠooza ba,ni è-yɛnvui wɔin ɠa è ma. 6 Doungoi ɠala ga pelei maanɛai é ziɛ la,anɛɛ siɛgi zu é wɔlɔzaɠasu da, é la zeɠea ba. 7 Kpɛtɛ nui ɠa ɗa zei, bala nui unda.Kuye zeɠe nui ɠa ga duɔi, kuye ʋɛɛ nui ya. 8 Zɔi a telebotalai vaza, toɠa teʋe ga maanɔɠɔi,ná-zobogi ɠa ɠoloɠolo, nii é toomai ɠɛɛzu la. 9 Nui é nuɓɔɠɔlai ɠɛɛzu seiɲɔɠɔiti bɛ, toɠa tuyai zɔlɔɔ,tɔɔzei ta ɓɔsu ná-daamianigi ma ta bala nui. 10 Ɲɛɛɠulasu nui ɓɛ, kpɔɛi ɠa ɓe,goomaaɠaaliiti ta poomugiti ta ɓe. 11 Ni nu wɔinʋɛ é ɠɛ ga masagi nɛɛɲɔɠɔi,kɛni kisiɛ ʋagɔiti ti nɛɛ bɛ, ta nɛɛnɛ kpɔɛiti. 12 Ɠɔoɠɔ GALAGI ɠa wɛlɛzu faaɠwɛgi ma,kɛlɛ toɠa ɗa yaava nui ná-kisiɛiti supu. 13 Ɲaka nui ɠa ɗa ɠɛ ma: «Zalai ɠa loni eteaʋɛ,é mina lia bàlizu ga pelei zu taa zaamaʋɛ!» 14 Wɛɛnziɛ anzanuiti daaʋɛ ɠa ga zeɠezaɠai suɠoozaai,nui Ɠɔoɠɔ GALAGI yiiɠaawanazu ma, naa ɠa loo su. 15 Ɠimalalai ɠiliʋɛ doungoi yii ʋa,maaɠolo ɓakɔi ɠa maaɠooza ba. 16 Zɔi é bala nui laazuɠɔlizu, é ʋa tɔnɔ sɔlɔɔ ba,ta zɔi é vebɛaniiti feezu kpɛtɛ nui ʋɛ, naati gaaɓelazuʋɛ ɠa ɠɛ ga baladai. 17 Dama, è woilo ga pagɔ ɠima nuiti gooi ma,yiilaalao faaɠwɛgi luɠɔ, gè feezu è ya. 18 Mazɔlɔɔ fizɔgɛ è ti makɛ ɠisu,è ɠɛʋele ɓɛtɛ yeenɔpɛ, è ɗa ti zuɠula. 19 Wɔ̀inʋɛ ga è ɠito Ɠɔoɠɔ GALAGI ʋa,naa ɠa é ba, za, nà è ɠalasu, ɗa ɓalaagi. 20 Gè la tɛnɛ gooiti ta kidafaawu vaiti sɛʋɛni è ma,ná zeizu ʋa ɠɛ ga puusaʋagɔ (30), ɓaa? 21 Naati ta kala kitei ve è ya, soloogai kitogi ma.Ni nui ta a è leʋena, gaamai ɠaiziɛzu,ɗa zoo è faa gaamaiti bo ma, kisuɠala. 22 Mina lo bala nui ná-zobotalai ma, è ʋa maavo,mina maawɔin nui maanɔɠɔ tukpɔɠaaleʋezuʋɛ. 23 Tɔɔzei Ɠɔoɠɔ GALAGI ɠa ti maalobo,toɠa naama nuiti zɛnvui ɠula ti ya, niiti ti zɔiti zeaɠɔligiti kulazu ti ya. 24 Mina ziiɠaawanawana nu zeizei,mina ziiɠula nu ɠɛ ga ziɛpoluɲɔɠɔ, 25 è ʋa li ɓɔɠɔ maaɠolozu ga siɛ ʋelei,è ʋa bali la ɓɔɠɔ luɠɔ ɗa-eteai zu. 26 Mina ɠɛ naati saama, niiti ta ɠɛ ga zeelagaiti,ziingao faa zu, ta kuye zeɠe vaa zu. 27 Mazɔlɔɔ ni ani la è ya, è ʋa sala,ta è ɓɔɠɔ ʋetei ɠula è ya, è laazu ga. 28 Mina kwɛpelema wɔlɔzaɠagi zeɠe daazu,nii è-mɛmɛwolani ti daani. 29 Ni ɗa zunui ta ɠaana ɠigi ma ná-botii zu,toɠa zoo é botii ɠɛ masagiti bɛ,é mina yɛ naati saama, niiti ti la ga sɔɓelama nu.

Proverbs 22 (TOMA)

In Other Versions