Proverbs 22 (YAPE)

1 Fa’anra ngam mel’eg e bin ni nge yag ngom, ko thim ni nge fel’ ara fla’ab ni ngari yo’or ban’en rom, ma ngam mel’eg ni nge fel’ thim. 2 Dariy ban’en nib thil u thilin e pi’in pire’ ban’en rorad nge pi’in dariy ban’en rorad, ya yad gubin ni SOMOL e sunumiyrad. 3 Girdi’ nib sul lanin’rad ngorad e yad ra guy e oloboch ni be yib miyad pilo’ riy, ma be’ ni der leam e ra yan nga fithik’, ma tomuren e ra kalngan’. 4 Um par ni bay madgun SOMOL u wan’um, ma ba sobutan’um, me yo’or ban’en rom, ma ga par ni yibe ta’fam, me n’uw nap’am. 5 Fa’anra ba t’uf rom e pogofan rom, ma ngam par u orel ko pi wup ni bay u kanawo’ ni girdi’ ni kireb e ma aw ngay. 6 Mu fil ngak e bitir rogon nthingar ra pired, mi i par u wan’rad u n’umngin nap’an e yafos rorad. 7 Girdi’ ni gafgow e yad e sib ko en ni bfel’ rogon. Ga ra man salpiy ni malfith ma ga ra mang sib ko en ni kam malfith ngak. 8 Fa’an ga ra yung e awoch ko tin nde mat’aw, ma riya’ e ra yib i for riy, ma gafgow ni um tay ngak boch e girdi’ e bayi tal. 9 Mu gol ma ga f’oth ganam ko pi’in gafgow. Ma gur e ra fel’ wa’atham riy. 10 Mu tuluf e en nib ufanthin, ma aram e ra tal e tugthin, toto’gor, nge yaba’. 11 Fa’anra ga ba’adag e gumircha’ nib machalbog nge welthin nib gol mab simnguy, ma en pilung e ra mang tafager rom. 12 I SOMOL e ma guy ni nge par e tin nib rriyul’, ni be pug ngalang e sasalap ko pi’in malulfith l’ugun. 13 Girdi’ nib gamead e ma par u tabnaw; miyad yog ni yad ra yan nga wean me og e layon ngorad. 14 L’ugun be’ ni bpin nib gathar e bod ba low nib to’ar; pi’in ke damumuw SOMOL ngorad e yad ra mul nga langgin. 15 Gubin e bitir ni yad bbalyang, ma yad ba wagagey, machane yira toyrad ni yibe llowan’ nagrad ni bfel’ rogon miyad ra fil riy rogon ni ngi i par pangirad ni bfel’. 16 Fa’anra u mu fal’eg e tow’ath rok e girdi’ nib yo’or ban’en rorad ara mu gafgownag e pi’in gafgow ya nge yo’or ban’en rom, me gur e ra m’ay ban’en rom. 17 Motoyil, nggu fil ngom e tin ni yog e pi’in gonop. Mu fil e machib rorad, 18 ma ga ra felfelan’ ni fa’anra par u wun’um me yag ni u mog. 19 Gu ba’adag ni ngam tay e pagan’ rom ngak SOMOL; aramfan ni nggu weliy e pin’em ngom e chiney. 20 Kug yoloy nga but guyey yu bugithin ni fan ngom. Nib sug ko llowan nge fanow ni bfel’, 21 mra fil ngom ko mang e rib riyul’. Ma nap’an e yira l’oegem ni ngam gay ko mang, ma bay mu fek e fulweg riy i yib nib mat’aw. 22 Dabi mang i tay ngom ngu’um fek ban’en rok be’ nib gafgow ni bochan e rayag rom; dabi mang i tay ngom ni ngu’um gafgownag e pi’in ka ra magawon gad u tafen e puf oloboch. 23 I SOMOL e bayi pithig e pa’ i oloboch ni bay u puluwrad me gafgownag e yafos ko en ni be gafgownag e yafos rorad. 24 Dab mm’ag tafger ngak e girdi’ nib gelyuwan ma ba gel e damumuw rorad. 25 Ya rayag ni mit pangirad ngom ni dabkiyag ni mu thilyegnem. 26 Dab mmicheg ni nge milfan e malfith rok be’ ngom. 27 Ya fa’anra dabiyag ni ngam thang, ma mus ko chob rom miyad ra fek. 28 Dab mu gachgacheg e mathil ko binaw ni duwgiliy e girdi’ rom kakrom. 29 Mu dag be’ ngog nma rin’ e maruwel ni bfel’, mu gu dag be ngom ni kabfel’ boch ko tin yo’or e girdi’, ma rabung ni nge un ko sabal ko pilung.

Proverbs 22 (YAPE)

In Other Versions