Proverbs 23 (TOMA)

1 Ni ɗa ɠɛna zeini daami wosuʋɛ taɓali ɠa,wa unfema nui ta, dama ga ná-fai. 2 Ta ɠula ɗa-ʋului la,ni è ɠulukpugɛ. 3 Mina daamiani pagɔiti nɔ ʋɛtɛ,tanisu ta feezu è ya kisiɛ ɲɔi maazu. 4 Mina ɓɔɠɔ ɓɔlɔ ga è ɓɛtɛ vai,ɠɛlɛ vɔlɔ ma ɠisiɛi ʋa. 5 È ɠɛɛzu nɔ, è ɠaazulo naavoloi ʋa, tɔun é ɓega ga ɲɛɛlɛ,mazɔlɔɔ toɠa koʋegiti tosu ɓɔɠɔ ʋa, é ɠoʋe, é li ɠoozama, eɠɛ koɠɛi é geezuʋɛ. 6 À mina ɓɔ daamiani ma, wa nui é ga ziiʋodɔɠɔ nui,è ɠaazu mina ɠula daamiani pagɔiti ba. 7 Mazɔlɔɔ nui ʋe kpegai na ga deve, é ɠɛ ma: «Laami, è ɓɔɔle.»Kɛlɛ gaamai zu, é la è ʋɔ ziimaʋɛ. 8 Ɗa unpili ga ma ɓuɠai è miai,woo nɛɛnɛgiti è ti wogai, ti la mɔ faa ʋaa. 9 Mina ɓɔɛ faaɠaaɠalala nui ʋɔ,toɠa è ɓɔɛ woo ʋagɔiti baaɠula. 10 Mina kwɛpelema wɔlɔzaɠagi maavalibo,è ʋa wɔin ga è podointi ta-yooi zeɠe. 11 Tɔɔzei ti unmɔɔ nu wola ɠa ná,GALA ɓɔɠɔi ɠa ti maalobo è laalɔɠɔma. 12 Yiilɔɔ maaɠoloi wu, è sɔlɔɔsu,è woilo faaɠwɛgi ma ɠalagi ma, é wosu ga ɗe. 13 Mina inɛinɛ ga è-loin maaɠolo vai,anɛɛ ni ɗa doɠazu ga kpakɔ ɲɛ tiegɔ, é la zaa. 14 Naa ɠa zoo é kaka faiti kpudɛ maazu,niiti ta la ɠɛ ga undaaʋili faa. 15 Dòun zunu, ni ɗa ɠilina ɠimalai ʋa ga è-yii pɛ,nà koozunɛ wola zɔlɔɔ naa zu. 16 Siɛgi zu è ɓɔɛzu la ga gaamai,toɠa bɛ̀ ga koozunɛ wola. 17 Mina ɠaazuɠula faa ɲɔu ɠɛ nuiti ba,kɛlɛ yeenɔpɛ ɠolo Ɠɔoɠɔ GALAGI ʋɛ. 18 Mazɔlɔɔ ɗa ʋelela ʋelei zɔlɔɔ,ɗa-ɠitogi la ɠoloɠologa. 19 Woilo gòo ma ga pagɔ, dòun zunu, è ɠɛ ga ɠima nu,è yiiʋilɛ sɔle pelei ʋa. 20 Mina ʋilɛ dɔɔ ɓɔle nuiti polu,ɓaa naati niiti ti ɓɔɠɔ veezu daamii nɛɛnɛgiti zea. 21 Mazɔlɔɔ dɔɔ ɓɔle nuiti, ta ɠulukpu nuiti, ta ɗa gaaɓela nimizai zu,ɲiimɛni wo nuiti ɓalaa, ná tago ʋena, ti ɓɔɠɔ maaɠili ga seɠe zaɠaiti. 22 Woilo è-ɠɛɛ wooi ma, nii é è zɔlɔɔga,mina è-lee ʋɛlɛʋɛlɛ, siɛgi zu é wɔlɔzaɠasu da. 23 Gaamai ɠaiziɛ, ta ɠimalai, ta kalagi, ta faawuuzumɔgi,mina ti zuɠoloɠolo. 24 Telebo nui kɛɛɠɛ ɠa ɗa ɠɛ koozunɛɛi zu ɠɔ,undaanɛ nu ɠa ga naa, nii é ɠima loun zunui zɔlɔɔsu. 25 È-ɠɛɛ ta è-lee ti ɠoozunɛ è ma,naama undaanɛɛi ɠɛ ga anzanui naa nɔnɔ, nii é è zɔlɔɔga eteai zu. 26 Dòun zunu, la nɔ̀un da,è sìɛ ʋelei wuuzumɔ. 27 Mazɔlɔɔ koloɠolo anzanui ɠa ga zeɠezaɠai suɠoozaai,wɛɛnziɛ anzanui ɠa ga kɔlɔyeɠei sulɔiɗai. 28 Toɠa ɗa pele ɓɔungi wo, eɠɛ toosu nu,toɠa ɗa zunu mɔinmɔin kɛ ga wooʋalada nu. 29 Ɓɛ ɠa é kpeei loozu ga: «Ee, dèe, màanɔɠɔa»?Ɓɛ ɠa kpɔɛ wafuungiti ti losu ba, maa ɗa wana un ge la ba?Ɓɛ ɠa gaazuɠɛzɛiti kpɔiɗai su? 30 Naati, niiti ti lɛbisu dɔɔ ɓɔlezuʋɛ,tɛi ti dɔɔ zupuiti kpɔlezu. 31 Mina wɛlɛ dɔɔi ʋa pelei ʋa,é nɛsu, é ɗa volo ʋɛɛlɛi zu, é ɗa yei vaa. 32 Toɠa ɗa gaaɓela ga, é nui ɲi eɠɛ kaalii,é nu wo eɠɛ kpokpo ganii ma wanai ba. 33 È-ɠaazuʋɛ ɠa faa ɠiligiti ka,è-ɠigi ta è-laawooiti ta zupu. 34 Toɠa ɠɛ è ɠisu, eɠɛ ɗa ɠɛ laani kpoloɗɛi zaamaʋɛ,eɠɛ ɓato zu nui, é zɛlɛni ga ma wului, fiilɛ wolai ɗa ɲiikpi. 35 È ɗa ɠɛ ma: «Ta dòɠazu, gaa la wanazu ga ze,ti poolɛni ga kpakɔi, gè la gaaɠaani!Nà wuunsu yeelɛ? Kɛni gè ani zɔlɔɔ, nii nà kpɔle mɔnɔ!»

Proverbs 23 (TOMA)

In Other Versions