Proverbs 24 (TOMA)

1 Mina ɠaazuɠula faa ɲɔu ɠɛ nuiti ba,mina wɔin ga ta-ziɛpolui. 2 Mazɔlɔɔ ta-ɠisiɛi ɠa nɔ ga ti suɠoloɠolo,ti ɗa ɓɔɛ, é ʋilɛ faa ɲɔi ʋa, ti ʋaazu kɛɛzu. 3 Pɛlɛi ɠa ɗa lo ga ɠimalai,keleɠelegi ɠa a ɗa sapeziɛ. 4 Faaɠwɛgi ɠa a ɗa buuʋɛti daave gaani ʋagɔiti ti vizɔgai. 5 Zunui ɠigi ma, toɠa ga zunui suzeeliai,zɔi faaɠwɛgi zea, ta ɠa ɗa ɓɔ sɛbɛi ʋa. 6 Mazɔlɔɔ faazeikpasu ʋagɔi ɠa ɗa zoo è kɔɔi ɠɔ la,tɛnɛbo nuiti ta-mɔin ɠa kizogi a ɗa zɔlɔɔ su. 7 Ɠimalala nui la zooga é ʋa ɠima vaiti gaaɠa.Naa ɠa é ba, kɛni é ɗa maaɠɛ kpɔ, ta ɠɛna taa vaiti devea. 8 Zɔi ná-kisiɛi ga é faa ɲɔi ɠɛ,naa laa ɠa ɠɛ ga tɔɠɔ ɠoloɠolo kalamɔin. 9 Ɠimalala nui ná-kidafaawui ɠa ga kotoi,ɲɛɛɠulasu nui maayoseɠeʋɛ nuɓusɛiti bɛ. 10 Ɗa iɲɔteʋena kpɔlɔi ma ziɛgi zu,è-zɛbɛi maa ɠa ʋɛlɛʋɛlɛ! 11 Naati unmɔɔ, niiti ti liizu ga tiye ga ti ti lɔ saai zu,naati kizo, niiti ti liizu ga tiye kazemazu, ga ti ti ʋaa. 12 Mina ɠɛ ma: «Ee, gè la ɠɛa suɠwɛɛ!»GALA nii é fai pɛ kwɛɛ, nii é ɠɛɛzu è-yiimaʋɛ,naa la zɔɠɔzuɠwɛɛ ɓaa?Ungo, zɔi é è-yɛnvui makɛsu, naa kwɛɛ,toɠa ɛsɛ gilagilagi zala, eɠɛʋelei ná-kɛɛwotiiti ti la. 13 Dòun zunu, kɔin gulɔi ɠɔmɔ, mazɔlɔɔ kɔin gulɔi ʋagɛ,ma ɲɛmigi ɠa nɛɛ è-laaʋɛ. 14 Ɠitoo su, ga ɠimalai ʋagɛ ɗa-eteai ma vaa ma.Ni ɗa zoona è ziɛ la, ɗa zoo è ɠoozunɛ ʋelela ʋelei,ɗa-ɠitogi la ɠoloɠologa. 15 Mina woya lɔ telebo nui ná-pɛlɛi ma, ga faa ɲɔu,mina seizuʋɛ ɠoloɠolo. 16 Mazɔlɔɔ anɛɛ ni telebo nui loo la ɠa ɠɛɛzu lɔfela, toɠa wuzeɠe,kɛlɛ faa ɲɔu ɠɛ nuiti su ɠa ɗa ɓezeɠele ga maanɔɠɔi. 17 Mina ɠoozunɛ ni è zili nui a loona,ni a lɔɔna kpɔlɔi zu, mina kua wo ga koozunɛɛi. 18 Ɠɔoɠɔ GALAGI ɠa naa ɠa ga wanama vaa,é la mɔ yiiɠaawana ma. 19 Mina yiiɠaawana naati ta-vaa zu, niiti ti faa ɲɔi ɠɛɛzu,mina ɠaazuɠula faa ɲɔu ɠɛ nuiti ba. 20 Mazɔlɔɔ kulanuma la naati tuɠɔ, niiti ti faa ɲɔi ɠɛɛzu,ti-yɛnvui ɠa za eɠɛ lanboi. 21 Dòun zunu, unfe Ɠɔoɠɔ GALAGI ma ta masagi.Mina ʋɔɔkpɔ naati ba, niiti ti pɔ ga ti fai pɛ falibo. 22 Mazɔlɔɔ ti ɠoloɠolo fai ɠa ɠula ti viliba,ɓɛ ɠa é kpɔlɔi ɠwɛɛ, nii Ɠɔoɠɔ GALAGI ta masagi, ʋaazu seizu ti ma? 23 Wɛlɛ nii ɠa ɠima nuiti ti boga mɔnɔ. Topolui ɠa ga faa ɲɔi tukpɔi ɠaaleʋezuʋɛ. 24 Ni tukpɔɠaaleʋe nui a ɠɛna faa ɲɔu ɠɛ nui ma:«Sɔ ge la è ʋa,»nuɓusɛiti ta foovo, ziiti ti yiiɠaawana ma. 25 Kɛlɛ tama zɔiti ti faa ɲɔu ɠɛ nui ʋeelalazu,naati ta ɠɛ gaanɛ zu, tuya ɠa loo ti ʋɛ, é ɠɛ ga ta-undaanɛɛ. 26 Gooɠaaʋotegi é veezu ga gaamai,naa ɠa ga bɔɔlalai ma ʋoogi. 27 Aisa è ʋa ɗa-ʋɛlɛi lo,kɛni è etea ʋele wotiiti kɛ dɛ,è ɗa-ɓalagi ɠɛʋele ɓɛtɛ, é zoloo molo leʋei ma. 28 Mina zeele woo wo fuun è-zeiɲɔɠɔi laalɔɠɔma,mina nu yaava ga è-laawooi. 29 Mina ɠɛ ma: «Nà sosu, eɠɛʋelei é sòni da,nà seizu zunu tɛi zea, eɠɛʋelei é kɛni la ga ze.» 30 Gè leʋeni ɲaka nui ta ná-kpala kpelamaʋɛ,ɠimalala nui ná-leezɛn ɓelei laaʋɛ. 31 Wɛlɛ, kpolo ɠaingiti ta gui ɲɔiti ti ɠɛni ʋɔnɔsu ná pɛ,siɠigi é ɠɛni ma ga sasai, naa woloni. 32 Gè naa ɠaai ma, gè tɔɔzeini ga ɠigaiziɛ,nii gè pɛtɛni, ɠigi gè sɔlɔɔni naa ma, é ɠɛni ga: 33 È lago ɲi nɔ, è lago ɠaazuʋɛɛ ma fɔin nɔ,è zaamale, è yeeiti da ɓɔɠɔ ma, 34 naama ziɛgi zu, baladai ɠa na ʋa è ʋɔ, eɠɛ nui é ɠulazu è viliba,maanɔɠɔi ɠula è viliba eɠɛ toosu nui.

Proverbs 24 (TOMA)

In Other Versions