Proverbs 28 (TOMA)

1 Faa ɲɔu ɠɛ nui ɠa ɗa ɓizɛ, anɛɛ ni nu la kpɛɛzu,kitogi ɠa telebo nuiti zea, eɠɛ zala ɓokpagi. 2 Siɛgi zu kpakagi la zooi zu, kundiɠila ɠaiziɛ nuiti ta ɗa mɔin.Kɛlɛ kundiɠii a zeina, keleɠelegai é ɠala, faiti ta ɗa ziɛ ga pagɔ. 3 Zunui é ga bala nui, é maawɔin nuiti maanɔɠɔzu,toɠa ga faa zuɠoloɠolo tonai, é pului loozu. 4 Niiti ti ɠɛlɛzu GALA ná-tɔgi ʋa, naati ta ɗa faa ɲɔu ɠɛ nuiti maamusɛ,kɛlɛ niiti ti ɠolozu tɔgi ʋɛ, naati ta ɗa laalɛ ti wu. 5 Niiti ti ɓɔɠɔ veezu faa ɲɔi ya, naati ti la sɔle fai tanɔpɛ gaaɠaazu,kɛlɛ niiti ti ɓɔɠɔ ɠilizu Ɠɔoɠɔ GALAGI ʋa, naati ta ɗa faiti pɛ gaaɠa. 6 Fizɔgɛ nu ɠɛ ga bala nui, è ɗa ziɛ sɔledai zu,è ʋa li ɠɛɛzu ga kpɛtɛ nui, nii siɛ ʋelei ga wooveledai. 7 Zɔi é ɠolozu GALA ná-tɔgi ʋɛ, doun zunu ɠana keleɠelegai,kɛlɛ zɔi é ʋilɛsu tuʋa ʋele ɲɔu nuiti polu, naa ɠa ɗa ʋa ga unfegi kɛɛɠɛ ʋɔ. 8 Zɔi é ná-sɔlɔɔgi maamɔinzu ga talama walii, nii dateʋegai,naa ɠa sɔlɔɔgi ɠaalɛɛzu ba naa ʋɛ, nii a maawɔin nuiti maawɔinɠa. 9 Ni nu a ʋoluavena, ga é mina woilo GALA ná-tɔ gooi ma,ná-GALA falii wɔin ɠa zeɠe GALA ma. 10 Zɔi é telebo nuiti kakasu, é ti ʋilɛ pele ɲɔi ma,toɠa loo zeɠei zu, nii é bɔai.Kɛlɛ niiti ti ziɛzu ga sɔledai, undaanɛɛi ɠa naati tuɠɔ. 11 Kpɛtɛ nui ɠeleɠelegɛ ɓɔɠɔ nɔ ɠaazu,kɛlɛ bala nui keleɠelegai, naa ɠa zoo é poluɠula. 12 Siɛgi zu telebo nuiti ti kundiɠilai zɔlɔɔsu da, lɛbiya ɠa ɗa ɠɛ lee ɛsɛ pɛ bɛ.Kɛlɛ siɛgi zu nu ɲɔiti ti wuzeɠezu la, ɛsɛ ka ɗa lɔɔɠu. 13 Zɔi é ná-tɔ koloɠologiti dɔɔɠuzu, naa la ɠula ɓɔɠɔ numa,kɛlɛ GALA ka ɗa naa zuvaayɛ, zɔi é laazu zɔ ga é ɠɛlɛ ti ʋa. 14 Undaanɛ nu ɠa ga naama nui, nii yeenɔpɛ é luazu faa ɲɔi ɠɛɛ vai ʋa,kɛlɛ zɔi é ɠikpaazu, é ɗa faa ɲɔi ɠɛ, naa ɠa lɔ maanɔɠɔi zu. 15 Ʋelei zalai la, é zikɔzu, ta filɛ zuai pului ma,ʋele ɠana faa ɲɔu ɠɛ nui la, nii é masadai ɠɛɛzu nuɓusɛiti unda, ti ʋalagai. 16 Kundiɠii a ʋalana ɠigi ma, toɠa ɗa telebotalai wola ɠɛ,kɛlɛ zɔi é ɠɛlɛzu kakama ani mii vai ʋa, toɠa ɗa lɛbi kundiɠilai zu. 17 Nui nii nu ʋaa vai ziimaʋɛ, toɠa ɗa ɓizɛ ga lia ná-kabayeɠei ʋɔ pelei,nu nɔpɛ ge mina pele ɓesa tuɠɔ. 18 Nu-o-nu nii siɛ ʋelei zɔlegai, naa ɠa kizogi zɔlɔɔ,kɛlɛ sɔletala nui, é pele zuɓili felegɔi ziɛzu, toɠa loo gila su. 19 Zɔi é ná-tii ɠɛɛzu, naa ɠa daamianigi zɔlɔɔ ga bɔɔlɔa,kɛlɛ zɔi é ʋilɛsu gaaʋalaba vaiti polu, naa ɠɔnɔgi ɠa ɠɛ ga daanɔɠɔwogi. 20 Nui é ga lada nui, zee laa ɠa ve ga tuyai,kɛlɛ zɔi é wɔinni é ɓɛtɛ ga gaazuvilɛi, maanɔɠɔi la ʋoola ba. 21 É la vizɔni ga nu zeelɔzɔɠɔzui ɠɛ nuɓusɛiti zɔɠɔzu,anɛɛ naa ʋe, nui ɠa zoosu é faa ɲɔi ɠɛ ɓulu ɓuɠai zɔlɔɔ fai zu. 22 Zunui é ga gaazuɠulapɔ nui, toɠa ɗa kpɛtɛi ɠaiziɛ ga gaazuvilɛi,toɠa ɗa yeema ga baladai ɠa ʋaazu pɔ. 23 Zɔi é zelii losu seiɲɔɠɔi ma, gaaɓelasu naa ɠa ɗa ná-faanɛɛi wuuɠwɛɛ,é leʋe zɔi ʋa é maamusɛi wosu ga nɛgi. 24 Nu-o-nu é kaazu ga faa ɲɔu laade, ga é kɛɛɠɛ ta dee maavo,é la vizɔni toosu nu ʋa. 25 Zunui nii sɔlɔɔgi la ziilɛiɗa, toɠa ɗa kpɔɛi wuzeɠe,kɛlɛ zɔi é ɓɔɠɔ ɠalivaazu Ɠɔoɠɔ GALAGI ma, toɠa ɠɛ anii pɛ su nɔ yaɠaba. 26 Ɗɛi è laazu ɗa-ɠigaiziɛiti nɔ la, ɗa ga ɠimalala nu,kɛlɛ zɔi é ziɛzu ga ɠimalai, faaɓaagiti ta ʋoola ba. 27 Zɔi é faanɛɛi ɠɛɛzu bala nuiti bɛ, é la yɛga kpala zu,kɛlɛ zɔi é ɠaazuʋɛɛzu ma, seiɲɔɠɔi ná-kpɔlɔi luɠɔ, toɠa foovoo mɔinmɔin sɔlɔɔ. 28 Siɛgi zu faa ɲɔu ɠɛ nuiti ti zeizu la kundiɠilai zu, ɛsɛ pɛ ka ɗa lɔɔɠu,kɛlɛ siɛgi zu ti loozu bu la, telebo nui ma mɔinmɔin ka ɗa ɠula kɛlɛma.

Proverbs 28 (TOMA)

In Other Versions