Psalms 106 (TOMA)
1 À Ɠɔoɠɔ GALAGI maamusɛ! À Ɠɔoɠɔ GALAGI lɛbi, mazɔlɔɔ pagɛ,mazɔlɔɔ ná-wooɠɛɠiladai ɠa yɛsu ná ɠɔ! 2 Ɓɛ ɠa a zoo é Ɠɔoɠɔ GALAGI ɠɛɛ vaa wolaiti bo?Ɓɛ ɠa a zoo é maamusɛ vaiti kpein bo? 3 Undaanɛ nu ɠa ga naati, niiti ti sɔle fai ɠɛɛzu,ti naa ɠɛɛzu yeenɔpɛ, nii é ga telebodai. 4 Ee, Ɠɔoɠɔ GALAGI, siɛgi zu è nuɓɔɠɔlai ɠɛɛzu la ɗa-nuɓusɛiti bɛ, mina yeema mà,siɛgi zu è ti ɠizosu da, ɓɔ bà, 5 nii a kɛ, gè ɠaazula ɗa-nuiti ta-undaanɛɛi ma, niiti è yiimazeɠeai ga tiye,gè ɠoozunɛ ga ɗa-nuɓusɛiti ta-ɠoozunɛɛi,ta gi è maamusɛ ʋɔɔma gá ɗɔnɔiti! 6 Gi kotoi ɠɛa ga gi-mɛmɛwolani kɛʋele,gi faa ɲɔu ɠɛ, gi ɠɛ ga sɔba nuiti. 7 Mazɔlɔɔ, gi-mɛmɛwolani ti la ɠɛni ɗa-laavɔɔ vaiti gaaɠaani Ezipete yooi zu,ti yeemani ɗa-wooɠɛɠila faa wolaiti ma,ti ɓakani kpoloɗɛi ɠobaʋɛ, Seeli Kpoloɗɛi ɠobaʋɛ. 8 Kɛlɛ, GALA ge ti ɠizoni, daaseigi wɔɔlɔ vai zu,é ná-zobogi ɠula kɛlɛma. 9 É zelii loni Seeli Kpoloɗɛi ma, naa vɔɔni su,ti ziɛni ma yeɠezaɠai zu, eɠɛ teʋebai zu. 10 É ti ɠizoni ti wɔinzeɠe nuiti ta-ɠɛʋeleiti ma,é ti unmɔɔni ti zili nuiti ta-zobogi ma. 11 Ziɛiti ti ti maayoseɠe nuiti maaɓɔleni,gila kpalaa ge la ɠɛni ɠulani. 12 Názu ɠa ná-nuɓusɛiti ti laani la daawooi la,ti maamusɛ wuyeiti too bɛ. 13 Kɛlɛ ti yeemani gaamanɔ ná-kɛɛwotiiti ma,ti la ná-faazeikpasuiti kɛ vai maaɓɔunni. 14 Teʋebai zu, ti-yiimaʋɛ laaveni ga gaazuɠulapɔi,ti GALA suɠɔɠɔ fai ɠɛɛni zou vɔɔi zu. 15 Nii ti falini ma, é naa veeni ti ya,kɛlɛ é seeɓɛi ʋilini ti zaama. 16 Ti toloi ɠulani ga Moize ti-ʋuuzuʋɛ,ta Aalɔn, Ɠɔoɠɔ GALAGI ná-botiɠɛ nu ɲadegai. 17 Zooi laalaoni, é Datan ɓɔle,é Aɓilame ná-nu ɓulugiti maalɔɔɠuni. 18 Abui ta-nu ɓulugiti galani,abui soni faa ɲɔu ɠɛ nuiti ba. 19 Ti nikɛ yiʋoi ɓɛtɛni ɓɔɠɔ ʋɛ Wolɛɓe gizei ma,ti nɔkɔni kɔlu ɠaawuungai naa wu. 20 Ti GALA maavaliboni, nii é ɠɛni ga ta-lɛbiyai,ga suai ʋaaɠulabai, nii é tufai miizu! 21 Ti yeemani GALA ma, ti ɠizo nui,nii é faa wolaiti kɛɛni Ezipete yooi zu. 22 É laavɔɔ vaiti kɛɛni Same ná-zooi zu,ta kɛɛwoti maayikiaiti Seeli Kpoloɗɛi ɠobaʋɛ. 23 GALA ge deveni ga é ti-ma zuwu ɠaaleʋe.Kɛlɛ Moize, nii é yiimazeɠeni la, naa loni kakala,é pee ve bɛ, é zeɠe ná-ziiɠaawanai ʋolu, é mina ti ɠoloɠolo. 24 Zou ʋagɔi maawooi woni ti ma, ti naa ʋɛlɛʋilini,ti la ɠɛni laani GALA daawooi la. 25 Ti ɓɔɛni unsu ta-zeɠe ɠotaiti bu,ti la ɠɛni ɠoloni Ɠɔoɠɔ GALAGI laawooi ʋɛ. 26 Názu ɠa naa yeei wuzeɠeni la,é ɠona ga toɠa ti undaaʋilisu teʋebai zu, 27 é ti-mavofodaiti faza zooi kpein su,ti za zii ɠiligiti saama. 28 Ti ɓɔɠɔ ɠilini Ɓaale-Peyɔɔl ʋa,ti zalaɠa zuaiti miini, niiti ti ɠɛni ga gɔvɛiti tɔnɔ. 29 Ti Ɠɔoɠɔ GALAGI yiiɠaawanani ga ti-ziɛ ʋele ɲɔiti,ɗɔfɔ zeeɓɛ ɲɔi ʋɛɛni ti ʋa. 30 Fineyase wuzeɠeni, é ná laazale,ɗɔfɔ zeeɓɛ ɲɔi ɓeni gaamago nɔ. 31 Naa leveni tɔun bɛ ga telebo faa ɠa é kɛɛni,eyɛsu yeeɠɛɠalaiti ta yeeɠɛɠalaiti su eyɛsu ɠɔ. 32 Ti GALA ziiɠaawana vai ɠɛɛni Meliɓa ɗɛi ʋɔ bɛ,Moize lɔɔni maanɔɠɔi zu ti maaʋele ma. 33 Ti wola ɓɔini da,é ɓɔɛ, é la ɠisiɛni su. 34 Ti la ɠɛni Kanaan nuiti ma zuwu ɠaaleʋeni,eɠɛʋelei Ɠɔoɠɔ GALAGI boni la ti ma. 35 Ti zupuni ta zii ɠiligiti,ti naati siɛ ʋele maalɛlɛni. 36 Ti ɠɛni naati ta-ɠɔɔɠɔ ganigiti dɛbizu,naati ti ɠɛni ti ʋɛ ga balii. 37 Anɛɛ ti-loun zunuiti, ta ti-loun anzanuiti,ti naati kulani ga zalaɠaiti inɛgiti bɛ. 38 Ti sɔbalala ɲamai ʋuuni,ti-loun zunuiti ma ɲamai, ta ti-loun anzanuiti ma ɲamai,ti ti ɠulani ga zalaɠaiti Kanaan yooi zu ɠɔɔɠɔ ganigiti bɛ.Zooi ɠɔzɔni ga naama nu ʋaa vai. 39 Ti ɓɔɠɔ ɠɔzɔni ga ta-ɠɛɛwotiiti,ti koloɠologi ɠɛ ti-ziɛ ʋelei ʋɔ. 40 Ɠɔoɠɔ GALAGI yiiɠaawanani, ziiɠula ná-nuɓusɛiti daalɔɠɔma,ná-nuɓusɛiti maayo ge zeɠeni bɛ. 41 É ti lɔɔni zii ɠiligiti zeezu,niiti ti maayo ge la ɠɛni ʋɛ, naati ti zeini ti unda. 42 Ti zili nuiti ti ti nimizani,ti unmaayeini naati zeewu. 43 Anɛɛ ni siɛ mɔinmɔin su, Ɠɔoɠɔ GALAGI ɠɛni ti unmɔɔsu,kɛlɛ ta-ɠisiɛi ɠɛni nɔ ga ti ɗa ɓaka,ti ɠata ta-vaaɠaaza golaiti ba. 44 Anɛɛ naa ʋe, Maliɠii a la ti ɓain gooi mɛnina,é ɓena ɠida ta-ɠidaaʋili faiti bu. 45 É ɠizɛni ná-minazeɠegi zu ti letema,ti maawɔin soni, eɠɛʋelei ná-wooɠɛɠiladai wɔɔlɔai la. 46 É ta-maawɔinɠaa ɠigi lɔ naati ziima,niiti ti ɠɛni ti zosu ga duɔiti. 47 Ee, Ɠɔoɠɔ GALAGI, gá-ƓALAGI, gi ɠizo!Gi ɠaalɛ ba, è gi ɠula zii ɠiligiti saama,naa ɠa a kɛ gi è maamusɛ, ɗɛigi è ɲadegai,gá-ɠoozunɛɛi ɠɛ ga gi ɗa è lɛbi! 48 Mamagi ɠa Ɠɔoɠɔ GALAGI ʋɛ,Izilayɛle ná-GALAGI, ɠɔoɠɔ ta ɠɔoɠɔ!Nuɓusɛiti kpein ti ɠɛ ma: «Amina!» À Ɠɔoɠɔ GALAGI maamusɛ!