Revelation 12 (TOMA)

1 Poo golai ɠulani kɛlɛma geeɠɔlɔgi zu: anzanui foloi loai kɔba eɠɛ seɠei, alugi ɠɛ kɔɠɔi wu, masa bɔɔlɔgi somideɠa puugɔ maazu felegɔiti (12) ti ba, naa ɠɛni unba. 2 Kogi ɠɛni ma, doun zɔlɔɔ koozuwanai ɓɔini da, é ɗa kpeei loo. 3 Poogi taɠili ge ɠulani kɛlɛma geeɠɔlɔgi zu: vamɔɠɔ golai kpɔiɗai, nii nɔungi ɠɛni lɔfela, minɛi ɠɛ ba puu, nɔungi ɠilagilagi pɛ ka masa bɔɔlɔgi ɠɛni unba. 4 Wɔɔngi geeɠɔlɔgi ma zomideɠai zeizu saʋagɔi ɠilazuʋɛ ɓaleni, é ti ʋili ya zooi ma. Vamɔɠɔgi naa loni anzanui ɠakalaʋɛ, nii é ɠɛni doin zɔlɔɔsu, nii a kɛ doin a zɔlɔɔna nɔ feya, é mi. 5 Anzanui doun zunui zɔlɔɔni, nii é ʋaazu losu ziiti pɛ tuɠɔ ga kɔlu lukpɔi. Ti lɛɛni ga doungoi GALA ta ná-masa kpɔkpɔgi ʋɔ bɛ. 6 Anzanui ʋelani, é li teʋebai zu, ʋɛ GALA ge adaʋɛ ta ɓɛtɛni ná bɛ, nii a kɛ é ɗa ɠɔnɔgi zɔlɔɔ ná folo waagila folo unfelegɔ folo ʋuulɔzita (1.260) laawu. 7 Kɔɔi ɠɔɔni geeɠɔlɔgi zu. Misɛle ta ná-geezuɠeelaiti ti kɔɔni ta vamɔɠɔgi. Vamɔɠɔgi ta ná-geezuɠeelaiti ti kɔɔi ɠɔɔni ɓalaa. 8 Kɛlɛ zobogi zɔlɔɔni vamɔɠɔgi ta ná-geezuɠeelaiti ma, naa ma, seizu nɔpɛ ge la mɔ ɠɛni zɔlɔɔni ti ʋɛ geeɠɔlɔgi zu. 9 Vamɔɠɔ golai ʋilini ya, nii é ga kaali wɔlɔzaɠagi, daa ga Inɛgi, ɓaa Setana, tɔ ɠa é eteai pɛ yaavazu. É ʋilini ya zooi ma, ta ná-geezuɠeelaiti pɛ ʋɔɔma. 10 Gè wooi ta mɛnini geeɠɔlɔgi zu, gooɠula gola, é ɠɛ ma:«Niizu niina, kizo foloi zeelia!Niizu niina, ada-ƓALAGI ná-masadai ma zɛbɛi ɠula kɛlɛma!Niizu niina, ná-nui Kilista ɓɔɠɔ zobogi ɠula kɛlɛma!Mazɔlɔɔ de-ɠɛɛlointi maalɔɔ nui ʋiliga ya,tɔ ɠa é ɠɛni losu da-ƓALAGI ɠaazu,folo ʋɛɛ kpidi ʋa, é ɗa ti maalɔ. 11 Ade-ɠɛɛleaiti ti pilɛ sɔlɔɔni ma Baala Ziʋoi ɲamai zaɓui zu,ta gaama zeele wooi zaɓui zu, ti ɠɛni bosu,ti la ɠɛni ti-yɛnvui nɛɛni ʋɛ, ti ʋa lua saai ʋa. 12 Naa ɠa é ba, à ɠoozunɛ, wo ɠɔkɔ,geeɠɔlɔgi ta wɔiti wo zeini ná!Kɛlɛ nimizai ɠa eteai ʋɛ ta kpoloɗɛi!Mazɔlɔɔ Inɛgi ʋaa wo ʋɔ pelei, daavegɛ ga ziiɠulagi,é suɠwɛɛgɛ ga yeeɠɛɠala go nɔ ɠa niina é zea.» 13 Siɛgi zu vamɔɠɔgi kaani la ga piligɛ ya zooi ma, é ʋilɛni anzanui ʋolu, nii é doun zunui zɔlɔɔni. 14 Názu ɠa koɠɛ wolai ɠoʋe felegɔiti ti veeni la anzanui ya, ga é ɠoʋe, é li teʋebai zu ná-adaʋɛ, ʋɛ a yɛ, ɠɔnɔgi zɔlɔɔsu ná, kona saʋagɔ ta tukpɛ (3,5) daawu, maaɠooza kaalii naa ʋa. 15 Kaalii ziɛi ɠulani laaʋɛ, é pili anzanui ʋolu, eɠɛ ziɛ wola, naa ʋa yei la. 16 Kɛlɛ zooi ɓɔni anzanui ʋa, é laalao, é ziɛ wolai naa ɓɔle, nii vamɔɠɔgi pilini, é ɠula daaʋɛ. 17 Vamɔɠɔgi yiiɠaawanani gola anzanui ma, é liini, é kɔɔi ʋɛɛ anzanui mavofodai mɔtaiti ba, niiti ti GALA ná-deveiti sosu, ti Yesu ná-zeele wooi zosu kpe. 18 Vamɔɠɔgi loni kpoloɗɛi ma ɠakei ma.

Revelation 12 (TOMA)

In Other Versions