Zechariah 8 (TOMA)

1 Ɠɔoɠɔ GALAGI, Fai-Pɛ-Maliɠii ɓɔɛni ɠani: 2 «Ɠɔoɠɔ GALAGI, Fai-Pɛ-Maliɠii wooi ɠaa:‹Siyɔn nɛɛʋɛ bɛ̀, ma yii wola ɠa bɛ̀,gaamazu, nà ɠalazu su ga ná-maayogi.› 3 «Ɠɔoɠɔ GALAGI, Fai-Pɛ-Maliɠii wooi ɠaa:‹Nà ɠalesu ma Siyɔn,sèizuʋɛ ɠa ɠɛ ga Zeluzalɛme.Zeluzalɛme ɠa loli ga: Wooɠɛɠila taai,ta ɠɛ Ɠɔoɠɔ GALAGI, Fai-Pɛ-Maliɠii ná-gizei ma: Gize ɲadegai.› 4 «Ɠɔoɠɔ GALAGI, Fai-Pɛ-Maliɠii wooi ɠaa:‹Nu wɔlɔzaɠagiti ta zeizu mɔnɔ Zeluzalɛme,zunuiti ta anzanuiti ta zei koi zaamaʋɛti,ɛsɛ pɛ ná-tukpɔ zea, tɔɔzei ma nu ná-konagi mɔin ʋelei ʋa. 5 Zeluzalɛme koi zaamaʋɛti daa ɠa vega zunu loungoiti ta anzanu loungoiti, ti ɗa ɠaɠo.› 6 «Ɠɔoɠɔ GALAGI, Fai-Pɛ-Maliɠii wooi ɠaa:‹Ni nuɓusɛi mɔtaiti ta kaazu ganiima vaiti ti la zooga ɠɛɛzu niima voloiti su,anɠɛ nɛi nà ɓalaagi nà ɠisiɛzu ga naati ti la zooga ɠɛɛzu?› »Ɠɔoɠɔ GALAGI, Fai-Pɛ-Maliɠii wooi ɠana. 7 «Ɠɔoɠɔ GALAGI, Fai-Pɛ-Maliɠii wooi ɠaa:‹Nà nà-nuɓusɛiti kizosu,gè ti ɠula folo ɠulazu ʋele yooi ta folo liizu ʋele yooiti su. 8 Nà ʋa ga tiye ti ɠula ná,ti zei Zeluzalɛme.Ta ɠɛ ga nà-nuɓusɛiti,gè ɠɛ ga ta-ƓALAGI,nà masadai ɠɛ ti unda ga wooɠɛɠiladai ta telebogi.› 9 «Ɠɔoɠɔ GALAGI, Fai-Pɛ-Maliɠii wooi ɠaa:‹À zɛbɛzeɠe, wɔigi wo niima wooiti mɛnisu niizu,nii GALA goo wo nuiti ti ɠɛni bosu,siɛgi zu Ɠɔoɠɔ GALAGI zei ʋɛlɛi ma wuulaagiti ti ɠɛni laazu la,GALA sei ʋɛlɛi naa lo fai zu. 10 Mazɔlɔɔ, aisa naama voloiti ti ʋa zeeli,nuɓusɛiti ta toganiiti ti la ɠɛni ta-wotii ma zala zɔlɔɔsu.Siɛ wo nui niiti ti ɠɛni lɛɛzu, ti ɗa yei,naati ti ɠɛni nɔ ga ti zili nuiti tɔnɔ,mazɔlɔɔ gè yeeɓeni nuiti ba,ti ɗa wuzeɠe ɓɔɠɔ laalɔɠɔma. 11 Kɛlɛ niizu niina, gè la mɔ nuɓusɛi mɔtai zosu gaʋelei gè ɠɛni kɛɛzu la mɔungi.› »Ɠɔoɠɔ GALAGI, Fai-Pɛ-Maliɠii wooi ɠana. 12 « ‹Mazɔlɔɔ, nà ziilɛigi vaza wo zaama, eɠɛ ani zuwui.Leezɛn ɓelei ɠa gaawaai ve,zooi ɠa baalɔnɔgi ve,geeɠɔlɔgi ɠa ɓe tonai ʋa, é ʋu ga gola.Nà niima vaaɓɔɠɔi pɛ kɛɛzunà-nuɓusɛi mɔtaiti bɛ. 13 Ee, Zuda ta Izilayɛle ʋɛlɛyeɠeiti,mɔungi wo ɠɛni zii ɠiligiti saama,ga nuɓusɛiti ti voovoai, naati ma ʋoogi.Ʋele nɔ ɠana gè wo ɠizosu da,wo ɠɛ ga tuya ɗɛungi.Naa ɠa é ba mu, à mina lua, à zɛbɛzeɠe ʋolu.› » 14 «Mazɔlɔɔ Ɠɔoɠɔ GALAGI, Fai-Pɛ-Maliɠii wooi ɠaa:‹Siɛgi zu gè devea la ga gè wo ɓɔlɔ,tɔɔzei wo-mɛmɛwolani ti zìiɠaawanani,gè la ɠɛni zeɠeni gòoi ʋolu. 15 Niizu niina, gè zeɠea naama levei ʋolu,nà faa ʋagɔi ɠɛɛzu niina Zeluzalɛme ʋɛ,ta Zuda nuɓusɛiti pɛ bɛ.À mina lua mu. 16 « ‹Pɛtɛ ʋele ɠa wa faiti kɛɛ la: Ɛsɛ pɛ ge ɗa gaamai wo bɔɔlai ma, tukpɔɠaaleʋe nuiti ti ɗa tukpɔɠaaleʋe ga telebogi, tukpɔɠaaleʋei nii ziilɛigi a zɔlɔɔ su. 17 Wo tanɔpɛ ge mina faa ɲɔu ɓɛtɛ yiimaʋɛ bɔɔlaiti daalɔɠɔma, à mina ɗa ga ɠona ga zɛɛi, tɔɔzei naama vai tanɔpɛ bɛlɛ la bɛ̀,› » Ɠɔoɠɔ GALAGI, Fai-Pɛ-Maliɠii wooi ɠana. 18 Ɠɔoɠɔ GALAGI, Fai-Pɛ-Maliɠii ɓɔɛni pɔ̀, é ɠɛ mà: 19 «Ɠɔoɠɔ GALAGI, Fai-Pɛ-Maliɠii wooi ɠaa: ‹Zugi nii wo sosu, alugi naanisiɛi, dɔɔlusiɛi, dɔfelasiɛi ta puusiɛi konagi zu, ta valibo ga koozunɛ voloi, ta fɛti voloiti Zuda nuɓusɛiti bɛ.« ‹Naa ma, à gaamai ta ziilɛigi nɛɛ ʋɛ.› 20 «Ɠɔoɠɔ GALAGI, Fai-Pɛ-Maliɠii wooi ɠaa:‹Zou ɠili su nuɓusɛiti,ta taa wolaiti su zei wo nu mɔinmɔin ga ta ʋa mɔnɔ. 21 Taa wolaiti su nuɓusɛiti ta li ti ɠɛ taɠiligaa ma:Ade li de Ɠɔoɠɔ GALAGI, Fai-Pɛ-Maliɠii maanɛɛnɛ, de gaiziɛ. Nà ɓalaagi nà liizu. 22 Ʋele ɠana nuɓusɛ mɔinmɔin, ta zeeɠaaɓaa yooiti,ta ʋaa la Ɠɔoɠɔ GALAGI, Fai-Pɛ-Maliɠii ɠaiziɛzu la, ti maanɛɛnɛ.› 23 Ɠɔoɠɔ GALAGI, Fai-Pɛ-Maliɠii wooi ɠaa:‹Naama voloiti nu puugɔ ti tanɔpɛ ti la ga zii ɠila ta ɠaalɛ ba,ti Zuifu ɠila so ná-seɠei lakɔlɔgi ʋa,ti ɠɛ ma: Gá ʋilɛsu wo ʋolu,mazɔlɔɔ gi mɛnigɛ ga GALA ka wo ʋa.› »

Zechariah 8 (TOMA)

In Other Versions