1 Kings 19 (YAPE)
1 Me weliy Ahab ni Pilung ngak Jezebel ni le’engin urngin e tin ke rin’ Elijah, nge rogon nike thang e pogofan rok urngin fapi profet rok Baal. 2 Me pi’ Jezebel e thin nge yan ngak Elijah ni ga’ar, “Mang e yigi gad e pi got pa’rad ngog nggum’ ni fa’anra yan i taw ko ngiyal’ney gabul ma dawor gu rin’ ngom e n’en ni kam rin’ ngak fapi profet.” 3 Me rus Elijah, me mil nike milnag e pogofan rok; me un fare tapigpig rok ngak ngranow nga Beersheba ni bay u lan yu Judah.Me pag fare tapigpig rok u rom, 4 me yan Elijah u but’ ni reb e rran ni be sor i yan nga daken e ted. Me tal nga tan ba ke gek’iy ko gin nib tagalul’, ngi i athpeg u wan’ ni manga yigi yim’. Me meybil ni ga’ar, “SOMOL, re gafgow ney ni aray ga’ngin e dabkiyag rog. Mfek e pogofan rog, ya kabfel’ ni nggum’!” 5 Me pag ir nga but’ u tan fare ke gek’iy me mol. Me gin nike yib ba engel i math ngak me ga’ar, “Mu od ngam abich.” 6 Me chachangar Elijah me guy ba flowa nge ba rume’ i ran ni bay u to’oben lolugen. Me abich me garbod, me sul nge pag ir nga but’ nge mol. 7 Me sul fare engel rok SOMOL me pug bayay ni ga’ar, “Mu od ngam abich, ya ba n’uw e kanawo’ ni ngam man riy.” 8 Me suwon Elijah, nge abich me garbod, me pi’ e re ggan nem gelngin nge yag ni yan u but’ ni aningeg i ragag e rran nge mada’ nga Sinai, ni fare burey nib thothup. 9 Me yan ngalan ba yiy u rom nge par riy e re nep’ nem.Me gin nike ga’ar SOMOL ngak, “Elijah, mang e ga be rin’ u roy?” 10 Me fulweg ni ga’ar, “SOMOL ni Got ni Gubin ma Rayag Rom, ka faram i yib ke mada’ ko chiney ni kemus ni gur e gu be pigpig ngom, machane girdi’ nu Israel e kar th’abed e m’ag u thilmed, ma kar buthuged e pi altar rom, ma kar thanged e pogofan rok urngin e pi profet rom. Kemus ni gag e kug magey, ma yad be guy rogon ni ngar thanged e pogofan rog.” 11 Me ga’ar SOMOL ngak, “Mman nga wean nga mub mu sak’iy nga p’eowcheg u p’ebugul e re burey ney.” Me yib SOMOL nge yan nib chugur ngak, me pi’ bangi nifeng nib gel nib gel nge yib nge rurug fare burey me bilbilig e war, machane de moy SOMOL u fithik’ e re gi nifeng nem. Me tal fa gi nifeng ndaki thow, me yib ba durru’, machane de moy SOMOL u fithik’ e re durru’ nem. 12 Me chuw fare durru’ me yib ba nifiy, machane de moy SOMOL u fithik’ e re nifiy nem. Me chuw fare nifiy me yib ba lam ni be kathkath. 13 Fa’ani rung’ag Elijah fare lam me upunguy owchen ko thal ni wuru’ e mad rok, me yib nga wean nge yib i sak’iy nga langan fare yiy. Me ga’ar ba lam ngak, “Elijah, mang e ga be rin’ u roy?” 14 Me fulweg ni ga’ar, “SOMOL ni Got, ni Gubin ma Rayag Rom, ka faram i yib ke mada’ ko chiney ni kemus ni gur e gu be pigpig ngom, machane girdi’ nu Israel e kar th’abed e m’ag u thilmed, ma kar buthuged e pi altar rom, ma kar thanged e pogofan ko urngin e pi profet rom. Kemus ni gag e kug magey, ma yad be guy rogon ni ngar thanged e pogofan rog.” 15 Me ga’ar SOMOL, “Mu sul ngam man nga daken e ted nib chugur nga Damaskus, ma ga yan ngalan e re binaw nem ngam liyef e gapgep nga lolugen Hazael nge mang pilung nu Syria, 16 nge Jehu nib mo’on ni fak Nimshi nge mang pilung nu Israel. Mu kum liyef e gapgep nga lolugen Elisa ni fak Shafat ni be’ u Abel Meholah nge yan nga luwam nge mang profet. 17 En nra thay rok Hazael e bayi thang Jehu e pogofan rok, ma en nra thay rok Jehu e bayi thang Elisa e pogofan rok. 18 Ma bay gu tay 7,000 e girdi’ u Israel ndab ni thang e pogofan rorad, ni urngin e pi’in yad ba yul’yul’ ngog ndawor ra siro’gad ngak Baal ara ra farayed owchen fare liyos ni ya’an.” 19 Me yan Elijah me pir’eg Elisa ni be maruwel ko garbaw ni pumo’on be gi’ e but’; ragag nge l’agruw wu’ e garbaw e bay nga m’on rok ma wu’ ni tomur e be maruwel ngay. Me luf Elijah wuru’ e mad rok nib n’uw nge yin’ nga daken Elisa. 20 Me pag Elisa fapi garbaw, me lol’oeg Elijah, me ga’ar, “Nggu wan gu faray owchen e chitamag nge chitinag nggu fingichiyrow, mu gub ngdarow.”Me ga’ar Elijah, “Mman ngamub. Ya dab gu talegem!” 21 Me yan Elisa i li’ fa wu’ rok e garbaw, nge lith e ufin riy, ni yoke ko fa gal garbaw e mang lud’ riy. Me pi’ fapi ufin ngak e girdi’ ngar longuyed, me yan nge un ngak Elijah ngi i ayuweg.