2 Chronicles 14 (YAPE)

1 Abijah ni Pilung e yim’ mi ni k’eyag u lan fapi low ko yam’ rok e pilung u lan fare Binaw rok David. Me Asa nib mo’on ni fak e yan nga luwan nge mang pilung, mu tan e gagiyeg rok Asa e i par fare nam riy u fithik’ e gapas ni ragag e duw. 2 Bfel’ Asa u wan’ SOMOL ni Got rok ni bochan e tin nib mat’aw ma ba manigil ni i ngongliy. 3 I chuweg Asa e pi altar nu yug boch e nam nge yungi tagil’ e tayfan rok e pi’in dar nanged Got, me buthug yu ulung i malang ni yima meybil ngay, me t’ar nga but’ fapi ya’an Asherah ni fare got ni bpin. 4 Me yog ngak e girdi’ nu Judah ni ngar rin’ed e tin nib m’agan’ SOMOL ngay, ni fare Got rok e pi chitamngirad, ma ngar folgad ko machib rok nge tin ke ta’chiylen. 5 Fan ni par fare nam u fithik’ e gapas u tan e gagiyeg rok Asa e bochan ni kirebnag fa yungi tagil’ e tayfan rok e pi’in dar nanged Got nge pi altar ko incense u lan e pi binaw nu Judah ni gubin. 6 Me ubung e yoror nib gel ko pi binaw nu Judah ni fan ko mael e ngiyal’n’ey, me yan boch e duw ndakuriy e mael, ni bochan e pi’ SOMOL e gapas ngak. 7 Me yog ngak e girdi’ nu Judah ni ga’ar, “Mmarod ngad yororiyed fapi binaw ni fan ko mael ni aram e ngad ubungyed e yoror nge pi wulyang ntafen e damit, nge garog nrayag i ning ngan man’nag nga yuley i dubchey. Ka da gagiyeg niged e re nam ney ni bochan e ka da rin’ed e n’en nib m’agan’ SOMOL ni Got rodad ngay. Ke yoror rodad ma ke matanagiydad u gubin yang.” Ma aram miyad ubung ngri fel’ rogon. 8 Asa ni Pilung e immoy barba’ i salthaw rok ni dalip mir’aye bbiyu’ e pumo’on riy ni piyu Judah, ni go’ bay e yungi shield nge sarey rorad, nge l’agruw mir’ay nge meruk i ragag e bbiyu’ i pumo’on ko Benjamin, ni ku bay yungi shield nge gat’ing rorad. Yad gubin ma bmuthan’rad, ma bfel’ rogon ni ka ni fil rogon e mael ngorad. 9 Zerah nu Ethiopia e gafaliy barba’ i salthaw ni reb e million girdi’en nge dalip mir’aye bbiyu’ e chariot riy ngranod ko fachi binaw nu Mareshah u lan yu Judah. 10 Me yan Asa ni nge cham ngak, ma ra barba’ fa gal raba’ i salthaw ni ngar chamgow ngorow me fal’eg rogon u tagil’ u lan fare loway nu Zefathah u charen yu Mareshah. 11 Me meybil Asa ngak SOMOL ni Got rok ni ga’ar, “SOMOL, rayag rom ni ngam ayuweg barba’ i salthaw nib waer ni bod feni mom ni ngam ayuweg barba’ i salthaw nib gel. SOMOL ni Got romad mu ayuwegmad e chiney, ni bochan e gamad be gif ngom, mu daken fithingam e kugbad riy ni nggu chamgad ngak e re raba’ i salthaw ney nib ga’. SOMOL i gur e Got romad; dariy be’ nrayag rok ni nge gel ngom.” 12 Me gel SOMOL ngak fare raba’ i salthaw nu Ethiopia nap’an ni yan Asa nge fare raba’ i salthaw nu Judah ngar chamgad ngorad. Miyad mil, 13 me Asa nge fare raba’ i salthaw rok e ra tulufed yad ngar mada’ gad nga Gerar. Ri bo’or piyu Ethiopia nli’rad ngar mad’ ni dakiyag ni ngar kunuyed lungurad ngar chamgad bayay. Ke gel SOMOL nge fa raba’ i salthaw rok ngorad, me fek fare raba’ i salthaw rok Asa bokun ban’en u Sudan (niku yima yog ni Ethiopia). 14 Ma aram me yag rorad ni ngar gathayed fapi binaw u lan fa gin nib liyeg yu Gerar, ni bochan e girdi’ nu rom e karrusgad ngak SOMOL. Fa raba’ i salthaw e ra kireb niged gubin fapi binaw miyad fek u fithik’ e yargal bokun ban’en. 15 Ku ra chamgad ko gin ke n’uf e pi tagafal gamanman e tent rorad riy, ngar feked bokun e gamanman ni saf nge kamel. Ma aram miyad sul nga Jerusalem.

2 Chronicles 14 (YAPE)

In Other Versions