Ezekiel 29 (YAPE)

1 U lan e bin ragag e duw ko bin ragag e pul, ko rofen ni ragag nge l’agruw e rran ko pul, ni gamad ba kalbus me non SOMOL ngog ni ga’ar, 2 “Fak e girdi’, mu togopluw ngak fare pilung nu Egypt. Mog rogon e gechig ni bayi aw ngak nge ga’ngin e nam nu Egypt. 3 Mog ni irera’ e n’en ni be yog SOMOL ni Th’abi Tolang ngak e pilung nu Egypt: I gag e to’ogor rom, i gur ere gayuch nir, ni ga ma thig u lan e lul’. Ga be yog ni lul’ ni Nile e bmil suwon ngom ma gur e mu sunmiy. 4 Bay gu the’ ba lam nga yododam mu gu l’oeg e nig ko lul’ rom nge gabael ngom. Ma aram e bay gu girngiyem nga talang ngam chuw ko fare lul’ ni Nile, nib mu’un fapi nig ngay ni kar gabaelgad ngom. 5 Bay gon’em nge fapi nig ni yad gubin nga daken e ted. Downgim e bay i aw nga daken e but’ nge par ni dab ni k’eyag. Bay gu pi’ ko arche’ nge gamanman ni ggan rorad. 6 Ma aram e bayi nang gubin e girdi’ nu Egypt ni Gag fare SOMOL.”Be ga’ar SOMOL, “Piyu Israel e gur yu Egypt e be pagan’rad ngom ko ayuw, machane kab gel bochi ley i ren nib wod ngom. 7 Nap’an ni yad ra genam ngom ni ngam aywegrad, mag m’ing u lukngum ngam rog nga yinupenrad mag dol’ nagrad. 8 Ere chiney, e Gag fare SOMOL ni Th’abi Tolang, e gu be yog ngom ni bay gol’oeg e girdi’ ngar chamgad ngom ko saydon, ngar thanged owchen e girdi’ rom nge gamanman rom. 9 Yu Egypt e bayi par ni dakuriy e fel’ riy ni dakuriy ban’en riy. Ma aram e bay mu nanged ni Gag fare SOMOL.“Bochan e ga be yog ni lul’ ni Nile e suwom me gur e mu sunmiy, 10 ma aram e nggu mang to’ogor rom nge to’ogor ko lul’ rom ni Nile. Bay gu tay ga’ngin yu Egypt nge par ndakuriy ban’en u daken, ni tabab ko binaw nu Migdol u lan e lel’och nge mada’ ko binaw nu Aswan u lan e yimuch, nge yan i taw ko mathil u Sudan. 11 Dariy ba girdi’ ara ba gamanman nra yan u rom. Aningeg i ragag e duw ni dakriy ban’en nra par u rom. 12 Bay gu gagiyegnag yu Egypt nge par ni ireram e re nam ni th’abi kireb u lan e fayleng. Aningeg i ragag e duw nra par e binaw nu Egypt nike kireb, nib gel e kireb riy ko yug binaw. Bay gu gagiyegnag yu Egypt ngar milethaygad. Bay ra milgad nga gubin e nam ngar pired u fithik’ yug boch e girdi’.” 13 I SOMOL ni Th’abi Tolang e be ga’ar, “Rachuw angeg i ragag e duw mag fulweg yu Egypt ko fapi nam ni gu weregrad riy, 14 ma gu pagrad ngar pired u ba’ ni yimuch yu Egypt, nri gin taferad. Yad ra par u rom ni yad ba nam nib waer lungrad, 15 ni ir e th’abi waer u fithik’ urngin e lung, ma dakriy bangiyal’ ni yad ra tay suwon yug boch e nam. Bay gu ta’rad nde ga’ farad ni dabku ra bunggad ni ngar t’ared reb e nam nga tan e lung rorad. 16 Israel e dakuriy bangiyal’ ni yad ra pag e taga’ ngorad ko ayuw. N’en ni buch ngak yu Egypt e bay i puguran ngak yu Israel feni balyang ni i toer ngorad. Ma aram e bayi nang yu Israel ni Gag SOMOL ni Th’abi Tolang.” 17 Rofen ni som’on ko bin m’on e pul ko duw ni rliw’ nge medlip ni gamad ba kalbus me non SOMOL ngog. 18 “Fak e girdi’, Nebukadnezzar ni Pilung nu Babylon e ke m’ag e mael nga Tyre. Ke gafaliy e salthaw rok kar feked e chugom ni rib tomal ni be meligich u daken lolugenrad ke modro’ nagrad ma ke fath e biyach u porad, machane Nebukadnezzar nge salthaw rok e de yag nra koled yu Tyre. 19 Ere chiney e irera’ e n’en ni gu be yog i Gag SOMOL ni Th’abi Tolang: aram e nggu pi’ fare but’ nu Egypt nga pa’ Nebukadnezzar ni Pilung. Bayi fek u yargal e chugom nge machaf riy nge gubin e felel’ nu Egypt nge mang puluwon e salthaw rok. 20 Bay gu pi’ yu Egypt ngak nge yan nga puluwon e maruwel nike tay, ni bochan e gag e gol’oeg e salthaw rok. I Gag SOMOL ni Th’abi Tolang e gu be non. 21 “Ezekiel, nap’an nra waer yu Egypt, mug gelnag e girdi’ nu Israel, ma bay gu pi’ gelngim ni nge yag ni mu non ngorad. Ma aram e bay ra nanged ni Gag fare SOMOL.”

Ezekiel 29 (YAPE)

In Other Versions