Genesis 21 (YAPE)
1 Me ayuweg SOMOL Sarah, ni bod rogon ni yog, 2 me diyen me gargeleg bochi pagel ni fak Abraham nike pilibthir Abraham. Chi pagel nem e ni gargeleg ko fa ngiyal’ ni yog Got ni bay ni gargeleg riy. 3 Me tunguy Abraham fithingan ni Isak, 4 ma nap’an ni nga meruk e rran yangren, me maad’adnag Abraham fachi tir ni bod ni yog e motochiyel rok Moses, ni bod rogon nike yog Got ngak ni nge rin’. 5 Nap’an nni gargeleg Isak ni fak ma ke gaman 100 e duw rok Abraham. 6 Me ga’ar Sarah, “Ke pi’ Got e felfelan’ ngog nge minmin. Urngin e girdi’ ni yad ra rung’ag murung’agen e yad ra un ngog ko minmin.” 7 Me ul ul ngay nge ga’ar, “I mini’ e susun e ra weliy ngak Abraham ni Sarah e bayi tathuthnag e bitir? Machane kug gargeleg bochi pagel ni fak ko ngiyal’ nike pilibthir Abraham.” 8 Me ilal e re tir nem, ma chirofen nda kun duruw’iy ko thuth e ngongliy Abraham ba mur ni ba ga’. 9 Me reb e rran ni changar Sarah me guy Ishmael, ni fak Hagar ni fare Egyptian, ni yow be fefal Isak ni fak. 10 Me ga’ar ngak Abraham, “Mu l’oeg e re bpin ney nib sib nge fare pagel ni fak ngranow ngar chuwgow. Ya re pagel ney ni fak e re bpin nir nib sib e thangri dabi fek bang e fla’ab rom, ya Isak ni fakag e ir e nge yag ngak.” 11 Ri gafgow laniyan’ Abraham riy, ya Ishmael e kub pagel ni fak. 12 Machane me ga’ar Got ngak Abraham, “Dabi magafan’um ngak e re pagel nem nge Hagar ni sib rom. Mu rin’ e tin keyog Sarah ngom, ya fa pi’in owchem ni gu micheg ni bay gu pi’ ngom e Isak e bay rabad rok. 13 Ya ku bay gu pi’ e bitir ni pire’ ngak fare pagel ni fak fare pin nib sib, ngar manged girdi’en reb e nam. Ya ku er rogon ni ir reb e pagel ni fakam.” 14 Ri kakadbul u reb e rran riy me pi’ Abraham boch e ggan ngak Hagar nge ba tafen e ran nike suguy ko ran. Me tay fare tir nga daken keru’ Hagar me yog ngorow ni ngranow. Me chuw Hagar u rom mi i yan u daken e ted u Beer-sheba. 15 Ma fa’ani m’ay e ran, me pag fare tir u tan boch ke gek’iy, 16 me yan rok nga orel ni gonap’an 100 e yard me yan i par nga but’. Me ga’ar u wan’, “Dabiyag ni gu yaliy e re tir ney nge yim’.” Nap’an ni kabay u rom nib par nga but’ me tabab fare tir ko meyor. 17 Me rung’ag Got laman fare pagel ni be yor, me non fare engel rok Got u tharmiy ngak Hagar ni ga’ar, “Hagar, mang e ke magafan’um ngay? Dab mu rus. Ya Got e ke rung’ag laman fare pagel ni be yor. 18 Mu sak’iy, ngam man mu fek ma ga fal’eg laniyan’. Ya pi’in bay rabad ni owchen e bay gu ngongliyrad ngar manged girdi’en reb e nam ni ba ga’.” 19 Me gagiyegnag Got Hagar me guy ba luwed. Me yan i suguy fare tafen e ran ni bay rok nge sug me pi’ boch ngak fare pagel. 20 Mi Got e bay rok e re pagel nem ma aram me ilal; mi i par u daken e ted u Paran me par ni ir be’ ni ba cheag ko mokol gamanman. 21 Me yan e chitiningin i fek be’ ni bpin u Egypt nge le’ay fare pagel. 22 Ngiyal’nem me yan Abimelek nike un Fikol ngak ni be’ nib tolang ko salthaw rok, me ga’ar ngak Abraham, “I Got e bay rom ko urngin e tin ga be rin’. 23 Ere mmicheg bugithin ngog e chiney u p’eowchen Got, ni dab’um ban nigeg, nge pifakag, nge pifak pafakag. Ug par ni gu byul’yul’ ngom, ere ngam micheg ngog ni kagra yul’yul’ ngog ma ngkum yul’yul’ nga lungun e re nam ney ni ga be par riy ni gathi ga be’ riy.” 24 Me ga’ar Abraham, “Kug micheg.” 25 Ma aram me egnag Abraham ngak Abimelek murung’agen fare luwed rok ni kelag fapi tapigpig rok Abimelek. 26 Me ga’ar Abimelek, “Dagnang ko mini’ e rin’ e bin, ya dawor nog ngog murung’agen, ma fin irera’ e som’on ni kug rung’ag.” 27 Me pi’ Abraham boch e saf nge garbaw ngak Abimelek miyow ngongliy reb e m’ag ni nge fel’ thilrow. 28 Me fael Abraham medlip e saf u fithik’ e gamanman rok nga bang, 29 me fith Abimelek ngak ni ga’ar, “Mangfan e medlip nir e saf ni kamfael nga bang?” 30 Me fulweg Abraham ngak ni ga’ar, “Nge fel’ u wun’um ya ngam fek e medlip i pifak e saf ney, ya ga ra rin’ ma aram e kam micheg ni gag e gu ker e re luwed ney.” 31 Ma aram me par fithingan e gi binaw nem ni Beersheba, ni bochan e ireram e gin’en nra michmich gow riy. 32 Tomuren ni kar ngongliyew e re m’ag nem u Beersheba, me sul Abimelek nge Fikol nga Filistia. 33 Me yung Abraham ba ke gek’iy ni tamarisk u lan yu Beersheba, ni aram e gin’en ni i meybil ngak SOMOL riy, ni fare Got ni manemus. 34 Me par Abraham u Filistia nib n’uw nap’an.