Genesis 40 (YAPE)

1 Cha’ nma pu’og e wayin nge pi’ ngak e en ni pilung nu Egypt nge en ni ir pilungen e lum flowa e taw nga ba ngiyal’ miyow kirebnag laniyan’ e masta rorow. 2 I damumuw Farao ngak e gali cha’nem ni l’agruw i tapigpig rok nib tolang, 3 me ta’row nga kalbus ngalan e naun rok e cha’ ni ir e kapten rok girdi’en e matanag ko gin ni bay Josef riy. 4 Ma fa’anem ni kapten rok girdi’en e matanag e pi’ Josef ni ngi i pigpig ngak e gali cha’nem. Mi yow par u kalbus nib n’uw nap’an. 5 Me reb e nep’ u rom u kalbus, me lik’ay fa’anem ni ir e i pu’og e wayin nga kap rok e en ni pilung, ma ku eritay fa’anem ni ir pilungen e lum flowa rok e en ni pilung nu Egypt. Ra bagayow ma bay e birok e lik’ay ni tay nge fan. 6 Fa’ani yib Josef ngorow ni kadbul, me guy ni bay ban’en nike magafan’row ngay. 7 Me fithrow ni ga’ar, “Mang nib kirban’mew e daba’?” 8 Me lungurow, “Ra bagamow ma ke lik’ay, machane dariy be’ u roy nrayag ni nge weliy fan e lik’ay.” Me ga’ar Josef, “I Got e ma tamilang nigey u fan e lik’ay. Mu weliyew e lik’ay romow ngog.” 9 Me weliy fa’anem ni i pu’og e wayin ngalan e kap rok e en ni pilung e lik’ay rok ni ga’ar, “Gu lik’aynag ba ke grapes ni bay u puluwog nga m’on 10 ni bay pa’ngin ndalip pa’. Ma nap’an ni yib yuwan, me yib e floras riy, me lol wom’ngin. 11 Ma bay e kap rok Farao u pa’ag, mu gu fek fapi grape nggu uduy ngalan fare kap, mu gu pi’ ngak Farao.” 12 Me ga’ar Josef, “Ba’aray fan: fa dalip pa’ i pa’ngin e aram e dalip i rran. 13 Ka dalip e rran me chuwegem Farao u kalbus me n’ag fan e kireb rom u wan’, me fulwegem ko maruwel rom; bay um pi’ ngak Farao e kap rok ni bod rogon ni um rin’ faram ko fa ngiyal’nem ni um pu’og e wayin nga kap rok. 14 Machane ra yan i fel’ rogom ma ga leam nigeg, ma ga runguyeg ngam weliy murung’ageg ngak Farao, nge chuwegneg u roy u kalbus. 15 Ya ni fekeg ko nam rok e Hebrew nda nnangeg, mu roy e da gu rin’ ban’en nib kireb riy ni gomanga ir tapgin ni ngan teg nga kalbus.” 16 Fa’ani guy fa’anem ni pilungen e lum flowa ni fan fare lik’ay ni kanog e bfel’, me ga’ar ngak Josef, “Ku er rogon gag ni kug lik’ay; ni bay dalip i dug u daken lolugeg. 17 Bin th’abi lang e dug e bay urngin mit e ggan riy ni kan lith ni gan Farao, machane be kay e arche’.” 18 Me ga’ar Josef, “Ba’aray fan: dalip i dug nir e dalip i rran. 19 Ka dalip e rran ma aram e bayi chuwegem Farao u roy u kalbus me yog ngan th’ab k’angam. Me tiningem nga ba ley i gek’iy ma aram e bay yib e arche’ i longuy e ufin u dowam.” 20 Ma rofen ni gaman e dalip ngay, ma aram e rofen nike taw ko rran nni gargeleg Farao, me ngongliy Farao e mur ni fen urngin e pi tolang ni yad bay u tan pa’; me fek fa’anem nma pu’og e wayin nga kap rok i yib nga p’eowchen fapi tolang, nge fa’anem ni ir pilungen e lum flowa rok. 21 Ma fa’anem nma pu’og e wayin nga kap e fulweg ko maruwel rok; 22 me yog ni ngan tining fa’anem ni pilungen e lum flowa ngalang. Me yan i aw nga rogon ni weliy Josef fan e lik’ay rorow. 23 Machane fa’anem nma pu’og e wayin ngalan e kap rok Farao e daki leamnag Josef — ke pag talin murung’agen.

Genesis 40 (YAPE)

In Other Versions