1 Corinthians 12 (BBT1E)

1 Thuh, na è zey pha Ragung So è lasen hèg chiang ji shii ìd bo. Gu khuiinothek nane bumuiithek wo nathek ne airo izai jishii ìd bone gu yang ro. 2 Nathek ne thieg nathek ne migi arekpho ba shii, nathek ne awie pha bajo lumuii shii lua srane chai oi pha jangbangthek shii misiasia. 3 Gu nathek shii thieg yi pha yang ro hanyie jia magungde Hamangkhung-aphuii ro Ragung è noh ne lua pho ne, “Isu shii athamai!” Chiih-è aishii ne Ragung So è ayua sapho shii ne, “Isu ne Ithong rone” hanyie magungde anuii mua phro. 4 Thiihchiih shii ne Ragung pha ichuathek lasen hèg um ro, jishii ithek shii phi pha ji ne Ragung ò ro. 5 Ichiih shii ne Ithong ro blia rek phi pha ichuathek lumuii um magunde jine ò pha Ithong shii blia rek phi. 6 Ichiih shii ne ichuathek blia rek pha chua um, jishii ò pha Hamangkhung-aphuii è zab shii awairo blia rek mua pha chua phi. 7 Zab shii wie yi pha zab bran shii Ragung um ne lumuii doh yi ro. 8 Ragung è bran jia shii ley khani pha mua phi, chiih-è ò Ragung ji è gai bran shii de ìd pha ley khani um pha mua ji phi. 9 Chiih-è ò Ragung è bran jia shii migi phi, chiih-è gai bran shii ai è gang yi pha blu phi. 10 Ragung è ne bran jia shii ne buangthek pha blia rek yi pha blu phi; chiih-è gai shii ne, Hamangkhung-aphuii ro mua yao yi pha lasen phi; chiih-è gai shii ne, lasen hèg yi Ragung è thog pha ba asi ba ji yo rek yi pha chua phi. Chiih-è giak shii ne a-ìd pha nyuak yao mua pha phi, chiih-è gai shii ne nyie yao pha ji shii yao mua yi pha chua phi. 11 Jishii hìthek zab rek pha ji ne ragung ò nane jia bie ro; ai khi-èrek yang lai ne ji duiine, zab pha bran shii yoyo lasen hèg phi. 12 Siu shii iphen um pha duiine, Masi ne siu jia ro; hì ne yo ichuathek rab magungde, thuh shii siu ne jia ro. 13 Hì duiine, zab gethek ne, Jewthek chiih-è Gaibranthek magungde, khiao magunde ne ichad nede, chiih-è Ragung ò pha siu jia shii khowo yie, chiih-è gethek zab ne Ragung jia è niing pha phi. 14 Siu shii awailum ne ichua jia è arab bie ro, jishii bajo ichua è ro. 15 Laithek è yao, “nyieliieshii gune wad asi, gune siu è rey pha asi ro è yao arone,” Jine ne siu pha ichua arey rone asi ro. 16 Chiih-è khoh è yao, “nyieliieshii gu ne miegthek asi ro, ji-è gu ne siu pha asi ro, ji ne siu pha ichua arey rone asi ro.” 17 Zab pha siu yi mieg bie arone, nyie khi-èrek ne yoi mua phlei? Chiih-è hì yi khoh bie arone, nyie khi-èrek ne no mua phlei? 18 Hì ne nyieliieshii, Hamangkhung-aphuii è nyie khi è chid lei ne siu shii zab yo ichua rab ne ruii. 19 Siu zab yi ichua jia bie arone jine siu asi ro! 20 Ji-è, bajo ichuathek nede jishii siu jia ro. 21 Ji-è chiihphado, mieg è khow shii ayao muii! Chiih-è khrug è de lai shii ayao mua, “Wie, gu nathek shii achid ro” 22 Jishii, zia siu doh pha ichuathek oi arone gune nyie de arek mua; 23 chiih-è ji pha ichuathek shii gethek è bajo adunmey pha now pha ji ne gethek è muna boh gayiig rek; chiih-è gethek è akhie pha riig muii pha siu ichuathek, nyie yi muna khie pha ichuathek achid rone yao pha ji ne bajo wie blia rone gayiig rek. 24 Hamangkhung-aphuii awai è siu ichuathek ò shii rab ne, hanyie yi boh ilab mua sapho ji shii mua yi. 25 Chiih-è ji-è siu ne yoyo rek pha oi ro, jishii zab yo ichuathek ne awaithek chung ò rek bo. 26 Siu pha ichua jia yi diig arone, zab pha ichuathek ne ai rog shii diig gieng bo; ichua jia è chiong arone, zab pha gai ichuathek ne sang shii mathang ro. 27 Nathek zab ne Masi ro siu ro, chiih-è zab jia ne ji pha ichuathek ro. 28 Charch hà Hamangkhung-aphuii è zab shii hanyiehanyie shii ithua hà ruii: Igobi pha ithua shii guaphasamoythek shii ruii, chiih-è nyichiieng pha ithua shii chaigthek shii ruii, chiih-è uomchiieng pha ithua ne masdothek shii ruii; chiihphado hanyie è buangthek rek, chiih-è hanyie shii gang pha blu phi, gaithek shii nong phi, ithek shii yua pha, chiih-è a-ìd pha nyuak yao pha ji shii ro. 29 Ithek zab ne guaphasamoythek, ithek zab ne chaigthek asi ro, chiih-è ithek zab ne masdothek asi ro. Zab pha bran shii ne buangthek pha blia rek pha blu oi ro, 30 miiriie shii gang phi pha, a-ìd pha nyuak yao pha, chiih-è nyie yao pha ji shii yua phi pha blu ne zab shii oi ro. 31 Chiihphado nathek ro lubuthek ne miigak pha lasen hèg shii khriig rek bo. Jimagunde, hì duiine lumuii shii luagieng pha ji ne, zab è wie ro.

1 Corinthians 12 (BBT1E)

In Other Versions