1 John 5 (BBT1E)

1 Hanyie è Isu shii Masaiya rone migi rek ai ne Hamangkhung-aphuii ro ani ro; chiih-è hanyie è aphuii shii miie ai ne dufuii shii de miie ro. 2 Gethek ne Hamangkhung-aphuii shii miie chiih-è ai muyungthek shii nuii pha ji è gethek ne Hamangkhung-aphuii ro aniphiing shii moe rone ìd ruii. 3 Nyieliieshii gethek Hamangkhung-aphuii shii miie pha muyaosiu ji ne gethek airo muyung shii nuii ro. Chiih-è gethek shii ai muyung ne diig asi ro, 4 nyieliieshii Hamangkhung-aphuii ro zab ani ne sohjambling è yang mua ruii phro. Chiih-è gethek ro migi chiang è sohjambling è yang phro. 5 Sohjambling è hanyie yang mua phlei? Hanyie è Isu shii Hamangkhung-aphuii ro Dufuii rone migi rek lei ne ai yang mua bie phro. 6 Isu Masi ne khowo pha kho nane ai iy pha ifai jithek rog shii wuiijong ro. Ai kho rog shii awuii bie ro, jishii kho nane ifai nyimanyi rog shii wuiijong ro. Chiih-è Ragung awai è ji pha miyao jishii khagi rek, nyieliieshii Ragung ne izai. 7 Ji shii ne khagi uom um ro: 8 Ragung, kho chiih-è ifai; chiih-è uom ji ne zab ò khagi phi ro. 9 Gethek ne tharothamang ro khagi shii migi rek; jishii Hamangkhung-aphuii ro khagi ne ji è de bajo chuh ba, chiih-è airo khagi ne awai Dufuii chiang phi ro. 10 Ji-è hanyie è Hamangkhung-aphuii ro Dufuii shii migi rek ai ne hì pha khagi shii awaithek lubu hà ruii; jishii hanyie è Hamangkhung-aphuii shii migi arek, ai ne Hamangkhung-aphuii shii khlam pha rab ro, nyieliieshii ithek ne Hamangkhung-aphuii è awai Dufuii chiang shii yao pha ji shii migi arek ro. 11 Khagi ne hì: Hamangkhung-aphuii è gethek shii idang pha chai phi, chiih-è hì pha chai khrug ne airo Dufuii è ro. 12 Hanyie shii Dufuii um aishii ne hì pha chai um, hanyie shii Hamangkhung-aphuii ro Dufuii oi aishii ne chai de oi ro. 13 Gu ne nathek shii hì zey, ji è nathek ne Hamangkhung-aphuii ro Dufuii shii migi rek pha chiang è nathek ne ìd ruii nathek shii idang pha chai um ro. 14 Hamangkhung-aphuii moe shii gethek ne lububo um, nyieliieshii gethek ne ai è yang pha duiine aishii nyie magunde sia ne ley arone gethek ne izai nuii phro. 15 Gethek è khuchung magun ai ro sia ne ley shii arone nuii phro; chiih-è gethek hì izai rone ìd pha chiang è, gethek ne hì de ìd gethek è aishii lia pha ji ne phi ruii phro. 16 Nathek è migipho shii layog rek pha nane iy pha ji anow pha layog rek pha doh arone, nathek ne Hamangkhung-aphuii shii sia chid, hanyie è ji pha bran shii chai phi. Hì pha miyao ne ithek ro hanyie layog yi iy thog pha anoh. Jishii layog è ne iy pha jiha noh pha de um ro, chiih-è gu ne nathek shii ji pha chiang shii Hamangkhung-aphuii shii sia bone ayao ro. 17 Zab asi pha rek pha ji ne layog ro, jishii layog ne iy thog pha anoh pha de um ro. 18 Gethek ne ìd Hamangkhung-aphuii aniphiing ne layog shii bleb-bleb arek phro, nyieliieshii ithek shii ne Hamangkhung-aphuii Dufuii è ragia rek ruii phro, chiih-è Sakhathong ji è ne ithek shii awie pha arek mua phro. 19 Gethek ne ìd zab sohjambling yi Awiepha Jia ro bokho shii magunde gethek ne Hamangkhung-aphuii ro bran ro. 20 Gethek ne ìd Hamangkhung-aphuii Dufuii wuii chiih-è gethek shii gao yi pha phi, ji è gethek ne izai Hamangkhung-aphuii shii ìd ro. Gethek ne zai Hamangkhung-aphuii rog ò shii rai—Airo Dufuii Isu Masi rog ò shii rai. Jine zai Hamangkhung-aphuii ro, chiih-è ji ne idang pha chai ro. 21 Gu aniphiing nawaithek shii khlam pha hamangkhung-aphuii è ragia ruii bo.

1 John 5 (BBT1E)

In Other Versions