1 John 5 (YAPE)

1 En nra mich u wan’ ni Jesus e ir fare Messiah e kemang be’ ni fak Got; en nib t’uf be’ nib matam rok e ku ba t’uf rok e en ni fak fare matam. 2 Ba’aray rogon ma gadad ra nang nib t’uf rodad e pi’in ni fak Got: fa’anra gadad be par nib t’uf Got rodad ma gadad be fol ko tin keyog ni ngad rin’ed. 3 Ya ba’aray fan ni nge t’uf Got rodad: fan e ngad folgad ko tin keyog ni ngad rin’ed. Ma tin keyog ni ngad rin’ed e gathi rib mo’maw’, 4 ya ra reb i fak Got mrayag rok ni nge gel ko tin nde m’agan’ Got ngay u fayleng. Ba’aray rogon ma gadad gel ko pin’en nde m’agan’ Got ngay u fayleng: fa’anra pagan’dad ngak Kristus. 5 Mini’ e rayag ni gel ko tin nde m’agan’ Got ngay u fayleng? Kemus ni en nike mich u wan’ ni Jesus e ir Fak Got. 6 Jesus Kristus e ir fa’anem ni yib ni ran ko tawfe rok nge racha’en ko yam’ ni tay e micheg ko ir mini’. Gathi yib ni kemus ni ran e mich rok, machane ran nge racha’. Ma fare Kan Nthothup e ke micheg nib riyul’ e ren’ey; ya fare Kan Nthothup e ir e riyul’. 7 Dalip ban’en ni be micheg e re bugithin ney, 8 fare Kan Nthothup, nge ran, nge racha’; ma dalip ni gubin ni be micheg e re bugithin ney. 9 Ke riyul’ u wun’dad e mich riy nike pi’ e girdi’; ma mich riy nike pi’ Got e kab gel, ni ireray e mich nike pi’ Got u murung’agen Fak. 10 Ere en nra michan’ ngak e en ni Fak Got e bay e re mich ney u laniyan’; machane en nde mich Got u wan’ e aram e ke yog ni Got e be lifith l’ugun, ya de mich u wan’ e tin keyog Got ni murung’agen Fak. 11 Ere ba’aray e mich riy: Got e ke pi’ e yafos ndariy n’umngin nap’an ngodad, nre yafos nem e yib ngodad u daken Fak. 12 En ni bay Fak Got rok e bay e re yafos ney rok; ma en ndariy Fak Got rok e dariy rok e re yafos ney. 13 Kug yoloy e re bugithin ney ni ngeb ngomed ni bochan e ngam nanged nike yag e yafos ndariy n’umngin nap’an ngomed — ni gimed e pi’in ke michan’med nga fithingan e en ni Fak Got. 14 Aram fan nib pagan’dad u p’eowchen Got; bmuduwgil u wun’dad nra rung’ag e tin ni gadad be yog ni fa’an gadad ra ning ban’en ngak ni ban’en nib m’agan’ ngay. 15 Demturug e ngiyal’ ni gadad ra ning ban’en ngak ma be rung’ag e n’en ni gadad be yog; ere fa’anra gadad manang nib riyul’ e re bugithin ney, me ere ka gadad manang ni gadad ra ning ban’en ngak ma ra pi’ ngodad. 16 Fa’anra guy be’ walagen ni girdi’en Kristus nike ngongliy reb e denen ni dabi fek fa’anem ko yam’, ma susun e nge meybil ngak Got, ni ir e ra pi’ e yafos ngak fa’anem. Re bugithin ney e bay rogon ngak e pi’in ni kar ngongliyed e denen ni dabi fekrad ko yam’. Machane bay e denen nma fekey ko yam’, ma dagur yog ni ngam meybilgad ngak Got u murung’agen e binem. 17 Urngin e kireb ni yima ngongliy ma denen, machane bay e denen ni dabi fekey ko yam’. 18 Gadad manang ndariy be’ ni kemang fak Got ni kayigi pi’ nga daken be denen, ya en ni Fak Got e be ayuweg fa’anem, ma Fa’anem nib Kireb e dabkiyag ni nge rin’ ban’en ngak. 19 Gadad manang nib mil fadad ngak Got, ma tin ni kabay e girdi’ nu fayleng e ke suweyrad Fa’anem nib Kireb. 20 Gadad manang ni en ni Fak Got e ke yib ma ke tamilangnag an’dad ni ngad nanged fa bin riyul’ e Got. Gadad bay u fithik’ e bin riyul’ e Got — u fithik’ Fak ni Jesus Kristus. Ir e bin riyul’ e Got, ma ir e yafos ndariy n’umngin nap’an. 21 Pifakag, mpired u orel rok e tin nde riyul’ e got!

1 John 5 (YAPE)

In Other Versions