John 10 (BBT1E)

1 Isu è yao, gu nathek shii izai yao dang phro: Bran hanyie yi shiishai ruii pha muthua pha gak è awuii pha gai muthua è khurog ne wuii pho ne mugo nane riao pha bran ro. 2 Bran hanyie magungde shiishai muthua gak è wuii ruii pho ne shiishai brapho ro. 3 Chiih-è gak khan pho è aishii gak hong phi srane; awai shiishai shii ibeng è ho mage shii shiishai è muspho ro gow gao dun ne, muspho è jishii fuang hà lua noh phro. 4 Ai è fuang hà noh mage shii, awai yi ibi hà lua, chiih-è shiishai ne ai idoh hà luagieng, nyieliieshii shiishai è ai gow gao phro. 5 Ai ne gai pha bran rog shii alua pha ai ne ji pha bran è ruang ran marui phro, nyieliieshii ai ne ji pha bran gow ne agao ro. 6 Isu è ji pha najang è yao shii, ji pha miyao jine nyie yao pha ji ne ithek è agao mua. 7 Ji-è Isu è yao, gu nathek shii izai yao phro: Gune shiishai gak ji ro. 8 Chiih-è è gu è ibi gai khinyama wuii pho ne mugo nane riaopho ro, jimagungde shiishai è de ai miyao anuii ro. 9 Gune gak ro, hanyie gu è gud ne iliing wuii ruii arone ji pho ne ragia rey ruii phro. Ai ne iliing gu shii wuii ne chiih-è fuang wuii srane saing rey chie ruii phro. 10 Mugopho ne mugo go pha nane ua pha chiih-è srobro rek pha wuii phro. Gu è wuii pha ji ne nathek shii bajo ley chai mua yi pha wuii phro. 11 Gune wie shiishai brogpho ro, hanyie è shiishai chiang shii iy yang pha ji ro. 12 Riinang rek bie ne shiishai pha shiishai brogpho ne, shaliie wuii ruii pha doh mage shii shiishai thoh maruii srane rum ne ran dun phro; ji-è shaliie è shiishai shii thak ne dayiingdayang rek ne ruii mua phro. 13 Riinang pha shiishai brogpho ne ran marui phro, nyieliieshii ai ne riinang pha bran bie ro chiih-è shiishai shii wie ariig ro. 14 14-15 Gune wie brogpho ro, chiih-è Aphuii de gu shii thieg, chiih-è gu de Aphuii shii thieg, ji duiine gu è gui shiishai shii thieg chiih-è shiishai de gu shii thieg. Chiih-è gune shiishai chiang shii de nya-iy yang phi phro. 16 Ichiih rugo shii oi pha guro shiishai ne thiisa hà shiishai gaithek de um ba ro. Gune aishii de noh chid phro; ithek de guro gow yoi ruii phro, chiih-è ithek ibrog shii de brogpho jia pha shiishai brog pha shiishai rey ruii phro. 17 Aphuii è gu shii miie, nyieliieshii gune gui chai de phi yang phro ji-è gune idoh mua din ro. 18 Hanyie magungde guro chai ariao mua phro. Gune guilum ne phi mua phro chiih-è gu shii ne phi pha rangsua de gui shii um ro. Chiih-è ji idoh yi din pha rangsua de gui shii um ro. Hì ne gu Aphuii è gu shii yung ne rek yi ro. 19 Ji pha miyaogamthek ji nuii srane thiichiih pha branthek ne dinne yo chedun. 20 Bajo giak bran è yao, “Aishii ne ibuii um ro! Ai ne ibiu ro! Nyie rek ne nathek ai miyao nuii phlei?” 21 Jishii giak è yao, “Ibuii um pha bran ne ji è rek pha miyao ayao mua phro! Nyie khi-èrek ne ibuii è miegthi bran shii mieg doh mua yi phlei?” 22 Hakhangshak rey sha shii, Jerusalem hà Hamangkhung-aphuii Misiahò khud pha sai ramuii. 23 Isu yi Hamangkhung-aphuii Misiahò hà Solomon ro ithua sibiang shii luaramuii. 24 Thiichiih shii bran wuii khrab thog ne aishii sai, “Nane dinne de gathek shii khinyma nowdak ne rai ba yi habey? Gathek shii sang yao mage bo: Na ne Masi bey?” 25 Isu è chang, “Gu è nathek shii khuchung mujo yaojong ro, jimagungde nathek ne migi anow. Chiih-è nyie blia yi gu è rek pha ji ne Hamangkhung-aphuii pha riichai è gu chiang shii khagi yao ro; 26 Jishii nathek ne migi anow phro, ji-è nathek ne guro shiishai asi ro. 27 Guro shiishai ne guro gow yoi, chiih-è gune aishii de thieg, chiih-è ai ne gu rog luagieng phro. 28 Gune ithek shii idang pha chai phi ruii phro, chiih-è ai ne khuchung de a-iy phro. Hanyie magungde ithek shii gu è ariao mua phro. 29 Guro aphuii è gu shii nyie phi pha ji ne zab è de boh ro, chiih-è hanyie magungde aphuii è wie gayiig pha ji ne ariao mua phro. 30 Aphuii nane gune jia bie ro.” 31 Chiihphado bran è aishii chao pha lubao chiing. 32 Isu è aishii yao, “Aphuii è gu shii rek bo ne phi pha blia wie ne gu è nathek ibi rek phi; chiih-è nyie blia re-è nathek gu shii lubu è chao pha now phlei?” 33 Ithek è chang, “Gathek de naro blia wie ji-è ne na shii lubu achau mayang, jimagungde na è Hamangkhung-aphuii shii biwo yao, na ne bran bie jishii nawaishii Hamangkhung-aphuii rab ro!” 34 Isu è chang, Hamangkhung-aphuii è nathek ne biidiie pha hamangkhung-aphuiithek rone yao pha ji ne nathek ro Iphey shii de zey ne um ro. 35 Gu ne thieg, Jigi shii yao pha ji ne idang pha izai chak ro; chiih-è hanyie shii airo mua phi jong pha bran shii ne Hamangkhung-aphuii è chad rone ho ro. 36 Gu shii ne Hamangkhung-aphuii è gua srane sohjambling shii thoh ge. Nyie khi-èrek ne, nathek ne gu è Hamangkhung-aphuii ro Dufuii rone yao pha ji ne biwo yao phro ne yao ne bey? 37 Gune Hamangkhung-aphuii è yang pha blia ji arek arone, gu shii migi arek rabo. 38 Jishii gu ai è yang pha ji shii rek shii rek magunde nathek gu shii migi anow ro, nathek ne gu è rek pha ji è aphuii gu shii um rone chiih-è gune aphuii rog shii um rone nathek ne gu blia shii ìujia ne migi rek miidang bo. 39 Ithek è aishii dinne zum pha rek shii, jishii Isu ithek wad è thua mua ne dun dun. 40 Chiihphado Isu Jordan pha khamuii thrang hà Jon è khowo phi muii pha ithua shii dun ne thiichiih shii rai. 41 Aishii bran bajo wuii thog srane yao. “Jon è ne buangthek pha blia ne arek, jimagungde ai è hì pha bran chiang shii nyie yao pha ji ne izai chak ro.” 42 Chiih-è thiichiih shii bran è de aishii bajo migi rek.

John 10 (BBT1E)

In Other Versions