Luke 12 (BBT1E)

1 Itham bran yi ò jia shii khrab thog mage shii, ithek ne awaithek chung thum rai dun. Jishii igobi Isu è awai samoy shii yao, Pharisithek ro awie pha muphak ji è nawaithek shii ragia rek bo, gu è yao pha miyao yi nathek ne lubo shii bran ro. 2 Nyie magunde chiiag ne ruii pha ji ne achiiag mua phro, chiih-è nyie magunde ug ne ruii pha ji ne thieg dun phro. 3 Chiihphado, nyie magunde na è igiia hà yao ji ne isang moe hà yoi dun phro, chiih-è nyie magunde na è ùgud bin srane ji hà suak ne yao magunde hò lakhung pha zak hà ziak dun phro. 4 Gu ijakthek, gu nathek shii yao, hanyie è na siu shii ua bie pha ji shii ne arum rabo jimagunde dinne nyie de buii arek mua phro. 5 Gu ithek shii riig yi hanyie shii rum chid: ua pha idoh, hanyie, shii thumluii hà fen pha blu um pha, Hamangkhung-aphuii shii rum bo. Gu shii migi now bo, nathek rum chid pha ne ai jia ro! 6 “Adili nyi shii fuiisrai guii aliu bey? Thiih rang de Hamangkhung-aphuii è fuiisrai jia shii ableng ba ro.” 7 Nathek khrug pha khaziang rang de zab tham ne ruii phro, ji è nathek ne arum chid rabo. Nathek ne fuii è de bajo igong ro! 8 Gu ithek shii ji yao hanyie magunde de bran moe shii yaodang arone ai ne gu rog è chak ara, ji duiine ne Bran Dufuii de aishii Hamangkhung-aphuii hamangkhliie moe shii è rek phi phro. 9 Jishii hanyie è branthek moe shii gu shii snai arone, Bran Dufuii è de Hamangkhung-aphuii hamangkhliie moe shii aishii de snai ruii phro. 10 Hanyie jia è de Bran Dufuii shii buii miyaogam yao magunde nya khung phi phro; jimagunde hanyie è Ragung So shii buii yao arone, khuchung de akhung phi ruii phro. 11 Khuchung magungde ithek è nathek shii Jewthek misiahò hà nane bohkhoh pha badri, hà noh pha bidiang magunde, nawaithek shii ragia khi-èrek chid chiih-è ithek nyie yao chid pha ji ne munow adiig chid rabo. 12 Ji è rek pha ishak shii nathek nyie yao chid pha ji ne Ragung So è nyayua ruii phro. 13 Bran jia yi ibrog iliing è Isu shii yao, “Masdo” Gu khuii shii yao ne aphuii mutho marui pha nuruii ji gu shii thang sha noh bo. 14 Isu è aishii chang, “Gu ijak, na sa duchoi shii nuruii dang pha chiih-è che phi pha rangsua ne gu shii hanyie miphi lei?” 15 Chiih-è ai zab thek shii yao, nowbthan ne zab pha giichak pha ji è nawaithek shii ragia rek bo; nyieliieshii bran ro izai chai ne awai mana nane bukho è arab ro. Ai khinyama pha bukho magunde nyie achun phro. 16 Chiihphado Isu ji pha najang è shan ne yao: Luang jia bukho bran jia ro soh shii wie iwoi rey. 17 Ai jao ne awailum ne now, gu shii ne iwoithek ruii pha ithua de oi, ji è gu ne nyie rek sha? 18 Hì ne gu nyie rek sha; ai è awai shii yao, gu ne thazan yi chuak ne boh jia rung din srane, garo nying nane zab pha mana yi jishii chab ne ruii chid. 19 Chiihphado gu ne gui shii yao, khirzey bran! Na shii ne idam bajo thog pha nyie chid pha de zab mana na shii um, ji è nane bajo idam liijiing è sieng ne, chie ne, niing ne, lubo rek phro! 20 Jishii Hamangkhung-aphuii è aishii yao, na ne bi-ìe ro! Hì pha habiu shii na ne nawai sieng pha ji ne thoh chid phro; ji è na è nawai shii ruii pha mana hì thek ne hanyie mua phlei? 21 Chiihphado Isu è yao, “Ji duiine ne ji pha bran de awai shii bajo bukho rab ne ruii jishii Hamangkhung-aphuii mieg moe hà ne bukho asi ro.” 22 Chiihphado Isu è awai samoythek shii yao, chiih-è gu nathek shii yao nathek sieng ne rai pha michie chid pha chiih-è nathek siu shii guii pha yungthek shii sam diig anow chid rabo. 23 Chai ne michie re-è de bajo mugak ba ro, chiih-è siu ne yung è de bajo mugak ba ro. 24 Amiiethek shii riig mage bo: Ithek ne iriiethek de ahai chiih-è yamiing de akhrab; ithek shii chab ne ruii pha ùgud nane thazan de oi; jishii Hamangkhung-aphuii è ithek shii phi! Nathek ne fuii è de bajo mugak ba ro! 25 Ji è nathek ne hì thek samdiig srane nawai sieng pha phiang nyarek mua ne bey! 26 Nathek ne ididuii shii rang de khriig arek mua shii, nyie um ne nathek gai muna shii sam diig phlei? 27 Riig mage bo nyie khi-èrek ne jabiing pha ibuathek rang sieng khlei: ithek ne blia de arek chiih-è awaithek ro yung de arab. Ji-è gu nathek shii yao saja Solomon ro khinyama pha nuruii pha yung khie um magunde jishii ibuathek nyama khie oi ro. 28 Hì ne saing shii yung guii phi pha Hamangkuhng-aphuii ro hì pha saing ne sudoh ichiih shii um chiih-è thimiang ne shong ne, siphie bai hà fu muii. Ji-è ai ne ithek zab shii ai è de lahuak ne yung aguii phi habey? Nathek shii ne migi ìu um bie ara. 29 Ji-è ithek ne idang ne nyie chie nyie niing pha jithek shii sam adiig chid rabo. 30 (Ichiih sohjambling phothek Hamangkhung-aphuii shii athieg pho ne hì pha mana shii munowthiig.) Nathek aphuii ne nathek hì è chid phro è thieg phro. 31 Ji phachiang è, airo Sajathua pha ji shii sam diig now bo, chiih-è ai ne na shii jithek phi ruii phro. 32 Arum chid rabo, guro ìu ibrog, nathek Aphuii è nyu ne Sajathua ne nathek shii phi ro. 33 Nathek shii nuruii um pha ji zab liu srane ji pha bang yi dusho shii phi bo. Khuchung magunde de amua pha nuruii baneb jia nawai shii khriig rab ne ruii bo, chiih-è naro nuruii ne Hamangkhung hà khrab ne ruii bo, thiisa hà nathek è de ìu arek phro, nyieliieshii mugo phothek de ayie mua phro, chiih-è dakhyem è de awie pha arek mua phro. 34 Khi hà nathek ro nuruii um lei ne nathek ro lubu de idang ji hà um phro. 35 Hanyie magunde wuii ruii shii blia rek pha yung guii sra chiih-è na ro ichuangthek chuang ne ruii bo. 36 Khiao duiine ne awai ithong shii phi pha michie è khuchung idoh dun ruii pha ji khan ne habin chokh ruii shii wuii srane khthiie habin hong phi. 37 Khinyama sang phro ithek shii Ithong è idoh dun ne riig shii khiao ithek ne khriig sieng ne rek iang pha doh yi ne! Gu ithek shii yao, ai è awai shungkho than srane ithek shii dug yi pha yao phro, chiih-è ithek shii chie yi phro. 38 Habiu pha duchoi magunde chiih-è idoh hà dun magunde khriig rek iang pha doh arone khinyama sang phro! 39 Chiih-è nathek hì de khriig thieg bo, mugo pho khuchung wuii ruii pha ishak ji yi hò muspho è thieg arone, ai ne mugo pho shii awai hò amua yi phro. 40 Chiih-è ithek, wie, è saro iang bo, nyieliieshii ithek è aishii aluthong pha ishak shii Bran Dufuii ne wuii ruii phro. 41 Phithar è sai, “Ithong, hì pha najang yi gathek shii thoh ne yao ne ba, chiih-è zab shii yao ne bey?” 42 Ithong è chang, chiihphado, hanyie, yi wie nane izai khiao ga? Ai ne chiihphado awai ithong è aishii dumuii rek ne, hò gayiig pha chiih-è gai khiao ithek chiang pha michie khriig ishak shii dong phi. 43 Ithong hò hà dun thog ne riig shii ji duiine ne rek iang pha doh arone ji pha khiao shii ne bajo sang ruii phro. 44 Ji-è, gu nathek shii yao, ji è rek pha khiao shii ne ithong è awai nuruii shii dumuii rab ne ruii muii phro. 45 Jishii ji pha khiao ji è awai shii yao, airo ithong ne idoh dun pha bajo chia iwa inow srane gai khiao hò-aphuii thek shii nane hò-amuii thek shii zuang srane niing thiig ne rai arone, 46 chiihphado khiaothek è aishii aluthong pha chiih-è ji pha ishak ithek è a-ìd shii nai jia Ithong idoh de thog srane, ji pha khiao jishii ne dumdum tham srane miyao anuii pha rek pho rog shii fen mua. 47 Khiaothek shii masdo è nyie rek bo ino pha ji ìd pho ne awaithek shii khriig arek phi arone, jishii ne ithek rog shii bajo zuang phro. 48 Jishii ithong è nyie chiid pha ji khiao hanyie è athieg ba arone, chiih-è thiih midi jia zuang sapho rek magunde ìu zuang bie yi pha ro. Bajo phi ne ruii pha bran shii bajo chid din ruii phro, bajo phi ne ruii pho shii bajo lia ruii phro. 49 Gu thiwing ne sohnyiak shii bai fuii wuii phro, chiih-è gu miiyang ji ne hùb pha jao ro! 50 Gu shii khowo mua ba pha um, chiih-è gu ji ajong sapho shii ne khinyama diig shii ro! 51 Gu ichiih sohjambling shii liijiing phi wuii phro ithek inow ne bey? Asi, liijiing asi, gu che pha wuii phro. 52 Sudoh è thiwing haliing shii bran guii yi che ruii phro, bran uom è bran nyie shii gidieg rek ruii phro chiih-è nyi è uom shii gidieg rek ruii phro. 53 Aphuii è dufuii shii gidieg rek ruii phro, chiih-è dufuii è aphuii shii gidieg rek ruii phro; amuii è dimi shii, chiih-è dimi è amuii shii gidieg rek ruii phro; khiing è icho shii chiih-è icho è khiing shii gidieg rek ruii phro. 54 Isu è branthek shii de yao, “Nathek sakhamiing shii hanaiyem bsa è rek ruii pha doh mage shii, nathek ji riig srane yao haphie phie sharuii ro è yao shii haphie phie ruii. 55 Chiih-è nathek khuchung magunde hanai chiu è hasam sam ruii pha than mage shii nathek è yao ijieg rey sha ruii ro, chiih-è ji rey. 56 Lawasdai! Nathek sohnyiak nane hamangkhung shii rang thieg mua shii; ji arone nyie rek ne nathek duchung shii ishak ji agao mua lei? 57 “Nathek nawaithek shii izai ji rek pha nyie rek ne achua lei? 58 Yang ne ithek shii nawaithek gidieg è gui rai pha miyao yie ne wuii ruii arone nawaithek rek mua pha ji rek srane chua bsa hà anow ba pha ibi shii lumuii hà nawaithek miyao ò rai pha rek bo. Ji asi shii ne ai è na thek shii chua pho hà noh srane, chiih-è chua pho è siphahi shii phi mua, chiih-è siphahi thek è phatheg hà chab muii. 59 Gu nathek shii yao, nathek è bang aphi sapho shii ne na ne sha phatheg hà rai dun phro.”

Luke 12 (BBT1E)

In Other Versions