Genesis 4 (BONCB)

1 U-Adamu wembatha lomkakhe u-Eva, wasezithwala, wabeletha uKhayini. Wathi, “Ngosizo LUKATHIXO sengibelethe indoda.” 2 Muva wabeletha umfowabo u-Abheli.U-Abheli waba ngumfuyi wemihlambi yezimvu, uKhayini yena wasebenza umhlabathi. 3 Ngokuya kwesikhathi uKhayini waletha ezinye izithelo zomhlabathi ukuba ngumnikelo KUTHIXO. 4 Kodwa u-Abheli waletha izitho ezinonileyo zisuka kwamanye amazibulo omhlambi wakhe. UTHIXO wathokoza ngo-Abheli kanye lomnikelo wakhe, 5 kodwa kathokozanga ngoKhayini lomnikelo wakhe. Ngakho uKhayini wazonda kakhulu, lobuso bakhe bahloba. 6 UTHIXO wasesithi kuKhayini, “Uzondeleni na? Kungani ubuso bakho buhlobile? 7 Nxa usenza okulungileyo, kawuyikwamukelwa yini? Kodwa nxa ungenzi okulungileyo, isono sikucathamele emnyango wakho; sinxwanele ukukuthumba, kodwa kumele usehlule.” 8 UKhayini wasesithi kumfowabo u-Abheli, “Ake sihambe siye egangeni.” Kwathi bekhonale egangeni uKhayini wamhlasela umfowabo u-Abheli wambulala. 9 UTHIXO wasesithi kuKhayini, “Ungaphi umfowenu u-Abheli na?”Waphendula wathi, “Angazi. Ngingumgcini womfowethu na?” 10 UTHIXO wathi, “Usuyenzeni? Lalela! Igazi lomfowenu liyakhala kimi lisuka emhlabathini. 11 Manje usuqalekisiwe njalo usuxotshiwe kuwo umhlabathi ovule umlomo wawo ukwamukela igazi lomfowenu lisuka esandleni sakho. 12 Lapho uwusebenza umhlabathi kawusayi kuthela amabele kuwe. Uzakuba luzulane emhlabeni.” 13 UKhayini wathi KUTHIXO, “Isijeziso sami singaphezu kwamandla ami. 14 Lamuhla usungixotsha elizweni, ngakho sengizasithela ngingabi khona kuwe; ngizakuba luzulane olungela kuphumula emhlabeni, kuthi loba ngubani ongifumanayo angibulale.” 15 Kodwa UTHIXO wathi kuye, “Akunjalo; lowo ozabulala uKhayini uzaphindiselwa ngokuphindwe kasikhombisa.” Ngakho UTHIXO wasebeka uphawu kuKhayini ukuze kuthi lowo omfumanayo angambulali. 16 Ngakho uKhayini wasesuka emehlweni KATHIXO wayahlala elizweni laseNodi, empumalanga kwase-Edeni. 17 UKhayini wembatha lomkakhe, wathatha isisu wazala u-Enoki. Ngalesosikhathi uKhayini wayesakha idolobho alibiza ngendodana yakhe u-Enoki. 18 Ku-Enoki kwazalwa u-Iradi, yena u-Iradi waba nguyise kaMehujayeli, uMehujayeli waba nguyise kaMethushayeli, uMethushayeli waba nguyise kaLameki. 19 ULameki wathatha abafazi ababili, omunye ethiwa ngu-Ada, omunye ethiwa nguZila. 20 U-Ada wazala uJabhali; owayenguyise walabo abahlala emathenteni befuye izifuyo. 21 Ibizo lomfowabo lalinguJubhali; wayenguyise wabo bonke abatshaya umhubhe lechacho. 22 UZila laye waba lendodana, uThubhali-Khayini, owayekhanda zonke inhlobo zezinto ngethusi langensimbi. Udadewabo kaThubhali-Khayini wayenguNahama. 23 ULameki wathi kubomkakhe,“Ada loZila, ngilalelani;bafazi bakaLameki, zwanini amazwi ami.Sengibulele umuntu ngenxa yokungilimaza,ijaha ngoba lingihlasele. 24 Nxa uKhayini ephindiselwa kasikhombisangakho uLameki amatshumi ayisikhombisa lesikhombisa.” 25 U-Adamu waphinda wembatha lomkakhe njalo, wazala indodana wayithi nguSethi, esithi, “UNkulunkulu usengiphile omunye umntwana endaweni ka-Abheli, njengoba uKhayini wambulala.” 26 USethi laye waba lendodana, wayibiza ngokuthi ngu-Enoshi.Ngalesosikhathi abantu baqala ukukhuleka bebiza ibizo LIKATHIXO.

Genesis 4 (BONCB)

In Other Versions