John 1 (KBT1ETNIK)
1 Inphutna ah Chongkha aleiom; Chongkha Pathian le inleiom, halli Chongkha Pathian alei eii. 2 Inphutna makheiya Chongkha Pathian le inleiom. 3 Ang rakip-hi ama diangnga inphut Pathian in ibool eii; Ma inchel lekleiya phur inkhat-um injirra kaleiom ommak. 4 Amadiang ringna kha aleiom, halli ringna kha miringngai war kha alei eii. 5 War khan aziingna-ah awarjei, halli akaziing in warkha leimaneiimak. 6 Pathian diangnga inphut injuotir araming John inti miring inkhat aleiom. 7 Achongril kha miring rakip in injetnasikle ngamnasik-ah ama'n war jarra sakhi kapesik-ah ijuo eii. 8 Ama warkha emak; takkha war jarra sakhi kapesik kajuokha eii. 9 Manmasituolla kajuo mirakip ka-eel minwar amahi war akadiktak kha eii. 10 Ama kha manmasituolla aleiom, halli manmasituol kha ama diangnga inphut ibool eii, kha e-innum manmasituol in ama kha leijetmak. 11 Ama'n amitak ngaidiang aleijuo, halli amitak ngai'n ama kha leidonmu. 12 Takkha, ama ramingnga inngamna-ah ama karalaang miring rakipdiang, Pathian sangai enasik ama'n ranak apeii. 13 Inmani ngaikha thiya, taksa i-ngaidonna, khat-um miring i-ngaidonna injuonei kha emu takkha Pathian diangnga inphut in eii. 14 Chongkha miring taksa-ah juo-injir, riangwai khat-um akadik in asip-ah einile aomsuom; Apa diangnga inphut Asa inkhatbit ena ama lurna kha eini'n nimujei. 15 John in ama jarra sakhi eya aleikheek, “Hiwa miring pahi ejei kei'n ama jarra kileirilkha,” Kei nuk-ah kajuo ama'n kei neek-ah alokwiai, ajarchu kei matiang ama aleiomjei. 16 Ama riangwai sipna jarra eini rakip in rawaan inkhat chungnga rawaan kha nimujei. 17 Ajarchu Dan kha Moses diangnga inphut ajuopeii, takkha riangwai khat-um akadik khachu Jisu Christa diangnga inphut kajuo kha eii. 18 Tuteii inkhat innum Pathian kha mumu; Asa inkhatbit, apa koolla kaom, Ama'n Pathian kha anaminjet. 19 Jerusalemma inphut Jihudi ngai'n Thiampu ngai khat-um Levi ngai'n John diang “Tu na-eme?” tia karakel inheitir phakhan, 20 Ama'n thuplekleiya “Kei Messiah kha emong” tia aleirilsuok. 21 “Angme halle?” “Nang Elijah na ebe?” intia inmani'n inleirakel. “Kei emong” tia ama'n aleimasang.“Nang Pathian chongkachoipa na ebe?” tia inmani'n inleirakel.“Emong” tia ama'n aleimasang. 22 Halle “Nang tu na-eme?” tia inmani'n inleiti. “Keini'n kanaheitir ngaidiang masangnasik nang tutak ka-eii na-intime?” 23 Pathian chongkachoipa Isaiah ileitikha angnga John in aleiti:“Kei chu ‘ramruok-ah kakheek-ah kaom miring inkhat rasa kha ka eii:Pumi sina sik-ah lam kha mintuunru!’ ” 24 Inmani ngaikha Pharisee ngai ihongtir kha in eii. 25 Halli inmani'n John diang inleirakel, “Nang Christa, Elijah, emakli Pathian chongkachoipa um na-emak inle, angjarra nang in baptize nileiminthome?” 26 John in inmanidiang aleimasang, “Kei'n tuiya baptize kamintho, takkha nangni karra ning-ijetmak miring khat a-ngirra om. 27 Ama hi-eii, kei kanuk-ah kajuo, takkha ama kekok kaliiksik um rahoi emong.” 28 Hiwahi John in baptize aleiminthona Jordan tuidung raaltiang Bethany khuokhan aleisuok. 29 Khawa ziingkhuo warra Jisu'n amadiang iheiwa kha John in aleimuwa, aleiti, “Enru, Pathian Keelngamteii, manmasituol pumpui manu karoonsuopa! 30 Ama hi ejei ‘Kei kanuk-ah kei neek-ah kalok miring inkhat ajuo tia kileirilkha, ajarchu kei kamatiang ama aleiomjei.’ 31 Kei kapumtak innum ama kha leijetmong; takkha ama kha Israel ngaidiang minlarnasik jarra kei'n tuiya baptize kaminthoa kajuo.” 32 Halli John in sakhi apeya aleiril, “Kei'n Ratha kha marwaan makheiya Wathu angnga juochumma khat-um ama chungnga juochuong kha kaleimu. 33 Kei kapumtak innum ama kha leijetmong, takkha tuiya baptize minthoro tia kanajuotir ama'n keidiang ati, ‘Miring inkhatdiang Ratha khan juochumma halli ijuochuong nimu, Ama kha eii Ratha Inthiangnga baptize kamintho kha.’ 34 Kei'n kamujei halli ama hi Pathian Sapa eii tia sakhi kapeii.” 35 Khawa nikhuo thengnga inlet-ah John in asiamruoi innile a-ngirra aleiom, 36 Ama'n Jisu ihongkha aleimuwa aleiti, “Enru, Pathian Keelngamteii!” 37 Siamruoi inni ngai'n ama'n hiwa itihi inleijet, halli inmani'n Jisu nukkha injuijei. 38 Jisu'n hei-inlet ah inmani'n anuk inheijui kha aleimuwa inmanidiang aleirakel, “Angkeme ning-entok?”Inmani'n amadiang inleiti, “Rabbi” (hiwa tinachu “Karu”), “Nang hunme niom?” 39 “Heiwa inlang juo-enru,” tia Ama'n aleimasang. Inmani'n inheiwali ama omna kha injuomu, halli phadan mili jochulpha kholei alei eii jarra inmani-um khawa nikhuo nichu Jisu le inleiom suomjei. 40 Inni ngai karra miring inkhat John chongril jetli Jisu nuk kajuipa kha, Simon Peter naipa Andrew alei-eii. 41 Ama'n a-upa Simon intongpui masa-ah aleiti, “Keini'n Messiah kha kinmujei.” (Hiwa tinachu “Christa”). 42 Halli ama'n Simon kha Jisu diang aheikeiruoi.Jisu'n alei-enna amadiang aleiti, “Nang John sapa Simon na-eii takkha Cephas tia innakoisik eii.” (Peter tinale in-angrip “Lungpui” tina eii). 43 Khawa nikhuo thengnga Jisu'n Galilee ah sisik alei-ngaidon. Ama'n Philip intongpuiya aleiti, “Kanuk najuiro.” 44 Philip, Andrew li Peter omnakhuo Bethsaida khuopui makheiya eii. 45 Philip in Nathanael intongpuiya amadiang aleiti, “Moses in Dan khan ileimajia khat-um Pathian chongkachoi ngai innum inleimajia, Joseph sapa Nazareth makheiya Jisu kha keini'n kinmujei.” 46 Nathanael in amadiang aleiti, “Nazareth makheiya ang akatha hongsuok niyame?”Philip in amadiang aleiti, “Heiwa inlang juo-enro.” 47 Jisu'n Nathanael khan amadiang iheiwa kha aleimu halli amadiang aleiti, “Enru, Inthiang Israel miring, amadiang kadikmak iteii ommak.” 48 Nathanael in Jisu diang aleiti, “Angtho tholia nang in kei ninajetme?”Jisu'n amadiang aleimasang, “Philip in nakoimaklai nang in Theichangkuung nuoiya naomlai, Kei'n kanamusuojei.” 49 Nathanael in aleimasang, “Rabbi,” “Nang Pathian Sapa na-eii! Israel ngai Reng kha na-eii!” 50 Jisu'n amadiang aleimasang, “Kei'n nang Theichangkuung nuoiya kanamu kati jarra nang in nina-ngamnabe? Nang in hiwangai neek-ah kalok angjet nalamusik eii.” 51 Jisu'n amadiang aleiti, “Kei'n akadik kha nangdiang kinati eii, nang in marwaan inlong halli Pathian Tirton ngai'n Miring Sapa diang inchum inkal kha namusik eii.”