Ezra 10 (MAAL)

1 ዒዝራ ጌኤዦ ማኣሮኮ ቤርቶ ዛላ ፆኦሲ ሺኢቃኒ ጉምዓታዖ ዬኤኪ ዬኤኪ ማዺንቴ ጎሞ ቢያ ፆኦሲም ቡኡፃ ዎዶና ዓቲንቆንታ ላኣሎንታ ናኣታኣ ዓቱዋዖ ፓይዳ ሚርጌ ማዔ ዒስራዔኤሌ ዓሲ ፔቱሞና ዒዛ ኮይላ ሙኪ ቡኪ ዒኔ ሜቂ ዬኤካኔ። 2 ዒማና ዔላኣሜ ቶኦካፓ ዬሂዔኤሌ ናኣዚ ሼካኒያ ዒዝራም፦ «ጎኔና ኑኡኒ ኑ ዓሺኖይዳ ዓኣ ሜሌ ዓሶይዳፓ ላኣሎ ዔኪፆና ፆኦሲዳ ኑኡኮ ዓኣ ጉሙርቂንቲፆ ኑ ፓጪሴኔ፤ ዬይ ቢያ ማዔቴያ ሃሢ ዒስራዔኤሌ ዓሶም ሃጊ ማዓንዳ ዎዛ ዓኣኔ። 3 ሃሢ ዬንሢ ሜሌ ዓሶይዳፓ ኑ ዔኬ ላኣሎ ዔያቶኮ ናኣቶና ዎላ ዓንጃንዳያ ኑና ኮይሳሢ ኑ ፆኦዛሢም ኑ ጫኣቆም፤ ኔናንታ ኑ ፆኦዛሢኮ ዎጎ ቦንቻ ሜሌ ዓሶንታ ኑና ዞራ ዞሮ ቢያ ኑ ማዺ ኩንሣንዳኔ፤ ሃሣ ፆኦሲኮ ዎጋኣ ዓይሣሢ ቢያ ኑ ማዺ ኩንሣንዳኔ፤ 4 ዬያ ቢያ ማዺሲ ኑና ኩንሢሳንዳሢ ኔናታሢሮ ዔቄ፤ ኑኡኒ ኔና ማኣዳንዳኔ፤ ዒጊጪፖ፥ ዶዴ» ጌዔኔ። 5 ዬያሮ ዒዝራ ቄኤሶንታ ሌዊ ዓሶንታ ሃሣ ዴሮኮ ሱኡጋ ዬይ ሼካኒያ ሺኢሼ ማሊፆ ዔኬያ ማዒፆ ጫኣቂሴስካፓ ማዾ ዓርቄኔ። 6 ዬካፓ ዒዝራ ጌኤዦ ማኣሮኮ ቤርቶ ዛላ ዓኣ ቤዛፓ ዔቂ ዔሊያሺቤ ናኣዚ ዮሃናኔ ናንጋ ቆልዖንሢ ጋሮ ጌሌኔ፤ ዲዒንቴዞንሢ ጉሙርቂንቲፆ ፓጪሲሢና ማዼ ዻቢንቶና ቢያ ዒ ዖዪ ዖዪ ዬኖ ዋንቶ ዒኢካ ዎርቄኔ፤ ዒማና ዒ ካሣንታ ዋኣሢያ ካኣሚባኣሴ። 7 ዲዒንቶይዳፓ ማዔዞንሢ ቢያ ዬሩሳላሜይዳ ቡኪንታንዳጉዲ ዬሩሳላሜና ዪሁዳ ዓጮናይዳ ቢያ ኬኤዚንቴኔ። 8 ዬይ ቢያ ዴሮ ሱኡጋ ዞሬ ዞሮና ዓይሢፆና ማዺንቴያኬ፤ ሃይሦ ኬሊዳ ዬያ ቡኪንቶ ሙካኒ ዳንዳዒባኣ ዓይጎ ዓሲያ ዓኣቶ ዒዛኮ ዓኣ ባካ ቢያ ዓርቂንቲ ዔውታንዳጉዲና ዲዒንታፓ ማዔ ዓሶኮ ፔቱማፓ ኬስካንዳጉዲ ኬኤዚንቴኔ። 9 ዬይ ዔኤሊፃ ዳኪንቴሢዳፓ ሃይሦ ኬሊዳ ዪሁዳና ቢኢኒያሜ ዓጮናይዳ ናንጋ ዓሳ ቢያ ታዞጳሳ ዓጊና ፄኤሬ ላማታማሶ ዓቦና ዬሩሳላሜ ሙኪ ጌኤዦ ማኣሮኮ ዓሳ ቡካ ጶኦካ ቡኪንቴኔ፤ ዒማና ኮሺ ፑኡፒ ዒርዚ ዋርቃኔ፤ ያዺታቶዋ ቡኪንቴላ ኮሺ ኮይሳያታሢሮ ፔቴ ፔቴ ዓሳ ጪኢዦና ጎጋይቂ ጎጋይቂ ዋይዛኔ። 10 ቄኤሳሢ ዒዝራ ዔቃዖ፦ «ዒንሢ ዒንሢኮ ጉሙርቂንቲፆ ፓጪሲ ጴዼኔ፤ ሜሌ ዓሶይዳፓ ላኣሎ ዒንሢ ዔኬሢሮ ዒስራዔኤሌይዳ ዻቢንቲኮ ጋሌ ዒንሢ ዔኪ ዬዔኔ። 11 ዓካሪ ሃካፓ ሴካ ናንጊና ናንጋ ጎዳ ማዔ ዒንሢኮ ቤርታኣ ዓዶንሢ ፆኦዛሢ ቤርታ ዒንሢኮ ጎሞ ቢያ ቡኡፁዋቴ፤ ዒዛ ዎዛሳ ባኣዚ ቢያ ማዹዋቴ፤ ኑ ዓጮይዳ ናንጋ ሜሌ ዓሶይዳፓ ቢያ ዱማዹዋቴ፤ ዒንሢ ዔኬ፥ ሜሌ ዓሶ ማዔ ላኣሎ ኬሱዋቴ» ጌዔኔ። 12 ዬያሮ ዬይ ቡኪንቴ ዓሳ ዼግ ጌዔ ዑኡሲና፦ «ኔኤኒ ጋዓ ባኮ ቢያ ኑኡኒ ማዻንዳኔ!» ጌዔኔ። 13 ላሚ ሃሣ ኬኤዛዖ፦ «ሃሢ ሃይካ ቡኬ ዴራ ሚርጌኬ፤ ዬያይዳ ሃሢ ዼኤፒ ዒርዚያ ዋርቂ ዋርቂኬ፤ ሃይካ ማኣሪባኣ ቤስካ ዔቃኒ ኑ ዳንዳዒባኣሴ፤ ዬያ ጎሞና ቱርጲንቴ ዓሳ ኑ ሚርጌታሢሮ ሃያ ባኮ ቢያ ፔቴና ላምዖ ኬሊናይዳ ማዺ ጋፒሳኒ ኑም ዳንዳዒንቱዋሴ። 14 ዬያሮ ኑኡኮ ሱኡጋ ሃይካ ዬሩሳላሜይዳ ዬኖ ጌኤዜሎ ኮሺ ዛጊ ጌስቶንጎ፤ ዬካፓ ሜሌ ዓሶ ማዔ ላኣሎ ዔኬ ዓሶ ቢያ ፔቴ ፔቴሢም ዓይሢንታ ኬሎማና ዒ ናንጋ ካታሞ ሱኡጎና ዎጎ ዎጋ ዓሶና ዎላ ሙኪ ሙኪ ፔጊዳ ዓጎና ባኮ ዔኮንጎ፤ ፆኦሲ ዻጋዼ ባኮ ዛሎ ኑ ዬያይዴቴ ጎሪንታ ሺማንዳኔ» ጌዔኔ። 15 ዬይ ኬኤዚንቴ ዎዶና ሜሹላሜና ሌዊ ዓሢ ሻቤታዬና ዔያቶኮ ማሊፆ ቃራኬ ጌዔ፥ ዓሳሄሌ ናኣዚ ዮናታኣኔና ቲቂዋ ናኣዚ ያህዜያፓ ዓታዛ ሜሌ ዒፂ ማኬ ዓሲ ባኣሴ። 16 ዲዒንታፓ ማዔ ዓሳ ቢያ ዬኖ ማሊፄሎና ዔኤዒ ጊኢጌኔ፤ ዬያሮ ቄኤሳሢ፥ ዒዝራ ቶኦኮ ቶኦኮኮ ሱኡጎ ባኣካፓ ኬሲ ማዺሻንዳ ዓሲ ዶኦሪ ሱንፆ ዎሊ ሄሊሲ ፃኣፒ ጌሤኔ፤ ዔያታ ታጳሳ ዓጊና ፄኤሬ፥ ቤርታሳ ዓቦና ሜሌ ላኣሎ ዔኬ ዓሶ ሃይሶ ጌስቲሢ ዓርቄኔ። 17 ዬካፓ ሄሊሴ ዓጊኖኮ ቤርታሳ ኬሎ ሜሌ ላኣሎ ዔኬ ዓሶ ሃይሶ ጉቤ ጌስቲ ጋፒሴኔ። 18 ሜሌ ዓሶ ዜርፆፓ ላኣሎ ዔኬ ዓሶኮ ሱንፃ ሃካፓ ዴማ ዓኣ ጎይፆኬ፦ዒዮፄዴቄ ናኣቶ ማዔ ዒያሱና ዒዛኮ ጌርሲንሢ ቶኦካፓ ኬስኬዞንሢ፦ ማዕሴያ፥ ዔሊዔዜሬ፥ ያሪቤና ጌዳሊያና፤ 19 ዔያታ ፔኤኮ ላኣሎ ዓንጂ ዳካኒ ጫኣቄስካፓ ዔያቶኮ ጎሞ ጌኤሺፆም ማዓ ፔቴ ዓዴ ማራይ ሚቺ ዒንጎ ዒንጊሢ ማሂ ሺኢሼኔ። 20 ዒሜሬ ቶኦካፓ፦ ሃናኒና ዜባድያና 21 ሃሪሜ ቶኦካፓ፦ ማዕሴያሄ፥ ዔሊያሴ፥ ሼማዒያ፥ ዬሂዔኤሌንታ ዑዚያንታ፤ 22 ፓሽሁሬ ቶኦካፓ፦ ዔልዮዔናዬ፥ ማዕሴያ፥ ዒስማዔኤሌ፥ ናትናዔኤሌ፥ ዮዛባዴና ዔልዓሳና፤ 23 ሌዊ ዓሶ ፃጳፓ፦ዮዛባዴ፥ ሺምዒ፥ ቄሊፃ ጌይንታ ቄላያ፥ ፔታህያ፥ ዪሁዳና ዔሊዔዜሬና፤ 24 ፆኦሲ ቦንቾም ዓይኑሞ ዓይናዻ ዓሶ ፃጳፓ፦ዔሊያሺቤ ሻሉሜ፥ ፄሌሜና ዑሪና፤ 25 ሃንጎ ዒስራዔኤሌ ዓሶኮ፦ፓርዖሼ ቶኦካፓ፦ ራሚያ፥ ዪዚያ፥ ማልኪያ፥ ሚያሚኔ፥ ዓላዜሬ፥ ማልኪያና ቤናያና፤ 26 ዔላኣሜ ቶኦካፓ፦ ማታኒያ፥ ዛካሪያሴ፥ ዬሂዔኤሌ፥ ዓብዲ፥ ዬሬሞቴና ዔሊያና፤ 27 ዛቱ ቶኦካፓ፦ ዔልዮዔናዬ፥ ዔሊያሺቤ፥ ማታኒያ፥ ዬሬሞቴ፥ ዜባዴና ዓዚዛና፤ 28 ቤባዬ ቶኦካፓ፦ ዮሆናኔ፥ ሃናኒያ፥ ዛባዬና ዓትላዬና፤ 29 ባኒ ቶኦካፓ፦ ሜሹላሜ፥ ማሉኬ፥ ዓዳያ፥ ያሹቤ፥ ሼዓሌና ዬራሞቴና፤ 30 ፓሃትሞዓኣቤ ቶኦካፓ፦ ዓድና፥ ኬላሌ፥ ቤናያ፥ ማዕሴያ፥ ማታኒያ፥ ቤፃልዔኤሌ፥ ቤኑዬና ሚናኣሴና፤ 31 31-32 ሃሪሜ ቶኦካፓ፦ ዔሊዔዜሬ፥ ዪሺያ፥ ማልኪያ፥ ሼማዒያ፥ ሲሞኦኔ፥ ቢኢኒያሜ፥ ማሉኬና ሼማሪያና፤ 33 ሃሹሜ ቶኦካፓ፦ ማታናዬ፥ ማታታ፥ ዛባዴ፥ ዔሊፔሌፄ፥ ዬሬማዬ፥ ሚናኣሴና ሺምዒና፤ 34 34-37 ባኒ ቶኦካፓ፦ ሜዕዳዬ፥ ዓምራሜ፥ ዑዔኤሌ፥ ቤናያ፥ ቤድያ፥ ኬሉሂ፥ ዋኒያ፥ ሜሬሞቴ፥ ዔሊያሺቤ፥ ማታኒያ፥ ማትናዬና ያዕሱና፤ 38 38-42 ቢኑዬ ቶኦካፓ፦ ሺምዒ፥ ሼሌምያ፥ ናኣታኒ፥ ዓዳያ፥ ማክናዳባዬ፥ ሼሻዬ፥ ሻራዬ፥ ዓዛርዔኤሌ፥ ሼሌሚያ፥ ሼማሪያ፥ ሻሉሜ፥ ዓማሪያና ዮሴፔና፤ 43 ኔቦ ቶኦካፓ፦ ዬዒዔኤሌ፥ ማቲቴያ፥ ዛባዴ፥ ዜቢና፥ ያዳዬ፥ ዒዩዔኤሌና ቤናያና፤ 44 ዬይ ዓሳ ቢያ ሜሌ ፃጳፓ ላኣሎ ዔኬ ዓሶኬ፤ ዔያታ ዔኬ ሜሌ ፃጶ ላኣሎ ቢያ ዓንጂ ዔያቶኮ ናኣቶና ዎላ ዳኬኔ።

Ezra 10 (MAAL)

In Other Versions