Ezra 10 (TOMA)
1 Siɛgi zu Ɛsedalase laaʋɛa ɠɛni de zooi ma, é ɗa wɔlɔ, GALA sei ʋɛlɛi laaʋɛ, é ɗa niima ƓALA falii ta tosɔgai nii ɠɛ, Izilayɛle nuɓusɛi ma mɔinmɔin ge ɠaalɛɛni ba koba, zunuiti ta anzanuiti ta doungoiti, ti ɗa wɔlɔ ga gola. 2 Naazu Yeɠiyɛle ná-doun zunui Sekania, é ga Elame mavofodai ta, naa ɠɛni Ɛsedalase ma: «Gi ɠɛa ga wooʋalada nuiti gá-ƓALAGI ʋɛ, ga gi lii vai gi wɛɛn anzanuiti fulu zii ɠiligiti saama, niiti ti zooi nii zu. Kɛlɛ kito ko ɠa dɛ Izilayɛle ʋɛ niima vai zu. 3 Ade minazeɠe niina ada-ƓALAGI ʋɛ ga ada wɛɛn anzanui niiti kpɛɛ ta ti-lointi, eɠɛʋelei màliɠii Ɛsedalase ná-tɛnɛgi la, ta niiti kpein ti ada-ƓALAGI ná-deveiti sosu. Ade ná-tɔgiti so kpaan. 4 Wuzeɠe, tɔɔzei ɗa ɠa ɗa niima vai ɠaaɠula ba. Kɛlɛ gá yɛsu è ʋa, zɛbɛzeɠe, è kɛ!» 5 Ɛsedalase wuzeɠeni, é kpɛɛlagi la zalaɠa ɠula nuiti ta-ɠundiɠiiti bu, ta Levi geleiti, ta Izilayɛle nuiti pɛ, ga ti ɠona ga ta naa ɠɛ, nii ti bogai. Ti pɛ ti ɠonani. 6 Naa ʋoluma Ɛsedalase zeɠeni GALA sei ʋɛlɛi ma ɠoizuʋɛ, é li Eliasiɓe ná-doun zunui Yoɠanan laazuʋɛ, é ɲi ná, kɛlɛ é ɠɛlɛni daamianigi pɛ ba ta kpɔle aniiti pɛ, mazɔlɔɔ é ɠɛni wɔlɔzu Izilayɛle luɔ wɔlɔmaiti ta-ɠoto wolaiti faa zu. 7 Ti sɛʋɛi leʋeni názu Zuda yooi zu ná pɛ ta Zeluzalɛme, ga niiti kpein ti ɠɛa duɔlai zu, ti ɠalegai ma, ti ɠaalɛ ba Zeluzalɛme. 8 Kundiɠiiti ta totuɠɔiti ti deveni ga zɔi nɔpɛ é la ʋaani folo saʋagɔ laawu, kɔligiti ta ve Ɠɔoɠɔ GALAGI ʋɛ, tɔ ɓɔɠɔi ɠa ɠula naati saama, ti ɠulaai duɔlai zu. 9 Zuda ta Ɓɛnzamɛn zunuiti kpein ti ɠaalɛɛni ba Zeluzalɛme folo saʋagɔ laawu. Naa ɠɛɛni alugi laaʋuusiɛi ma volo ʋuufelegɔi (20) ma. Nuɓusɛiti pɛ ti ɠɛni zeini GALA sei ʋɛlɛi ma ɠoizuʋɛ, ti ɗa ɓali, tɔɔzei naama vai ʋa ti ɠɛni su, ta tonai é ɠɛni ʋuuzu ga sabalagi. 10 Zalaɠa ɠula nui Ɛsedalase wuzeɠeni, é ɠɛ ti ma: «Wooʋaladai ɠa wo kɛai ga wo wɛɛn anzanuiti fulu vai, wo ta ɓɔga Izilayɛle nuɓusɛiti ta-ɠoto ɠasɔi ʋa. 11 À laa zɔ ga niina Ɠɔoɠɔ GALAGI ʋɛ, wo-ɠɛɛni ta-ƓALAGI, wo ziima vai ɠɛ, à bali ma wa zooi nii zu nuɓusɛiti, ta wɛɛn anzanuiti.» 12 Nuɓusɛiti pɛ ti gooɠaaʋoteni ga woo wola, ti ɠɛ ma: «Gi-yee ɠa bu! Gá naa ɠɛ, nii è bogai! 13 Kɛlɛ nuɓusɛi mɔinʋɛ, tonai ɠaa é ʋuuzu, nu la zooga yɛsu eteaʋɛ, niima vai mu ge la vɔlɔ ga folo ɠila ɓaa folo felegɔ vaa nɔ, mazɔlɔɔ gi ma mɔinmɔin, gi tɔ koloɠologi ɠɛɛʋɛ niima vai zu. 14 Gá pɔ ga gá-ɠundiɠiiti ti yɛ nuɓusɛi yeema, zɔiti kpein ti wɛɛn anzanuiti fuluai, naati ti ɗa ʋa ti ʋɔ ta ta-laa ɠundiɠiiti, naa ʋɛɛ tukpɔɠaaleʋe nuiti ba, kui naa ma, nii togai ti ʋɛ, ga niima vai ɠaaɠulazu ba ga pagɔ eyɛsu gá-ƓALAGI ná-ziiɠaawana wolai zeɠe gi maala.» 15 Azayɛle ná-doun zunui Zonatan, ta Tikava ná-doun zunui Yaziya, naa ʋɛɛ Mesulame ʋa ta Levi nui Saɓetayi, naati gila kpe nɔ ɠa ti ɠɛlɛni naa ma levei ʋa. 16 Izilayɛle nuiti niiti ti ɠulani duɔlai zu, naati pɛ ti vaani bu. Zalaɠa ɠula nui Ɛsedalase yiimazeɠeni pɛlɛyeɠe ɠundiɠiiti pɛlɛyeɠeiti kpein saama, é yeeloni ti ɠilagilagi kpein ba. Ti ta-zei lɔɔzeini alugi ʋuusiɛi ma volo mɔungi ma nii a kɛ ti niima vai wuuʋɛtɛ. 17 Alu mɔungi ma volo mɔungi, ti ɓeni ga zunuiti kpein ta-vaiti gaaɠula ba, niiti ti wɛɛn anzanuiti fuluni. 18 Zalaɠa ɠula nuiti ti-mavofodaiti saama, tanigaa ti wɛɛn anzanuiti fuluni, naama nuiti daaseigiti ka ga nii:Yosadake ná-doun zunui Zozuwe mavofodaiti saama, ta kɛɛɠɛlointi: Maaseya, Eliyezɛɛl, Yaliɓe, ta Gedalia. 19 Ti minazeɠeni, ti ɠona ga ta ti-anzaiti kpɛɛzu, naa ʋolu ti baala sinɛ ɠilagila kula ga faazuɓɛtɛ zalaɠai ta-ɠotoi ma zuvaayɛ fai zu. 20 Niiti ti ɠɛni Imɛɛl mavofodaiti saama, ti ɠɛni ga:Ɠanani ta Zeɓadia. 21 Niiti ti ɠɛni Ɠalime mavofodaiti saama, ti ɠɛni ga:Maaseya, Eli, Semaya, Yeɠiyɛle ta Woziase. 22 Niiti ti ɠɛni Pasuul mavofodaiti saama, ti ɠɛni ga:Eliyɔyenayi, Maaseya, Isemayɛle, Netaneyɛle, Yozaɓade ta Eleyasa. 23 Niiti ti ɠɛni Levi nuiti saama, ti ɠɛni ga:Yozaɓade, Simeyi, Kelaya é lolisu ɓalaa ga Kelita, Petayia, Zuda ta Eliyezɛɛl. 24 Nii é ɠɛni gɛingɛin gani nuiti saama, naa ɠɛni ga:Eliasiɓe. Niiti ti ɠɛni siɠida makɛ nuiti saama, ti ɠɛni ga:Salume, Telɛme ta Uli. 25 Niiti ti ɠɛni Izilayɛle nui mɔtaiti saama, ti ɠɛni ga:Paleyɔse mavofodai zu geleiti ti ɠɛni ga:Lamia, Yiziya, Malikiya, Miyamine, Eleazaal, Malikiya ta Ɓenaya. 26 Elame mavofodai zu geleiti ti ɠɛni ga:Matania, Zakali, Yeɠiyɛle, Aɓidi, Yelemɔte ta Eli. 27 Zatu mavofodai zu geleiti ti ɠɛni ga:Eliyɔyenayi, Eliasiɓe, Matania, Yelemɔte, Zaɓade ta Aziza. 28 Ɓeɓayi mavofodai zu geleiti ti ɠɛni ga:Yoɠanan, Ɠanania, Zaɓayi ta Atalayi. 29 Ɓani mavofodai zu geleiti ti ɠɛni ga:Mesulame, Maluke, Adaya, Yasuɓe, Seyale ta Lamɔte. 30 Paɠate-Moaɓe mavofodai zu geleiti ti ɠɛni ga:Adana, Kelale, Ɓenaya, Maaseya, Matania, Ɓɛsaleyɛle, Ɓinuwi ta Manasé. 31 Ɠalime mavofodai zu geleiti ti ɠɛni ga:Eliyezɛɛl, Yisiya, Malikiya, Semaya, Simiyɔn, 32 Ɓɛnzamɛn, Maluke ta Semalia. 33 Ɠasume mavofodai zu geleiti ti ɠɛni ga:Matenayi, Matata, Zaɓade, Elifelɛte, Yelemayi, Manasé ta Simeyi. 34 Ɓani mavofodai zu geleiti ti ɠɛni ga:Maadayi, Amalame, Uwɛle 35 Ɓenaya, Ɓedia, Keluɠu, 36 Vania, Melemɔte, Eliasiɓe, 37 Matania, Matenayi, Yaasayi, 38 Ɓani, Ɓinuwi, Simeyi, 39 Selemiya, Natan, Adaya, 40 Makenadebayi, Sasayi, Salayi, 41 Azalɛle, Selemiya, Semalia, 42 Salume, Amalia ta Zozɛfe. 43 Neɓo mavofodai zu geleiti ti ɠɛni ga:Yeiyɛle, Matitia, Zaɓade, Zeɓina, Yadayi, Zowɛle ta Ɓenaya. 44 Zunui niiti pɛ ti wɛɛn anzanuiti fuluni, ma mɔinmɔingaa ti doun zɔlɔɔ ti ʋa.