Luke 3 (MKNFD)
1 Sisa Taiberius, ma Romna gagrirta ramoot paŋan ndeaca, kɨpca iarira 15na mɨn mbuŋ. Na an mɨn, Pontius Pailat, ma Iudiana inik bubuocrena ramoot paŋan, na Erot ma Galilina inik bubuocrena ramoot paŋan, na mana lapmbitac Pilip, ma Ituriaapa Tarakonitisna inik bubuocrena ramoot paŋan, na Lisanias, ma Abilenena inik bubuocrena ramoot paŋan. 2 Na Anasapa Kaiapas, maniŋa taup ndamoot paŋan aniacniŋ ndeacri. Na an iar mbuŋa Sekaraiana nuoc Ion, ma ramtaɨr kocorta taup ndeacri. Na an mɨn, Raraŋ Aetaniacna kamma Ion ndambuŋ ndaruca. 3 Ainda moca Ionna taŋga oc Iodanna inikna auŋembca mbukca. Ma meikramtaɨrmo gan kam wiwitirina, “Nena iroar inkar ŋgetrikica Raraŋ Aetaniaca raŋgaica kɨtac puk aŋgɨ te, Raraŋ Aetaniac nena tɨpemb ŋgorikta makukar, ma mo kecarinande.” 4 Ri, an reac, ramma morina ramoot Aisaiana timbigta kapna nininina, kirara gaindoprina, “An ramtaɨr kocorta taupca, ramoot ianna kamma gaind ŋgaca mboprina, ‘Kacootna taup matau te, mana taupemb gepairinanmo wandoŋai. 5 Te, pacwɨkɨn aupi kɨtac te, taukruirmo kocnai rɨŋi bɨrɨrɨ iriki mbirac. Te, taupembca muruŋa gegebar ndeaceknandap kocnai wandoŋai. Te, taupembca laiŋga wanaiŋ, ne mimo muruŋa moi laŋa mo. 6 Te, gan tiacarpaik ndeacrena meikramtaɨra watna, na an aiŋa, Raraŋ Aetaniaca morinanna, anna ai mac nda aŋgɨna aiŋ.’” 7 Meikramtaɨr wɨt aniaca kɨpca Ionna par mbuŋa kɨtac puk aŋgɨna moca, ma mimo aindopatna, “Ne nduop ŋgoreacna mombonik, Raraŋ Aetaniaca nenmo nikkakatap, na ma nenmo mo ŋgocrainandet. Na mandaia nemo mbopca ne kɨpcarina moek? Ne an nikkakatta iukaiit, co wanaiŋ? Ma nemo larunande. 8 Na ne ndorita iroar inkarmo gidkar koinda ŋgetriki te, nena tɨpembca ndori nemo wandacnande, ne ndorita iroar inkar maŋgetrikiri. Na ne ainda kai lamŋi teac, ne tɨpemb ŋgorikta moca kɨpcarica gaindopna, ‘Abraam, ma aina aterta nicar ŋgamrirta aet.’ Ne ainda kai mbop teac. Aku nemo aindopnandet, Raraŋ Aetaniac ma gan watur puŋga ma Abraamna nicar ŋgamrirta mombonikca, mo laruna mɨn. 9 Na oteac ianna ikirta mɨnɨŋa kocroca maeacreke. Na ikira lour laiŋga gɨwaca er ŋgocortanmo, anna muruŋa kocnaii waci irikca kataci aŋgɨri tac nake mbuknande.” 10 Ma aindopri, meikramtaɨr wɨt aniaca mamo gainda digirina, “Aia tida moit?” 11 Ri, ma mina kammo gaind mac nda rutirina, “Ne mandaia tik ŋgapaoc mbuniŋapnan, u ramoot ianna wanaiŋ ndeaceknanna neaŋ. Mandaia amta reikap eaceknan, u toco ainda mo.” 12 Ma aindopri, kitcartukar iurena ramtaɨr ndeida, mitoca kɨpca kɨtac puk aŋgɨna moca, mina manmo digica, “Riripti, aia tida moit?” 13 Aindopri, ma mimo aindopatna, “Nena aiŋirta kitukndukara, min tɨkrina ŋgaŋganŋgɨna kituknduk niŋgik naaŋgɨ, ne kai iu kun teac.” 14 Aindopri, lapoca ruŋrena ramtaɨr ndeid toca kɨpca, mamo gainda digirina, “Aia tida moit?” Ainda digiri, ma mimo aindopatna, “Ne ramtaɨrta kitukndukar aŋgɨna moca, minmo tamtamma kai pi teac, mina tikembca, kai paru teac. Nena aiŋna kituknduk niŋgik aŋgɨ.” 15 Ma aindopri, meikramtaɨrta iroara ŋgepca gagraca mina muruŋna nikinik iroara tamtam ŋgoinna gaind ndamŋica, gaindopca, “Anna Ion, Raraŋ Aetaniaca babuca mbagɨrica kɨpca aimo mac nda aŋgɨna ramoot ki?” 16 Aintik Ion, ma mimo gaindoprina, “Aku puk mbuŋa nemo kɨtac pukca monande. Na ramoot ian ma iŋmbai nakɨpnande. Mana gargara aukna gargarmo tamuŋ ŋgoin. Na ma aukmo kunda tamuŋ ŋgoin, na ma ramoot totour ŋgoin. Aintik aku manap aiŋa mona mɨnna wanaiŋ. Ma nemo Ŋeroŋ Rat mbuŋapa tac mbuŋa kɨtac pukca monande. 17 Ma mandeaca makocroca, witmo ma kacopca lour laiŋga irik te, lapea roumbmbaia irik te, ma lourmo aŋgɨri witna kac inikca tɨkcarica ma ŋaŋawirmo aŋgɨri, an taca mba pikrenan nake mbukca, ma loriraŋnande.” 18 Karica Ion, ma kabena kam ndeidap mac mboprina, ma mina iroara mo ŋgepna moca an tɨp kirara ma meikramtaɨrmo kam wembaŋ laiŋ wiwitirina. 19 19-22 Meikramtaɨr wɨt aniaca an ndeacrenanna muruŋa Ionna par mbuŋa kɨtac puk aŋgɨri, na an mɨnna Iesus toca kɨtac puk aŋgɨracarica ma mbendeiri, tamuŋna auŋa gootatke. Ŋeroŋ Ratta man ndambuŋ ŋgirikrinanna, man ndambuŋmo ŋgorac riŋnaina kirar toc, ŋgirikca mana paŋan nambat ndeacri. Na tamuŋna auŋna kam ianna aindopatna, “U aukna Nuoc. Aku unmo mamatŋi ŋgoin. Aukna nikinik iro umo toŋtoŋ ŋgoin.” Na Erotta ma tɨpemb ŋgorik wɨtapna ramoot, ma ŋgepca ndona lapmbitacna meac Erodiasmo tɨp ŋgoreaca mac mori. Ainda moca Ion, ma an Galili bubuocrena ramoot paŋan Erotmo kaega morina. Ri, Erot ma ŋgepca kabena tɨp ŋgoreac ianna an nambat mac mamoat, ma Ionmo aŋgɨra kac ŋgoreaca mac matɨkat. 23 Na an mɨnna Iesusa ndona aiŋ aŋgɨa ŋgepatna mɨnna, mana iarira 30na mɨn. An mɨn mbuŋa ma ndona aiŋ aŋgɨra ŋgepatke, meikramtaɨra, mina mamo anmo Iosepna nuoc ndopca. Na Iosep ma Elina nuoc. 24 Na Eli ma Matatna nuoc.Na Matat ma Liwaina nuoc.Na Liwai ma Melkina nuoc.Na Melki ma Iannaina nuoc.Na Iannai ma Iosepna nuoc. 25 Na Iosep ma Matatiasna nuoc.Na Matatias ma Emosna nuoc.Na Emos ma Naumna nuoc.Na Naum ma Eslina nuoc.Na Esli ma Nagaina nuoc. 26 Na Nagai ma Maatna nuoc.Na Maat ma Matatiasna nuoc.Na Matatias ma Semenna nuoc.Na Semen ma Iosekna nuoc.Na Iosek ma Iodanna nuoc. 27 Na Ioda ma Ioananna nuoc.Na Ioanan ma Resana nuoc.Na Resa ma Serubabelna nuoc.Na Serubabel ma Sialtielna nuoc.Na Sialtiel ma Nerina nuoc. 28 Na Neri ma Melkina nuoc.Na Melki ma Adina nuoc.Na Adi ma Kosamna nuoc.Na Kosam ma Elmadamna nuoc.Na Elmadam ma Erna nuoc. 29 Na Er ma Iosuana nuoc.Na Iosua ma Elieserna nuoc.Na Elieser ma Iorimna nuoc.Na Iorim ma Matatna nuoc.Na Matat ma Liwaina nuoc. 30 Na Liwai ma Simeonna nuoc.Na Simeon ma Iudana nuoc.Na Iuda ma Iosepna nuoc.Na Iosep ma Ionamna nuoc.Na Ionam ma Eliakimna nuoc. 31 Na Eliakim ma Meleana nuoc.Na Melea ma Menana nuoc.Na Mena ma Matatana nuoc.Na Matatta ma Natanna nuoc.Na Natan ma Dewitna nuoc. 32 Na Dewit ma Iesina nuoc.Na Iesi ma Obetna nuoc.Na Obet ma Boasna nuoc.Na Boas ma Salmonna nuoc.Na Salmon ma Nasonna nuoc. 33 Na Nason ma Aminadapna nuoc.Na Aminadap ma Atminna nuoc.Na Atmin ma Arnina nuoc.Na Arni ma Esronna nuoc.Na Esron ma Peresna nuoc.Na Peres ma Iudana nuoc. 34 Na Iuda ma Iakopna nuoc.Na Iakop ma Aisakna nuoc.Na Aisak ma Abraamna nuoc.Na Abraam ma Terana nuoc.Na Tera ma Nakorna nuoc. 35 Na Nakor ma Serukna nuoc.Na Seruk ma Reuna nuoc.Na Reu ma Pelekna nuoc.Na Pelek ma Eberna nuoc.Na Eber ma Selana nuoc. 36 Na Sela ma Kainanna nuoc.Na Kainan ma Arpaksatna nuoc.Na Arpaksat ma Siemna nuoc.Na Siem ma Noanna nuoc.Na Noa ma Lamekna nuoc. 37 Na Lamek ma Metuselana nuoc.Na Metusela ma Enokna nuoc.Na Enok ma Iaretna nuoc.Na Iaret ma Maalalelna nuoc.Na Maalalel ma Kenanna nuoc. 38 Na Kenan ma Enosna nuoc.Na Enos ma Setna nuoc.Na Set ma Adamna nuoc.Na Adam ma Raraŋ Aetaniacna nuoc.