Luke 3 (TOMA)
1 Tiɓɛɛl Sezaal ná-masadai ma ɠona puugɔ maazu lɔɔlugɔi (15) ma, siɛgi zu Pɔnse Pilate ɠɛni zeini la Zudé unda, Elɔde ɠɛni ga Galilé masagi, kɛɛɠɛloin Filipe ɗa masadai ɠɛ Itulé ta Talakɔnite unda, Lisaniyase ga Aɓilɛne masagi, 2 Ane ta Kayife ti ɠɛni ga zalaɠa ɠula ɠundiɠi wolaiti. Naama ziɛgi nɔ zu, GALA ge ɓɔɛni Zakali ná-doun zunui Zan ʋɔ teʋebai zu. 3 É liini Zuludɛn maaɠoolii zu ná pɛ, é ɗa GALA daawooi laazeeli, é ɗa ɠɛ ma: «À wo-ziɛ ʋelei maavalibo, wo ɓatize, naa ɠa a kɛ wo zuvaayɛ ga wa-ɠotoiti.» 4 Ʋele ɠana naama wooi laazeelini la, nii sɛʋɛai GALA goo wo nui Ezayi ná-sɛʋɛi zu ga:«Nui ta ɠa ɓainsu teʋebai zu, é ɗa ɠɛ ma:‹À Maliɠii ná-pelei ɓɛtɛ bɛ.À ná-pele goiti sɔle. 5 Pɛtugiti pɛ daa ɠa ʋaazu vesu,gize ɠaaɠoozagiti ta gize goiti pɛ ta ɠolo, ti ɠaa ɠɛ sɔli,pele zuɓilikpiligiti ta ʋaazu zɔlesu,pele zuɠuɠuza kuɠuzagiti maa ɠa loun seinsein. 6 Naazu ɛsɛ pɛ ka kizogi ʋɛtɛ, nii GALA ge feezu.›» 7 Bɛbɛ wolai nii é ɠɛni ʋaazu Zan ʋɔ bɛ ɓatize fai ma, é ɠɛni ɠɛɛzu ti ma: «Pɛɛɠaali zuwuzuiti! Ɓɛ ɠa é wo ɠalaga ga wo ʋela GALA ná-ziiɠaawanai ʋa, é ʋaazu? 8 À kɛɛwotiiti kɛ, niiti ti dɛɛzu ga wo wo-ziɛ ʋelei maavaliboga. À mina bo yiimaʋɛ ga: ‹Ada ga Abalaame mavofodaiti.› Mazɔlɔɔ gè bo wo ma, zobogi ɠa GALA bɛ, é kɔtui niiti falibo ga Abalaame mavofodaiti. 9 Zoovɛi laa ɠana vɔlɔ gulu zapeiti ba. Gulu nɔpɛ, é la gwaa ʋagɔ wosu, naa ɠa leʋe ga, é ʋili abui zu.» 10 Bɛbɛi ɠɛni Zan ɠaazaɠasu, ti ɗa ɠɛ ma: «Leeni ɠa gá kɛ mu?» 11 É ɠɛni ti wooɠaaʋotesu, é ɠɛ ti ma: «Zɔi seɠewuzeɠe felegɔ zea, é gaaɠwɛ ti yɔɠɔzu ta zɔi ta la zea. Zɔi ɓalaa ɠɔnɔgi zea, naa kɛ ɠana tɔ ɓalaa.» 12 Mulu zo nuiti ɓalaa ti ʋaani ti ɓatize fai ma. Tiya ɓalaa ti gaazaɠani, ti ɠɛ ma: «Kalamɔn, lee ɠa gá kɛ?» 13 É ɠɛni ti ma: «À mina ta la naa ma, nii deveai.» 14 Salaʋusuiti ɓalaa ti gaazaɠani, ti ɠɛ ma: «Gá ma, lee ɠa gá kɛ?» É ɠɛni naati ma: «À mina wali ɠula nu ya ga zeeɠaaɓa, ɓaa wo ʋa zɛɛ ʋɛɛ nu ma, wo-zalai wo yiilɛi.» 15 Nuɓusɛi pɛ ge ɠɛni maaɓɔungi wosu kitogi zu. Ɛsɛ pɛ ge ɠɛni ɓɔɠɔ ɠaazaɠasu ga ni Zan lɛi, é ʋa ɠɛ ga Kilista. 16 Zan ti pɛ gooɠaaʋoteni, é ɠɛ ti ma: «Nɔ̀un, nà wo ɓatizesu ga ziɛi, kɛlɛ zɔi é ʋaazu nɔ̀un poluma, sɛbɛi wɔɔlɔʋɛ nɔ̀nɔi ʋa. Gè la vɔlɔ kula ɠɛɛni su ga gè ʋa ná-saʋala galuiti daavie. Tɔun, toɠa wo ɓatize ga Zɛnvu Ɲadegai ta abui. 17 Ná-sɛpɛgi ɠa zoni zea, ga é ná-molo loɠazuʋɛ ɓalesu, é moloi ɠaalɛ ba, é pu ná-molo ɠotai zu, kɛlɛ toɠa molo ɠaʋai ɠala abui zu, nii é la zaa eyɛsu pɛ.» 18 Ʋele ɠana é ɠɛni Woo Niinɛ Ʋagɔi laazeelizu la nuɓusɛiti ma ga tɛnɛ gooi taɠiligaa. 19 Tama Zan zeliloni masagi Elɔde ma, tɔɔzei kɛɛɠɛloin anzai Elɔdiade zeɠe vai ʋa bɛ ga anza, ta ná-faa ɲɔu mɔinmɔingiti faa zu, niiti é ti ɠɛɛni. 20 É ta ʋɛɛni zɔɔma vaa ɲɔi mɔtaiti pɛ ba, ga é Zan zoni, é pili kasoi ɠa. 21 Tɛi nuɓusɛi pɛ ge ɠɛni ɓatizesu, Yesu ɓalaa ɓatizeni. Kɛai ma GALA falizu, geeɠɔlɔgi laalaoni, 22 Zɛnvu Ɲadegai yei ma, poopogi ɓusɛi ɠɛʋelei zu. Wooi ta ɠulani geeɠɔlɔgi zu, é ɠɛ ma: «Ɗa ɠa è ga nɛ̀ɛbɛ Loun Zunui, ɗa gòla yiilaazu.» 23 Yesu kona ʋuusaʋagɔ (30) ɠɛɠala zɔlɔɔni niina, siɛgi zu é ná-botii lɔɔzeini la. Ʋelei nuiti ti laani la da, é ɠɛni ga Zozɛfe ná-doun zunui, Ɠeli ná-doun zunui, 24 Matate ná-doun zunui, Levi ná-doun zunui, Mɛlɛki ná-doun zunui, Yanayi ná-doun zunui, Zozɛfe ná-doun zunui, 25 Matatiyase ná-doun zunui, Amɔse ná-doun zunui, Naɠuume ná-doun zunui, Ɛsɛli ná-doun zunui, Nagayi ná-doun zunui, 26 Maate ná-doun zunui, Matatiyase ná-doun zunui, Semeyɛn ná-doun zunui, Zozɛke ná-doun zunui, Yoda ná-doun zunui, 27 Yoɠanan ná-doun zunui, Lesa ná-doun zunui, Zoloɓaɓɛle ná-doun zunui, Seyalitiyɛle ná-doun zunui, Neli ná-doun zunui, 28 Mɛlɛki ná-doun zunui, Adi ná-doun zunui, Kozame ná-doun zunui, Ɛlɛmadame ná-doun zunui, Ɛɛl ná-doun zunui, 29 Yesu ná-doun zunui, Eliyezɛɛl ná-doun zunui, Yolime ná-doun zunui, Matate ná-doun zunui, Levi ná-doun zunui, 30 Simiyɔn ná-doun zunui, Zuda ná-doun zunui, Zozɛfe ná-doun zunui, Yoname ná-doun zunui, Eliakime ná-doun zunui, 31 Meleya ná-doun zunui, Mɛna ná-doun zunui, Matata ná-doun zunui, Natan ná-doun zunui, Davide ná-doun zunui, 32 Izayi ná-doun zunui, Woɓɛde ná-doun zunui, Ɓoaze ná-doun zunui, Sala ná-doun zunui, Naason ná-doun zunui, 33 Aminadaɓe ná-doun zunui, Adamin ná-doun zunui, Aalini ná-doun zunui, Ɠɛsɛlon ná-doun zunui, Pelɛze ná-doun zunui, Zuda ná-doun zunui, 34 Zakɔɓe ná-doun zunui, Izaake ná-doun zunui, Abalaame ná-doun zunui, Tela ná-doun zunui, Naɠɔɔl ná-doun zunui, 35 Seluge ná-doun zunui, Leyu ná-doun zunui, Pelɛge ná-doun zunui, Eɓɛɛl ná-doun zunui, Sala ná-doun zunui, 36 Kayiname ná-doun zunui, Aalafakesade ná-doun zunui, Sɛme ná-doun zunui, Nowe ná-doun zunui, Lemɛke ná-doun zunui, 37 Matuzalɛme ná-doun zunui, Enɔke ná-doun zunui, Yelɛde ná-doun zunui, Maleleyɛle ná-doun zunui, Kenan ná-doun zunui, 38 Enɔse ná-doun zunui, Sɛte ná-doun zunui, Adama ná-doun zunui, GALA ná-doun zunui.