2 Corinthians 5 (MNT)

1 ሓይ ዉልሻ ማላ፥ ዻካ'' ዎዴሮ ማዔ ዑፃ ኑኡኮ ባይቄቴያ ዓሲ ማዢባኣያ፥ ፆኦሲ ማዤ ናንጊና ናንጎ ማኣሪ ኑኡኮ ጫሪንጮይዳ ዓኣሢ ኑ ዔራኔ። 2 ሃይካ ሳዖይዳ ኑ ዓኣዖ ጫሪንጮይዳ ዓኣ ማኣሮ ኑኡኮ ጌላኒ ኮዒ ሚርጌና ማሊ ኑ ሜታዻኔ። 3 ዬያ ማኣሮይዳ ኑ ጌሌ ዎዶ''ና ማኣሪባኣያ ካሎ'' ኑ ማዓዓኬ። 4 ሓያ ዉልሾጉዴ ማኣሮይዳ ኑ ናንጋ ናንጋ ዴኤፄም፥ ኑ ሚርጌና ማሊ ሜታዻኔ፤ ኑ ዬያይዲ ማሊ ሜታዻሢያ ኑኡኮ ሃይቃ ዑፃ ናንጎና ዔኤዺንቶም ጊዳ'' ቃቃሳኒ ማዓንዳፓዓቴም ኑፓ ሺኢሻኒቱዋሴ። 5 ያዺ ማዓንዳጉዲ ኑና ጊኢጊሼሢ ፆኦሲኬ፤ ኑም ሃጊ ማዓንዳ ባኮኮ ቢያ ዓይሢ ባኣዚ'' ማዓንዳጉዲ ፔኤኮ ዓያኖዋ ኑም ዒንጌሢ ዒዛኬ። 6 ኑኡኮ ሳዖይዳ ናንጎ ማኣሮ ማዔ ዑፆና ኑ ዓኣ ዎዶ''ማና ጎዳይዳፓ ኑ ሃኪ ናንጋሢ ዔራያ ማዔቴያ ቢያ ዎዴ ዒጊጩዋዖ ጎዳ ጉሙርቂ ኑ ናንጋኔ። 7 ኑኡኒ ናንጋሢ ጎዳ ጉሙርቂሢና ማዓንዳኣፓዓቴም ዛጊሢናቱዋሴ። 8 ሓያ ኑኡኮ ማኣሮ ማዔ ዑፆይዳፓ ዱማዺ ጎዳና ናንጋኒ ኑኡኒ ኮዓኔ፤ ጫርቂኬ ኑ ጌስታሢ። 9 ዬያሮ ሓያ ኑኡኮ ዑፆና ኑ ዓኣቴያ ዱማዺ ኑ ናንጌቴያ ኑኡኮ ማሊፃ ጎዳ ዎዛሲሢኬ። 10 ፔቴ'' ፔቴ''ሢ ፔ ናንጌ ዎዶ''ና ማዼማ ጉዴያ፥ ኮሺ ማዔቴያ ፑርታ ማዼ ማዾ'' ዛሎ'' ዒንጊንታ ባኮ ዔካኒ ኪሪስቶሴኮ ዎጎ ዎጎ ቤዞ ሺኢኪ ዔካንዳኔ። 11 ፆኦሲ ዒጊጪሢ ዎዚ ጌይሢታቴያ ኑ ዔራሢሮ ዓሳ ኑ ጋዓ ባኮ ጎኔኬ ጌይ ዔካንዳጉዲ ኑ ማዻኔ፤ ኑኡኒ ዖናንሢታቴያ ፆኦሲ ኑና ዔራኔ፤ ዒንሢያ ሃሣ ዒንሢ ዒኖና ኑኡኒ ዖናንሢታቴያ ዔራኔ ጌይ ታ ማላኔ። 12 ጋርሲ ዒናይዳ ዓኣ ባኣዚ''ቱዋንቴ፥ ዙላ'' ዓሲም ጴዻ ባኣዚ''ና ሄርሺንታ ዓሶም ዒንሢ ማሂ ኬኤዛኒ ኑኡና ዒንሢ ሄርሺንታንዳጉዲ ማዓንዳኣፓዓቴም ላሚ ጊንሣ ኑኡኮ ዖኑሞ ዒንሢም ኑ ኬኤዛኒቱዋሴ። 13 ኑ ዣኣሽካ ዓሲ ማዔቴያ ፆኦሲሮ ጌይኬ፤ ሃሣ ዒናና ዓኣ ዓሲ ኑ ማዔቴ ዒንሢሮ ጌይኬ። 14 ኪሪስቶሴኮ ናሹማ ኑና ዬያ ማዺሻኔ፤ ፔቴ''ሢ ቢያሢ ዛሎ'' ሃይቄሢሮ ቢያሢ ዒዛና ዎላ'' ሃይቄያ ማዔሢ ኑ ዔራኔ። 15 ሼምፔና ዓኣዞንሢ ቢያ ዔያቶ ጋይቴ ሓይቂ ሓይባ''ፓ ዔቄሢም ናንጋንዳኣፓዓቴም ሃይካፓ ሴካ ፔኤም ጌዒ ናንጉዋጉዲ ኪሪስቶሴ ቢያሢም ሓይቄኔ። 16 ዬያሮ ሃይፓ ሴካ ዖናኣ ኑ ዓሲ ዛጋ ዓኣፒና ዛጋዓኬ፤ ሃያኮ ቤርታ ኪሪስቶሴ ኑ ዛጌሢ ዓሲ ዛጋ ዓኣፒና ማዔቴያ ሃካፓ ሴካ ጋዓንቴ ኑ ዛጋንዳሢ ዬያ ጎይፆቱዋሴ። 17 ዬያሮ ዖኦኒያ ኪሪስቶሴና ዎላ'' ፔቴ'' ማዔቴ ዓኪ ማዢንቲኬ፤ ቤርታኣ ባካ ዓኣዼኔ፤ ዬያ ቤዞ ዓኪ ባኣዚ'' ዓርቄኔ ጌይሢኬ። 18 ዬይ ቢያ ያዺ ማዔሢ ኑና ፔኤና ዎላ'' ኪሪስቶሴ ዛሎ''ና ጊኢጊሼሢና፥ ጊኢጊሺፆ ማዾ''ዋ ኑም ዒንጌ ፆኦዛሢ ዛሎ''ናኬ። 19 ዬይያ ፆኦሲ' ኪሪስቶሴ ዛሎ''ና ዓሶ ቢያ ፔኤና ዎላ'' ጊኢጊሼኔ ጌይሢኬ፤ ሃሣ ዻቢንቶዋ ዔያቶኮ ዓርቂባኣሴ፤ ኑኡማኣ ዬያ ዓሶ ጊኢጊሻ ቃኣሎ'' ዒንጌኔ። 20 ፆኦሲ' ዓሶ ፔ ባንሢ ኑ ዛሎ''ና ዔኤላ''ሢሮ ኑኡኒ ኪሪስቶሴ ዛሎ'' ማዒ ጌስታያኬ፤ ዬያሮ፦ «ፆኦሲና ዎላ'' ጊኢጉዋቴ» ጌዒ ኪሪስቶሴ ሱ'ንፆና ኑ ዒንሢ ሺኢቃኔ። 21 ኑኡኒ ኪሪስቶሴና ዎላ'' ፔቴ'' ማዒ ፆኦሲ ፂሉ''ሞ ዴንቃንዳጉዲ ጎሜባኣ ኪሪስቶሴ ኑኡኮ ጎሞ ኬዳንዳጉዲ ፆኦሲ ማሄኔ።

2 Corinthians 5 (MNT)

In Other Versions