Exodus 33 (SUSU2)
1 عَلَتَلَ نَشَ عَ مَسٍن مُنسَ بّ، «وٌ نُن حَمَ عِ نَشَن نَمِنِشِ مِسِرَ بْشِ كُي، وٌ شَ سِفَ ﭑ دّننَشّ لَايِدِشِ عِبُرَهِمَ، عِسِيَفَ، نُن يَشُبَ بّ كَلِ رَ، عَ قَلَقٍ رَ ﭑ نَ قِمَ عٍ بْنسْييٍ مَ. 2 ﭑ مَلٍكّ تِمَ نّ وٌ يَ رَ. ﭑ كَنَانكَيٍ، عَمٌرِكَيٍ، شِتِكَيٍ، ثٍرِ سِكَيٍ، هِوِكَيٍ، نُن يٍبُسُكَيٍ كٍرِ مَ نّ 3 نَ بْشِ مَ، شِحّ نُن كُمِ شّلّمَ دّننَشّ. كْنْ ﭑ تَن مُ سِفَمَ نَا وٌ قْشْ رَ، شَ نَ مُ عَ رَ ﭑ وٌ سْنتْمَ نّ كِرَ شْن مَ، بَرِ مَ حَمَ شُرُتَرٍ نَن وٌ رَ.» 4 حَمَ تٌ نَ مَسٍنيِ شْرْشْي مّ، عٍ نَشَ سُننُن. مِشِ يٌ مُ عَ رَشُنمَسٍيٍ سٌ عَ مَ. 5 عَلَتَلَ نَشَ عَ مَسٍن مُنسَ بّ، «عِ شَ عَ قَلَ عِسِرَيِلَكَيٍ بّ، ‹شُرُتَرٍيٍ نَن وٌ رَ. شَ ﭑ بِرَ وٌ قْشْ رَ، ﭑ وٌ سْنتْمَ نّ. وٌ شَ وٌ قَتٍ رَشُنمَسٍ بِرِن بَ وٌ مَ، ﭑ شَ عَ مَتٌ ﭑ وٌ شَ قٍ سُشُمَ كِ نَشّ.›» 6 نَ كُي عٍ تٌ كٍلِ شٌرٍبٍ فٍيَ يِرٍ، عٍ نَشَ عٍ شَ شُنمَسٍيٍ بَ عٍ مَ. 7 مُنسَ نُ كِرِ بَنشِ تٌنفٌمَ، عَ نُ عَ تِ عِسِرَيِلَكَيٍ شَ يٌنكِندٍ قَرِ مَ. عَ نَشَ نَ شِلِ سَ عَلَ مَشَندِ يِرٍ. مّننِ مِشِ نُ نْمَ مَشْرِنيِ تِدٍ عَلَتَلَ مَ. 8 مُنسَ تٌ نُ مِنِمَ سِفَقٍ رَ نَ بَنشِ كُي، حَمَ بِرِن نُ كٍلِمَ نّ، عٍ تِ عٍ شَ نَادّ رَ، عٍ يَ تِ مُنسَ رَ هَن عَ سٌ نَ كُي. 9 مُنسَ نَ فّ سٌدٍ نَ بَنشِ كُي، نُشُي نُ فٌرٌ مَ نَ نَادّ رَ، عَلَتَلَ قَ سُمُن عَ بّ. 10 عِسِرَيِلَكَيٍ تٌ نُ نَ نُشُي تٌمَ نَ بَنشِ سٌدٍ دّ مَ، عٍ نُ لُمَ عٍ مَقٍلٍن نَ بْشِ مَ عٍ شْنيِ نَادّيٍ رَ. 11 عَلَتَلَ نُ وْيّنمَ مُنسَ بّ عٍ بٌورٍ يَ عِ، عَلْ مِشِ وْيّنمَ عَ بٌورٍ بّ كِ نَشّ. سُمُنيِ دَنفِ شَنبِ، مُنسَ نُ فبِلٍنمَ حَمَ يِرٍ، كْنْ عَ مَلِمَ يٌسُوٍ، نُن شَ دِ، نَ تَن مُ نُ كٍلِمَ نَ بَنشِ كُي. 12 مُنسَ نَشَ عَ مَسٍن عَلَتَلَ بّ، «ﭑ مَرِفِ عِ بَرَ ﭑ يَمَرِ ﭑ شَ تِ يِ حَمَ يَ رَ، كْنْ عِ مُ عَ مَسٍنشِ ﭑ بّ عِ نَشَن شّيمَ مُشُ مَتِقٍ رَ. عِ بَرَ عَ قَلَ ﭑ بّ، ‹ﭑ تَن نَن عِ سُفَندِشِ، عِ بَرَ ﭑ كّنّن.› 13 ﭑ بَرَ عِ مَشَندِ، شَ ﭑ عِ كّنّنشِ، عِ شَ عِ وَشْنقٍ مَسٍن ﭑ بّ، عَلَكٌ ﭑ شَ عِ كٌلٌن يَتِ، ﭑ مَن شَ عِ شَ هِننّ سْتْ. عِ شَ عَ كٌلٌن، يِ سِ قِندِشِ عِ شَ حَمَ نَن نَ.» 14 عَلَتَلَ نَشَ عَ يَابِ، «ﭑ تَن يَتِ وٌ مَتِمَ نّ، ﭑ شَ بْحّسَ قِ وٌ مَ.» 15 مُنسَ نَشَ عَ مَسٍن عَ بّ، «شَ عِ تَن يَتِ مُ مُشُ مَتِمَ نَا، عِ نَشَ عَ لُ مُشُ شَ كٍلِ بٍ. 16 مُنسٍ نْمَ عَ مَسٍندٍ دُنِحَ بّ عَ مُشُ بَرَ عِ كّنّن، شَ عِ مُ نَ مُشُ قْشْ رَ؟ نَ كُي شَ عِ نَ مُشُ قْشْ رَ، عٍ نْمَ عَ كٌلٌندٍ عِ بَرَ ﭑ تَن نُن عِ شَ حَمَ سُفَندِ دُنِحَ سِ بِرِن يَ مَ.» 17 عَلَتَلَ نَشَ مُنسَ يَابِ، «عِ نَشَن قَلَشِ، ﭑ عَ رَبَمَ نّ، بَرِ مَ عِ بَرَ ﭑ كّنّن. ﭑ تَن نَن عِ سُفَندِشِ يَتِ.» 18 نَ دَنفِ شَنبِ مُنسَ نَشَ عَلَ مَشَندِ، «عِ شَ عِ شَ نْرّ مَسٍن ﭑ بّ.» 19 عَلَتَلَ نَشَ عَ يَابِ، «ﭑ قَمَ ﭑ مَ قَنيِ بِرِن مَسٍندٍ عِ بّ. ﭑ تَن عَلَتَلَ، ﭑ مَن قَمَ ﭑ شِلِ يَتِ قَلَدٍ عِ بّ. ﭑ هِننّمَ مِشِ رَ، ﭑ وَ مَ هِننّقٍ نَشَن نَ. ﭑ كِنِكِنِمَ مِشِ مَ، ﭑ وَ مَ كِنِكِنِقٍ نَشَن مَ. 20 كْنْ عِ مُ نْمَ ﭑ يَتَفِ تَن تٌدٍ، بَرِ مَ عَدَ مَدِ يٌ مُ نْمَ ﭑ يَتَفِ تٌدٍ، عَ مُ قَشَ.» 21 عَلَتَلَ نَشَ عَ مَسٍن عَ بّ، «قَنيٍ ندٍ نَن بٍ ﭑ قّ مَ. عِ شَ تِ نَا. 22 ﭑ نّ دَنفِمَ ﭑ مَ نْرّ كُي، ﭑ عِ نْشُنمَ قْنمّ كُي، ﭑ قَ عِ يَ مَكٌتٌ ﭑ بّلّشّ رَ هَن ﭑ فّمَ دَنفِدٍ تّمُي نَشّ. 23 نَ تّمُي ﭑ قَمَ ﭑ بّلّشّ بَدٍ عِ يَ مَ، عَلَكٌ عِ شَ نْ ﭑ كٌبٍ تٌدٍ قَ، كْنْ عِ مُ نْمَ ﭑ يَتَفِ تَن تٌدٍ.»